Хамгийн үнэтэй байшин

Холливудын одод болон Лос-Анжелесийн Беверли-хилссийн тэрбумтнууд аж төрж байсан дэлхийн хамгийн үнэтэй байшин болох Беверли-хаус харшийг дуудлага худалдаанд тавьсан тухай Америкийн хэвлэл мэдээллийн хэрэгслүүд мэдээлжээ. 2007 онд харшийг 165 сая доллароор худалдан авч байсан боловч хямралын жилүүдэд үнийнхээ 70 сая долларыг алдаж, одоо 95 сая доллароор худалдах аж. Дэлхийн хамгийн үнэтэй байшинг эзэмшигч, үл хөдлөх хөрөнгийн зах зээлийн магнат Леонард Росс дампуурлаа зарласан учир байшингаа дуудлага худалдаанд тавьсан байна. Гоёмсог 6 өрөө, унтлагын 29 өрөө, гурван усан сантай байшинд дарс хадгалах зоорь, эмчилгээний усан сан, шөнийн клуб гээд бүх зүйл байдаг аж. Уран барилгачин Гордон Кауфманы шилдэг бүтээл болсон энэ байшинд Цагаан ордны ирээдүйн эзэн Жон, Жаклин Кеннеди нар бал сараа өнгөрүүлж байжээ. Түүнээс гадна «Загалмайлсан эцэг», «Бие хамгаалагч» зэрэг киноны зураг авалтад орж, кино дэлгэцэнд ч мөнхөрсөн байна.

Холбоотой мэдээ