Барилгын зураг төсөл зохиогчдын холбооны гишүүн байгууллагуудын барилга бүтээцийн залуу инженерүүдийн хүрээнд  зураг төслийн төлөвлөлт, тооцооны  чанарыг сайжруулах, конструктор инженерүүдийн  мэргэжлийн ур чадварыг дээшлүүлэх, дадлага туршлагыг нэмэгдүүлэх зорилготойгоор “Бид Монгол улсын бүтээн байгуулагчид” уриан дор барилгын бүтээцийн тооцооны “ЛИРА-9,6 программын тооцоо” сэдэвт уралдаан 2011 оны 4 дүгээр сарын 09-10 ын өдрүүдэд  ШУТИС-БИАС дээр  явагдаж өнгөрлөө.

Уралдаанд оролцогчид эхний үеийн шалгаруулалтад Лира программын  онолын түвшингээр  тестээр  шалгалт өгч, 2 дахь үеийн шалгаруулалтад Уркайн НИИАС барилгын институтээс шалгалтын өглөө цахим шуудангаар ирүүлсэн өгөгдлөөр Лира 9.6 программаар тооцож эцсийн үр дүнгийн  боловсруулалт хийж  эхний 3-н байрын төлөө өрсөлдсөн юм.

Тус уралдааны шалгалтын комиссын бүрэлдэхүүнд Э.Ганзориг-Доктор, ШУТИС-БИАС-ийн барилгын бүтээцийн професорын багын дэд професор, МБИХолбооны ерөнхийлөгч, Ж.Базарсад- ШУТИС-БИАС-ийн барилгын бүтээцийн професорын багын багш, магистр, М.Амаржаргал-Монгол улсын зөвлөх инженер, техникийн ухааны магистр,  зураг төслийн Марс констракшн ХХК-ийн захирал,   Г.Сарантуяа- Монгол улсын зөвлөх инженер, техникийн ухааны магистр, БЗТЗХолбооны гүйцэтгэх захирал, Д.Барсбаатар-Мэргэшсэн инженер, зураг төслийн ВТ ХХК-ийн барилгын инженер, Г.Баярцэцэг- ССХОБЗАлбаны мэргэжилтэн  нар оролцож уралдааныг дүгнэж ажиллаа.

Уралдааны тэргүүн байранд зураг төслийн  “Ган Харш” ХХК-ийн инженер Д.Адьяадорж шалгарч Лира-9.6 программыг албан ёсны түлхүүрын хамт, дэд байранд зураг төслийн “Өрнөл проект” ХХК-ийн барилгын инженер Д.Төрболд шалгарч “Иж бүрэн компьютер”,  гутаар байранд зураг төслийн “Хатанбаатар” ХХК-ийн барилгын инженер Э.Энхбаяр  шалгарч “Хард диск” –аар тус тус шагнууллаа.

Тус уралдаанд бүх  оролцогч залуу конструктор инженерүүдийн идэвхи чармайлт, мэргэжлийн ур чадварыг үнэлж барилгын салбарын мэргэжилтний тасралтгүй мэргэжил дээшлүүлэлтийг үнэлэхэд 3 багц  цаг хангасан батламж олголоо.

Ерөнхий зохион байгуулагч: Барилгын зураг төсөл зохиогчдын холбоо, тооцооны Лира программын албан ёсны дистрибьютер, зураг төслийн “ВТ” ХХК.

Хамтран зохион байгуулагчид: Зам тээвэр, барилга, хот байгуулалтын яамны Сургалт судалгаа, хөрөнгө оруулалт, барилга захиалагчийн алба, ШУТИС-ийн Барилга инженер архитектурын сургууль, Монголын барилгын инженерүүдийн холбоо  хамтран зохион байгууллаа.

 Залуу инженерүүдийг дэмжигч Ерөнхйи ивээн тэтгэгч байгууллага:  “ВТ” ХХК,

Ивээн тэтгэгч:   “MCS проперти” ХХК, “Нью соник” ХХК

БАРИЛГЫН  ЗУРАГ  ТӨСӨЛ ЗОХИОГЧДЫН  ХОЛБОО