"BIM FORUM 2022" боллоо
Барилга байгууламжийн зураг төслийн чанарыг сайжруулах талаар БХБЯ болон холбогдох мэргэжлийн байгууллагууд үе шаттай арга хэмжээг авч хэрэгжүүлж байна. Үүний нэг нь “ВIM FORUM-2022” буюу барилгын мэдээлэлтэй загварчлалыг нэвтрүүлэх энэхүү форум юм.
“Төрөөс барилгын салбарын талаар баримтлах бодлого”-д барилга байгууламжийн зураг төсөл боловсруулахад тогтвортой, ухаалаг, ногоон хөгжлийн зарчмыг тусган, олон улсын түвшинд хүргэх зорилтыг дэвшүүлж, Барилгын төслийн удирдлага, мэдээллийн нэгдсэн систем “BIM” нэвтрүүлэх талаар тусгасан байдаг. “BIM” нэвтрүүлснээр барилгын салбар бүрэн цахимжиж, төсөвт өртөг, байгаль орчин, эрчим хүчний үр ашиг зэргийг харгалзан илүү оновчтой, зөв төлөвлөлт, угсралт, материал сонголтыг хийх нөхцөл бүрдэх юм.
Форумыг Барилга, хот байгуулалтын дэд сайд Э.Золбоо нээж, үг хэллээ. Тэрбээр:
БИМ гэдэг дотоод сүлжээ салбараараа хөдөлж байж хэрэгжих онцлогтой зүйл. Салбарын бүх талын оролцоо жигд байж бодит байдлаар ажиллах систем. Зургийн компаниуд мэдээлэлээ БИМ сүлжээрүүгээ оруулаад байдаг нөгөө талдаа захиалагч юмуу, гүйцэтгэгч тал нь хэрэглэхгүй бол үр дүнгээ өгөхгүй ээ л гэсэн үг. Тийм учраас бид бүхэн хэд хэдэн салбар хэлэлцүүлгүүдийг эхлээд хийе түүний дараа салбар хуралдаануудыг нэгтгэсэн үндсэн хэлэцүүлэг хийгээд цаашид хэрхэх хуралдааны шийдвэрээ ажлын хэсгээрээ дамжуулаад хэрэгжүүлье гэж төлөвлөн ажиллаж байна. Цаашид яамны зүгээс аж ахуй нэгжүүдэд “BIM” нэвтрүүлэхэд онцгойлон анхаарч, барилгын салбарын цахим засаглалд шилжих бодлого, үйл ажиллагааг үе шаттайгаар хэрэгжүүлнэ. Ингэснээр энэ системийг нэвтрүүлж, салбар маань шинэ шатанд гарна. Бидний өдөр тутам тулгардаг янз бүрийн асуудлуудыг шийдвэрлэхэд гол дөхөм болно. Мөн цаг хугацаа хэмнэнэ, мөнгө хэмнэнэ, дээр нь барилга чанартай болох давуу талууд бүрдэнэ гэлээ.
Форумд Барилга, хот байгуулалтын яам, Билдингсмарт Монгол ТББ, Барилгын салбарын төрийн бус байгууллагуудын төлөөлөл болох Монголын барилгын үндэсний ассоциаци, Барилгачдын нэгдсэн холбоо, Материал үйлдвэрлэгчдийн холбоо, Барилгын гүйцэтгэгчдийн холбоо, Барилгын төсөвчдийн холбоо зэрэг байгууллагуудын төлөөллүүд оролцлоо.
Форумаар "БИМ дэмжигч программын өнөөгийн байдал, хэрэглээ", "БИМ программаар хийсэн зураг төслийн туршлага", "Бим ба хиймэл оюун ухаан", "Бим ба бизнесс процесс" зэрэг илтгэлүүд тавигдаж, асуулт хариулт болон хэлэлцүүлэг өрнөв.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.