Газрын шинэтгэлийн ач холбогдлыг олон нийтэд сурталчлах зорилгоор Засгийн газрын тогтоолын дагуу 2004 оноос “Газрын харилцааны ажилтны өдөр”- ийг жил бүрийн 05  дугаар сарын эхний ням гаригт тэмдэглэхээр болсон. Энэ жилийн  газрын  харилцааны ажилтны өдрийг угтаж Газрын харилцаа,  барилга,  геодези, зураг зүйн газраас тус салбарт ажилладаг төрийн болон хувийн хэвшлийнхэн,  оюутан сурагчдын дунд олон ажил зохион байгуулжээ. Тухайлбал, дүүргүүдийн газрын албадтай хамтран “Нээлттэй хаалга”-ны өдрийг зохион байгуулж газар  өмчлөх, эзэмших, ашиглахтай холбогдсон иргэдийн сонирхсон асуултад хариу өгсөн байна. Мөн нийслэл,орон нутгийн газрын харилцааны салбарын ажилтнуудаас бүрдсэн 9  багийн 300 гаруй тамирчин оролцсон шилжин явах цомын спортын тэмцээнийг зохион байгуулжээ.

Тэмцээний нийт дүнгээр Геодезийн мэргэжлийн байгуулагуудын нэгдүгээр баг гурван алт, хоёр мөнгө, хоёр хүрэл медалиар энэ оны шилжин явах цомын эзэд болсон юм. Зүүн бүсийн мэргэжлийн байгууллагуудын баг нэг алт, нэг мөнгө, хоёр хүрэл медалиар удаахь байрыг эзэлсэн бол гуравдугаар байранд Нийслэлийн газрын алба болон газрын мэргэжлийн байгуулагуудын баг тус тус эзэллээ.

Жил бүр “Газрын харилцааны ажилтны өдөр”-ийг угтаж газрын харилцааны чиглэлээр суралцдаг оюутнуудын дунд шилдэг илтгэлийн уралдаан зохиож, мөн мод тарьдаг уламжлалтай. Энэ уламжлал ёсоор Богд хааны ордон музейн өмнөх талбайг зүлэгжүүлэн, мод тарьж,  оюутнуудын дунд “Газрын харилцааны салбарт мэдээллийн технологийг ашиглах  нь”, “Монгол оронд гурван хэмжээст кадастрыг нэвтрүүлснээр эдийн засагт үзүүлэх ач холбогдол” гэсэн ерөнхий сэдвүүдээр илтгэлийн уралдаан  зохион байгуулж дүгнэсэн байна.