Бүгд Найрамдах Улс тунхагласны 98 жилийн ой, Монгол Улсад Эрчим хүчний салбар үүсэж хөгжсөний 100 жилийн ой, Их эзэн Чингис хааны мэндэлсний 860 жилийн ой, “Монгол бахархлын өдөр”-ийг тохиолдуулан хүмүүнлэг, иргэний ардчилсан нийгэм цогцлуулан хөгжүүлэх, улс орон, ард иргэдийг найдвартай, тасралтгүй эрчим хүчээр хангах үйлсэд хичээл зүтгэл, гарамгай амжилт гаргасан эрхмүүдэд /2022.11.25/ төрийн дээд цол, одон, медаль гардуулав.

Үүний дотор Монголын барилгын зураг төсөл зохиогчдын холбооны үүсгэн байгуулагчдын нэг “Эрчим төсөл” ХХК-ийн цахилгааны инженер, МУ-ын зөвлөх инженер Дашзэвэгийн Нанжаа нь Монголын барилгын зураг төслийн салбараас анхны “Хөдөлмөрийн баатар” цолыг хүртээд байна. 

Тэрээр эрчим хүчний салбарт тасралтгүй 60 гаруй жил ажиллахдаа Говь-Алтай аймгийн Алтай-Бигэр, Хөвсгөл аймгийн Мөрөн-Алаг-Эрдэнэ-Хатгал, Сүхбаатар аймгийн Халзан-Онгон-Дарьганга, Баян-Өлгий аймгийн Цагааннуур-Ногооннуур, Дундговь аймгийн Мандалговь, Улаанбаатар хотын Гачууртын зэрэг 30 гаруй дэд станц, трансформаторын өртөө байгуулахад идэвх санаачлагатай оролцож, Тосонцэнгэл, Богдын гол, Завханы Галуутай гол, Тайширын усан цахилгаан станц, III, IV Дулааны цахилгаан станцын өргөтгөл, Эрдэнэт хотын Дулааны цахилгаан станц зэрэг 60 гаруй объектын зураг төслийг боловсруулахад зөвлөхөөр ажиллаж, алслагдсан аймгуудыг дизель цахилгаан үүсгүүрийн эрчим хүчээр хангах ажлыг гардан хэрэгжүүлсэн. 

Тоног төхөөрөмжийн суурилуулалт, тохируулгыг мэргэжлийн өндөр түвшинд гүйцэтгэж, богино залгааны гүйдлийн тооцооны загвар төхөөрөмжийг хэрэглээнд нэвтрүүлэн эрчим хүчний үр ашгийг нэмэгдүүлэхэд хувь нэмрээ оруулж, идлэг шонхор болон нүүдлийн шувуудыг хамгаалах 6, 10 Кв-ын агаарын шугамуудын хэрэгсэл зохион бүтээж суурьшуулсан, олон арван эрчим хүчний шугам сүлжээ, цахилгаан станц, барилга байгууламж, техник тоног төхөөрөмжийн өргөтгөл, шинэчлэлийн зураг төсөл боловсруулан барьж ашиглалтад хүлээлгэн өгөхөд оролцож, эрчим хүчний салбарын хөгжилд үнэтэй хувь нэмэр оруулсан юм. 

Мөн энэ өдөр Монгол Улсын Зөвлөх архитектор, МБҮА ТББ-ын УЗ-ийн гишүүн, Барилга МН сэтгүүлийн Бодлогын зөвлөлийн гишүүн, “ТИ ЭНД ЖИ” ХХК-ийн захирал Н.Цогтоо, Уран тогоо” ХХК - ийн Төлөөлөн Удирдах Зөвлөлийн дарга, зөвлөх инженер Дагвадоржийн Банзрагч нар Монгол Улсын Гавьяат барилгачин цол тэмдгээр шагнагдлаа.