36м2 дуплекс загварын төлөвлөлт

36м2 дуплекс загварын төлөвлөлт

Эрчим хүчний хэмнэлттэй амины орон сууцны зөвлөгч архитектор Ч.Батцэнгэл 

Энэ удаагийн дугаартаа олон хүүхэдтэй гэр бүлд зориулсан дуплекс байшинг онцолж, уг байшингийн төлөвлөлт болон төсвийг танилцуулахаар бэлтгэлээ. Дуплекс загварын байшин нь энгийн байшинг бодвол орон зайг маш оновчтойгоор ашиглаж, багахан газарт ч барих боломжтой төдийгүй зардлын хувьд ч хэмнэлттэй гэдгээрээ давуу талтай. 

Дуплекс хаус, сууц гэхээр хүмүүс шууд хоёр давхар байшинг төсөөлчихдөг. Энэ буруу ойлголт юм. Гэхдээ хоёр давхар хаус, барилга төлөвлөж байгаа тохиолдолд унтлагын өрөөг ихэвчлэн хоёрдугаар давхарт төлөвлөдөг. Дуплекс хаус, сууц гэдэг нь тэрхүү унтлагын өрөөг нэг давхар барилга дотроо багтаан төлөвлөдгөөрөө маш онцлогтой. Тухайн барилгын доторх зохион байгуулалт, төлөвлөлтөөс хамааран дийлэнх тохиолдолд нар руу харсан том цонхны эсрэг талд төлөвлөдөг. Наран ээвэр талыг барилгын эрчим хүчний хэмнэлтэд том дэмжлэг болохуйцаар ашиглая гэвэл нар туулах зайг тооцож наран тал руу харсан том цонхыг төлөвлөнө. Ингэхдээ ханын өндөр 4,5 метрээс дээш байршил маш оновчтой бөгөөд дуплекс загварыг төлөвлөх нь үүнтэй маш сайн зохицохоос гадна оновчтой шийдэл болдог. Дуплекс сууцыг олон төрлөөр зохиох боломжтой. Бидний сайн мэдэх А сууц буюу нордик загварууд, скандинавийн байшингийн загварууд, мөн барууны тансаг хаусны төрлөөр ч байж болно. Бидний энэ удаагийн дуплекс байшинг зуслангийн газарт зориулан зуны сууц хэлбэрээр барих төдийгүй нэмэлт шийдлүүдийг хийснээр дулаалах ч боломжтой юм. Террассны хэсгийг задгай төлөвлөсөн тохиолд хавар, зун, намар гэсэн гурван улиралд ашиглана. Харин террассны хэсгийг тунгалаг пластик төрлийн нарны элчийг нэвтрүүлэх материалаар хийвэл жилийн дөрвөн улиралд ашиглах боломжтой болно. 


Аливаа зүйлийг хийхийн өмнө судалгаа маш чухал бөгөөд тодорхой мэдээлэл, мэдлэгтэй болсныхоо дараа ажлаа эхлүүлэх хэрэгтэй. 

1.  Дуплекс байшинг барьдаг компаниуд болон мэргэжилтнүүдийг судлан, харьцуулалт хийж сонгох 

2. Газраа сонгохдоо дэд бүтцийг анхаарч авах хэрэгтэй. Ус, ариутгах татуурга, автозамын бүтээн байгуулалт гэх мэт зүйлсийг хот төлөвлөлтийн газраас мэдэхэд илүүдэхгүй 

3.  Суурийн ажлыг эхлэхээс өмнө бохирын асуудлаа шийдэх 

4.  Байшинг барихад гадна дотор засал, сантехник, тог цахилгаан гээд олон талын хүмүүс хэрэгтэй болох учраас ерөнхий гүйцэтгэгчээ оновчтой сонгож, бүгдийг даатгах нь танд илүү хялбар байх болно. 

5. Ханын өндөр намхан байх боломжгүй бөгөөд тухайн загварын төлөвлөлтөөс хамаарч тохиромжтой байхаар тооцно.


Үндсэн бүтээц 

Хөндий квадрат төмрөөр карказлан хийх бөгөөд гадна фасад нь үргэлжилсэн ZINC загварын /aluminium/ метал дээврийн төмрөөр хийгдэнэ. Террассны хэсгийн хөндий квадрат карказ нь зэвэрдэггүй цагаан метал төмрөөр хийхээр төлөвлөсөн. Том шилэн хаалга болон цонхтой. Энэ нь нэг талаараа эрчим хүчийг хэмнэх бөгөөд зуны халуун өдрүүдэд нарны хэт ягаан туяанаас шүүх технологийг ашигласан болно. 

Карказ төмрийг сайн чанарын OSB хавтангаар дотор болон гадна талаас канад модон арагт бүтээцийн аргачлалаар хийнэ. Гадна чийг ус тусгаарлагчийг хийж төмөр дээвэр болон zinc фасадыг хийж гүйцэтгэнэ. Үүний дараа дотор талыг бүтэн рек модоор доторлож өгвөл мод үнэртсэн орчин бүхий интерьертэй болж өгнө.

Суурь болон шалыг нил суурийн зарчмаар цутгаж хийх нь илүү оновчтой. Гэхдээ тухайн сууц баригдах байршил газрын хөрсний нөхцөл болон хөрсний шинж чанараас хамааран гадсан эсвэл шаантаг суурь төлөвлөж болно. Хэрвээ нэг дор олныг барихаар бол холбосон тавцан хэлбэрийн газраас хөндий үргэлжилсэн шалтай байхаар хийвэл илүү сонирхолтой ая тух мэдрүүлсэн байх болно.

 Уг сууцыг лагерын газар дээрээ барихаар төлөвлөсөн тохиолдолд гадна ландшафтны дизайныг хослуулан хийгээрэй. Гадна тохижилтыг төлөвлөхдөө мэргэжлийн хүнээс зөвлөгөө авч бага зардлаар сайхан орчныг бий болгох боломжтой гэдгийг мартаж болохгүй. 

Зохион байгуулалт 

Том өрөө болон гал тогооны хэсгийг хамт байхаар төлөвлөсөн бөгөөд дотор орон зайг хэрхэн ашигласныг энэхүү зургаас харж болох юм. Орны доод хэсгийн зайг ашиглан гал тогоо, ажлын өрөө, хувцасны өрөө, номын сан гэх мэт олон янзаар тохижуулан ашиглах боломжтой.  

Дуплекс хэсэг рүү гарч байгаа шатыг маш олон төрлөөр хийж болно. Жишээлбэл, эвхдэг мөн зөөх дугуйтай байж болох төдийгүй тавилгатай ч хослуулан хийж ч болно. 

Дээд унтлагын хэсгийг мөн адил хүссэнээрээ тохижуулах боломжтой бөгөөд мини номын сан, ажиллах хэсгийг ч төлөвлөж болно. Энэхүү загвар дээрх дуплекс болгосон унтах хэсгийн хаалтыг мөн бүх төрлөөр хийж болно. Жишээлбэл, мини номын тавиур байхаар төлөвлөж болох юм. 



Дотроо ариун цэврийн өрөөтэй төлөвлөж өгсөн нь хөрсний бохирдлыг бууруулахад хүн бүрийн өөрсдийн оролцоо чухал гэсэн үүднээс зориудаар төлөвлөсөн. Суултуур, угаалтуур, босоо душ зэргийг жижиг зайд ч гэсэн оновчтой төлөвлөж өгвөл том м2-ын шаардлагагүйгээр шийдэж болно.




Мөн террасын төлөвлөж өгснөөр гэр бүлээрээ ая тухтай суух боломжийг бүрдүүлсэн бөгөөд сүүдрэвчийг саравч болон сараалжин хэлбэрийг хослуулж өгснөөрөө онцлог. Ингэснээр нарыг зохистойгоор тусахад нөлөөтэй бөгөөд саравч барих төсвийг хэмнэх давуу талтай. 


36М2 ДУПЛЕКС СУУЦЫГ ХИЙЖ ГҮЙЦЭТГЭХ  ЗАРДЛЫН ТӨСӨВ


Төсөвт өртгийг гаргахдаа барилгын материалын одоогийн үнэ ханшаар тооцож гаргасан болно.

Төсөвт өртөг: 41 623 469 ₮



СЭТГЭГДЭЛ БИЧИХ

АНХААРУУЛГА:
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ