Цахилгааны үнэ тавдугаар сарын 1-нээс нэмэгдэнэ

Цахилгааны үнэ тавдугаар сарын 1-нээс нэмэгдэнэ

Эрчим хүчний зохицуулах газрын Зохицуулагчдын зөвлөлийн дарга Н.Мягмарсүрэнтэй цахилгааны үнийн асуудлаар ярилцлаа.

-Төв болон дорнод бүсийн цахилгаан, дулааны үнийн зохицуулалтын шийдвэрийг гаргажээ. Цахилгаан дулааны үнэ хэрхэн нэмэгдсэн бэ?
-Орон сууцны халаалт, халуун усны үнийг 12 хувиар нэмнэ. Уул уурхайн олборлолт, боловсруулалт хийдэг аж ахуйн нэгж, байгууллагуудад борлуулах цахилгаан үнэ 1 кВТ/ц нь 100 төг болсон. Бусад үйлдвэр, аж ахуйн нэгж байгууллагын цахилгааны тарифыг 10.3 хувиар нэмэгдүүлж, 88 төгрөгөөр тогтоосон. Орон сууц, гэр хорооллын бүх айл өрхийн цахилгааны үнийг дөрвөн төгрөгөөр нэмсэн. Харин шөнийн цагийн хөнгөлөлттэй тариф, үйлдвэр аж ахуйн нэгжийн халаалтын үнэ, эмзэг бүлгийн цахилгааны тарифыг нэмэхгүй. Дээрх зохицуулалт нь ирэх тавдугаар сарын 1-нээс хэрэгжинэ.

-Энэ нь өргөн хэрэглээний барааны үнэд хэрхэн нөлөөлөх вэ?

-Иргэдийн өргөн хэрэглээний бараа болох талх, сүү, мах, гурилын үнэд цахилгаан уурын үнийн өсөлт хэрхэн нөлөөлөхийг судалсан. Үүнд, “Талх чихэр”, “Сүү”, “Мах импекс”, “Алтан тариа” ХК-иудыг хамруулахад нийт зардал нь 0.5-1 хувиар нэмэгдэх тооцоо гарсан. Тухайлбал, “Атар” талхны үнэ 3-4, “Алтан тариа” ХК-ийн дээд болон нэгдүгээр гурилын үнэ 4-6 төгрөгөөр тус тус нэмэгдэнэ.

-Гэхдээ бодит байдал дээр хэд дахин нэмэгдэж, иргэдийн нуруун дээр ачаа ирдэг шүү дээ. Цахилгаан, дулааны үнийн өсөлтөөс болж өргөн хэрэглээний барааны үнэ хөөрөгдөх байдалд ямар хяналт тавих вэ?
-Үүнд Шударга өрсөлдөөний газраас хяналт тавих байх. Уг нь тэгж үнийг хөөрөгдөж болохгүй.

-Дулааны цахилгаан станцуудын үндсэн түүхий эд нь нүүрс. Манай улс дотооддоо нүүрсээ олборлодог. Тиймээс тухайн компаниудтай зөвшилцөж болохгүй гэж үү?
-Өнгөрсөн жил манай салбар 45.2 тэрбум төгрөгийн алдагдалтай ажилласан. Үүнийг Засгийн газар, тусгай зөвшөөрөл эзэмшигч компаниуд үүрч байна. Өөрөөр хэлбэл, цахилгаан дулааны үнэ бодит тарифтаа хүрдэггүй. Нүүрсний үнэ ч өртөгөө барьдаггүй. Бид хэрэглэгчдэд очих ачааллыг багасгахаар дотоод нөөц боломжийг ашиглан өртөг зардлыг бууруулж, Засгийн газраас тодорхой дэмжлэг авсны үндсэн дээр тарифын зохицуулалтыг хийсэн. Тиймээс зөвхөн хэрэглэгчдийн нуруун дээр үүрүүлэх бодлого бариагүй.

-Тарифын өөрчлөлтөөс хэчнээн төгрөг хуримтлагдах вэ. Үүнийг юунд зарцуулах бол?
-Тарифын өөрчлөлтөөс 31.3 тэрбум төгрөгийг бий болгоно. Үүний 24.5 хувь нь нүүрсний уурхай, есөн хувь нь төмөр зам, үлдсэн нь тусгай зөвшөөрөл эзэмшигч компаниудад очих юм. Одоогийн байдлаар төвийн бүсийн хэмжээнд 64.4 тэрбум төгрөгийн нэмэлт эх үүсвэр шаардлагатай байна. Тиймээс улсын төсвийн татаасаар 14.5, хэрэглээний өсөлт, үйл ажиллагааны үр ашгийг дээшлүүлэн хэмнэлт гаргах, өртөг зардлыг бууруулах чиглэлээр 18.8 тэр бум төгрөгийг бүрдүүлэх юм.

Холбоотой мэдээ