Барилга, орон сууц 2022 үзэсгэлэнгийн шилдгүүд шалгарлаа

Барилга, орон сууц 2022 үзэсгэлэнгийн шилдгүүд шалгарлаа

Шинэ үеийн барилгын салбар үүсэж хөгжсөний 96 жилийн ой, Барилга МН - ийн 15 жилийн ойн хүрээнд “Тогтвортой хөгжилд хамтдаа” уриан дор “Барилга- Орон сууц 2022” үзэсгэлэн, яармаг амжилттай зохион байгуулагдлаа. Энэ удаагийн  үзэсгэлэнд барилгын төсөл хэрэгжүүлэгчид, барилгын материал үйлдвэрлэгчид, ханган нийлүүлэгчид, барилгын салбарын шилдэг аж ахуй нэгж, шинэ техник технологи нэвтрүүлэгчид зэрэг 100 гаруй аж ахуй нэгж оролцсон бөгөөд уламжлал ёсоор шилдэг аж ахуй нэгж байгууллагуудаа /2022.09.11/ шалгарууллаа. 

Хаалтын үйл ажиллагаанд “Барилга, орон сууц 2022” үзэсгэлэн яармагийн зохион байгуулах хорооны дарга, Барилга МН үүсгэн байгуулагч Г.Батсүх, Барилгын хөгжлийн төвийн тэргүүн дэд захирал О.Одбаяр, Төрийн орон сууцны корпорацийн гүйцэтгэх захирал Л.Батжаргал, Монголын барилгын үндэсний ассациоцийн гүйцэтгэх захирал Л.Хулан нар хүрэлцэн ирж шагналыг гардууллаа. 


Шилдэг Дэвшилтэт техник технологи нэвтрүүлэгчээр Си Эн Пи Монголиа Ватер Солиушн ХХК 

Си Эн Пи Монголиа Ватер Солиушн ХХК нь БНХАУ-ын улсдаа тэргүүлэгч CNP брэндийн эрчим хүчний хэмнэлттэй, олон улсын шаардлага хангасан, Евростандартын давтамж хувиргагч бүхий  дуу чимээ, эрчим хүчний зарцуулалт багатай  CDME/CHME маркийн хүйтэн ус, галын системийн өргөлтийн насос, TDE маркийн системийн эргэлтийн насоснуудыг Монголын барилгын зах зээлд нийлүүлэн ажиллаж байна. 


Шилдэг шинэ орон сууцаар Belmonte residence

Эн Ти Эм ХХК-ийн хэрэгжүүлж буй Белмонте Резиденс төсөл нь Улаанбаатар хотын шинэ суурьшлын бүс болох Богдхан уулын Хүүшийн аманд байрлалтай бөгөөд урьд өмнө барилга байгууламж баригдаж байгаагүй эрүүл хөрс, цэвэр орчинд баригдаж байгаагаараа онцлог бөгөөд Belmonte Tower оффис, үйлчилгээний байгууламж болон Belmonte Residence бизнес зэрэглэлийн орон сууцуудаас бүрдэж байна.

Төслийн архитектур төлөвлөлтөөр байр хоорондын зайг 48-65м зайтай төлөвлөсний дагуу Монголдоо анхдагч шалнаас тааз хүрсэн талстан цонхны шийдлийг хэрэгжүүлсэн нь нарны тусгал айл бүрт хүртээмжтэй, интерьерийг илүү саруул байхаар төлөвлөж өгсөн. 

Хотхон доторх ОУ-ын Кембриджийн хөтөлбөр хэрэгжүүлэгч JET SECONDARY сургууль, JET KINDERGARDEN цэцэрлэг болон худалдаа үйлчилгээний төвүүдийг бүрдүүлснээр оршин суугчдынхаа хэрэгцээг бүрэн хангаж байна. 

Мөн Белмонте резиденс хотхон нь бүтээн байгуулалтын үе шат бүртээ ОУ-ын стандарт шаардлагад нийцсэн хүний биед ээлтэй дэлхийд тэргүүлэгч брэндийн материал тоноглолуудыг ашиглаж байна.


Шилдэг ханган нийлүүлэгчээр Нартын голомт ХХК 

“Нартын голомт” компани 2012 онд байгуулагдсан бөгөөд Европ стандартын, чанарын шаардлага хангасан, тухайн улсдаа 30 - 40 жилийн турш хэрэглэгдсэн, дэлхийн зах зээлд хэдийнэ танигдсан бүтээгдэхүүнийг албан ёсны эрхтэйгээр, үйлдвэрээс нь нийлүүлдгээрээ давуу талтай юм. 

Тус компани нь Польш улсын “Кан-Терм” брэнд, ОХУ-ын “Хемкор” брэндийн бохир усны хоолой, Польш улсын “Коспел” брэндийн халаалтын бойлер, Францын  “Атлантик” брэндийн хэрэглээний халуун усны бойлер гэх мэт сантехникийн чанартай олон брэндийг уян хатан үнээр эх орныхоо зах зээлд нийлүүлж, хэрэглэгчдэд хүргэсээр байна. 

Шилдэг үйлдвэрлэгчээр Түмэн төмөрт ХХК

Түмэн төмөрт ХХК нь 1999 оноос эхлэн үйл ажиллагаа явуулж байгаа бөгөөд 23 жилийн туршид Монгол улсынхаа төмөрлөг материалын зах зээлийн хөгжил дэвшилд өөрийн хувь нэмрээ оруулж, олон улсын жишигт нийцсэн, дэвшилтэт үйлчилгээг мэргэжлийн өндөр түвшинд, түргэн шуурхай хүргэн ажиллаж байна. Тэд  Барилга, Уул уурхай, Хүнд болон хөнгөн үйлдвэрийн салбар дахь  бүх төрлийн төмөр хийцийн үйлдвэрлэл, угсралт, засварыг хийж байгаа бөгөөд жилд дундажаар  14 сая ам долларын орлоготой ажиллаж байгаа юм. 

Түүнчлэн 2018 оноос эхлэн олон улсын ISO 9001, ISO 45001, ISO 14001 зэрэг стандартуудыг үйлдвэрлэлдээ нэвтрүүлээд байгаа салбартаа манлайлагч компани юм. 

Шилдэг оролцогчоор Монкон констракшн ХХК

"Монкон Констракшн" ХХК нь иргэний ба үйлдвэрийн барилга, дэд бүтцийн барилга байгууламж барих үйл ажиллагаа явуулах үндсэн зорилготойгоор 2010 онд үүсгэн байгуулагдсан.

Барилгын зураг төслөөс эхлээд барилга угсралт, үйл хөдлөх хөрөнгийн менежмент, орон сууцны ашиглалт зэргээр барилгын салбарт цогц үйл ажиллгааг хэрэгжүүлдгээрээ онцлог юм. Тус компани нь өдгөө 13 охин компани, 800 гаруй ажилтантайгаар үйл ажиллагаа явуулж байгаа бөгөөд салбартаа анхдагч болж чаддаг онцлогтой компани юм. Үүний нэг илрэл бол Монголдоо анхдагч гэсэн тодотголтойгоор сүндэрлэж буй өндөр зэрэглэлийн хос цамхаг болох 360/365 Мандала Тауэр юм. 

Шилдэг төсөл хөтөлбөр хэрэгжүүлэгчээр Улаанбаатар групп ХХК


Улаанбаатар групп ХХК нь 2013 онд байгуулагдсан бөгөөд 17 жилийн туршлагатай компани юм. Тэд өнгөрсөн хугацаанд 130 000 м2 иргэний болон оффисын зориулалттай барилгын төслүүдийг хэрэгжүүлэн хүлээлгэн өгсөн байна. Улсад жилдээ 1,2 тэрбум төгрөгийн татвар шимтгэл болон нийгмийн хариуцлагын хүрээнд олон ажлуудыг хийсэн салбартаа үлгэр жишээ, манлайлагч компани юм. 

Тус компани нь НҮБ- ийн “Тогтвортой хөгжлийн зорилго 2030” хөтөлбөрөөс сонгон шууд болон шууд бусаар хэрэгжүүлэн, Монголдоо ногоон барилгыг бүтээн байгуулахаар зорилт тавин ажилллаж байгаа юм.

“Барилга- Орон сууц 2022” үзэсгэлэн, яармагийн Ерөнхий зохион байгуулагчаар “Барилга МН”, Хамтран зохион байгуулагчаар Барилга, хот байгуулалтын яам, Барилгын Хөгжлийн Төв, Төрийн орон сууцны корпораци, Монголын барилгын үндэсний ассоциаци, Ерөнхий ивээн тэтгэгч Улаанбаатар групп,  Ивээн тэтгэгчээр Монкон констракшн ХХК, NCD GROUP ажиллаа. 

Энэ ташрамд үзэсгэлэнг хамтран зохион байгуулсан төрийн болон төрийн бус байгууллага, ивээн тэтгэгч байгууллагууддаа баярлаж, талархаж байгаагаа илэрхийлье. Мөн шилдгээр шалгарсан компаниуддаа баяр хүргээд, бүтээн байгуулалтын их үйлсэд нь амжилт хүсье! 



СЭТГЭГДЭЛ БИЧИХ

АНХААРУУЛГА:
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ