Худалдан авагч, үйлчлүүлэгчдэдээ хамгийн ойр очих цөөхөн үр дүнтэй сувгуудын нэг бол үзэсгэлэн, яармагт оролцох юм. Тухайн үзэсгэлэнд зориулж талбайгаа хэрхэн тохижуулах, зохион байгуулах талаар судлах, энэ талын мэдлэгтэй болох нь ярвигтай ажил боловч гаргасан санхүү, цаг хугацаагаа үр дүнтэйгээр ашиглах боломжтой юм шүү.  

Энэхүү бичвэрийг уншсаны дараа та үзэсгэлэнгийн талбайгаа зөв зохион байгуулах нь ямар ач холбогдолтойг мэдэж авсан байх болно. 

Хамгийн түрүүнд таны үзэсгэлэнд орж буй зорилгоос эхэлнэ. Ямар зорилгоор үзэсгэлэнд оролцож байгаагаас хамаараад талбайгаа хаана сонгох вэ гэдэг асуулт тулгарна. Үйлчлүүлэгчидтэй ойрхон харилцаж, арай нам гүм байдалд яриа өрнүүлэх үү эсвэл олон хүний нүдэнд өртөж, үзүүлэх тоглолт хийн шуугиулах уу гэдгээ тодорхойлчихвол үндсэндээ хаана байрлалтай талбай сонгох нь тодорхой болно. 

Мөн сонгосон талбайгаа бүтээлч байдлаар олон нийтийн анхаарал татахуйц засаж чадвал танай сурталчилгааг сошиал болон бусад олон хэвлэл мэдээллийн сувгууд үнэгүй рекламдаад өгдөг цаг үе ирсэн байна. 

Тиймээс эхний ээлжид үйлчлүүлэгчдийн анхаарлыг татаж, танай талбайруу хошуурахуйцаар талбайгаа тохижуулахын тулд заавал анхаарч үзэх ёстой зөвлөмжүүдийг хүргэж байна. 

1. Бусдаас онцгой байхаар төлөвлө

Олон улсын томоохон үзэсгэлэн, тэр ч байтугай орон нутгийн жижиг гэр ахуйн барааны үзэсгэлэн байсан ч үйлчлүүлэгчдийн анхаарлыг татах, нүдэнд нь өртөх хамгийн сайн арга бол талбайгаа бусдаас өөрөөр, олны дундаас ялгарах байдлаар тохижуулах явдал юм. Магадгүй үзэсгэлэн худалдаа болгонд бүтээлч байдлаар талбай тохижуулах нь өндөр зардалтай гэж үзвэл нэг удаа бүтээлч санаа, чанартай гүйцэтгэл сонгоод давтан хэрэглэж ч болох юм. Энэ аргыг үзэсгэлэн худалдааны байнгын ороолцогч, томоохон тоглогчид нийтлэг ашигладаг. 

Үзэсгэлэн худалдааны аваргуудын хувьд тэд хоёр том зүйлийг заавал хэрэгжүүлдэг нэг зүйл нь талбай дээр нь зочлон ирсэн болон нэрийн хуудсаа үлдээсэн сонирхогч хүмүүстээ үнэ төлбөргүй бэлэг болон янз бүрийн тэмцээн уралдаан зохион байгуулж, ялагчид нь мөн үнэ бүхий шагнал өгдөг. Тэмцээн уралдаан бол хүмүүсийг татах асар хүчтэй зэвсэг юм

2. Чанартай бөгөөд анхаарал татахуйц сурталчилгааны бүтээгдэхүүн ашигла

Танай үзэсгэлэнгийн талбай дээр тараахаар сонгосон сурталчилгааны зүйлс нь үйлчлүүлэгчид таны бүтээгдэхүүн үйлчилгээ, танай байгууллагад хандах хандлагад нөлөөлнө. 

Гэхдээ хажуугаар өнгөрч буй хүн бүхэнд тарааж буй үнэгүй үзэг бэлэглэхийг хэлээгүй ба яг танай талбайд зочлон ирж, танай бүтээгдэхүүн үйлчилгээг сонирхож, мэдээллээ үлдээж буй хүмүүст өгч буй зүйлийг хэлж байгаа юм. Таны санал болгож буй бүтээгдэхүүн үйлчилгээ шиг өндөр чанартай, өвөрмөц гэдгийг илтгэх зүйлийг сонгоорой. 

3. Асуулт хариултын тэмцээн, хөгжөөнт тоглоом зохион байгуул

Өрсөлдөөн ихтэй үзэсгэлэнгийн танхимд өөрийн талбайд хүмүүсийг уяж тогтоон, анхаарлыг нь татна гэдэг амар ажил биш. Тиймээс зочдын анхаарлыг татах хамгийн шилдэг арга нь бэлэг сэлт, уралдаан тэмцээн байх болно. Салбартай холбоотой хөгжөөнт тоглоом, сугалаа зэргийг сонирхолтой хэлбэрээр зохион байгуулах нь зочид танай талбайруу хошуурах нэг гол шалтгаан болно. 

Мөн асуулт хариултын тэмцээн үр дүнтэй байдаг ба үйлчлүүлэгч, зочдынхоо салбарын мэдлэгийг сориод авахад юу нь болохгүй гэж. Шагнал нь тор, бэлгийн карт, хөнгөлөлтийн эрх гэх мэт юу ч байж болох юм.

4. Өөрийн бүтээгдэхүүнээ дэлгэн үзүүл

Та үзэсгэлэнд оролцохын тулд багагүй мөнгө төлж байгаа нь тодорхой. Гэхдээ танд мөн худалдан авагч үйлчлүүлэгчдэдээ санал болгох чанартай, үнэ цэнэтэй, өвөрмөц бүтээгдэхүүн, үйлчилгээ байгаа гэж итгэж байна. Үзэсгэлэнд зориулан бэлтгэсэн танай талбайн хажуугаар өнгөрч буй хүмүүс ямар нэгэн зорилготой, хэрэгтэй зүйлээ хайж яваа хүмүүс гэдэг нь ойлгомжтой тул танай бүтээгдэхүүн үйлчилгээ гол бай нь болж яагаад болохгүй гэж. Үзэгчид хэдий чинээ хөгжөөнт тоглоом, асуулт хариултын тэмцээнд тань их оролцох тусам дараа нь танайхыг илүү сайн санах болно.

Хэрэв та талбай дээрээ ашиглах үзүүлэн макет, таблет, бүтээгдэхүүний дээжүүд зэргээ талбай дотроо хэт их чихсэн байдлаар биш тохиромжтой хэмжээгээр бэлддэг бол  санаа зовох зүйлгүй юм. Хэрэв та вэб программ зэрэг биет бус бүтээгдэхүүн, үйлчилгээг санал болгож байгаа бол эвхэгддэг баннер,  дэлгэц гэх мэт хэлбэрээр бүтээгдэхүүний мэдээллийг харуулах нь хамгийн сайн арга юм.

5. Бусад үзэсгэлэнд оролцогчидтойгоо уулзалт хийж, мэдээлэл цуглуул

Та өөрийн талбайг тохижуулж дууссаны дараа үзэсгэлэнгийн танхимыг нэг тойроод үзэсгэлэнгийн бусад оролцогчидтой заавал уулзаж тэд ямар бараа бүтээгдэхүүн санал болгож байгааг олж мэдээрэй. Зөвхөн үзэсгэлэн үзэж байгаа зочид, харилцагчдаас гадна үзэсгэлэнгийн оролцогчид дотор ч таны томоохон худалдан авагч, урт хугацаанд үргэлжлэх харилцагч, үйлчлүүлэгч  байх өндөр магадлал бий. 

6. Үзэсгэлэнгийн талбайдаа уулзалтын булан төлөвлөх 

Худалдан авагч, үйлчлүүлэгчдээ зориулж талбай дотроо марталгүй төлөвлөх ёстой чухал хэсэг бол тухтай уулзалт хийх орон зайг төлөвлөх явдал юм. Уулзалтын булангаа бэлдсэн бол чухал гэж үзсэн хүнд мэдээлэл өгч, түүнтэй уулзалт хийх ЗАПАС хүн байгаа эсэхээ нэг хараарай. Магадгүй та талбай дээр тэмцээн зохион байгуулж эсвэл гарын бэлгээ тарааж байтал чухал үйлчлүүлэгчийг анзааралгүй явуулах магадлалтайг санаарай.  Үйлчлүүлэгчид тань юу хүсэж, юу хэлж байгааг анхааралтай сонсож, тэмдэглэл хөтлөөрэй. Ингэснээр та салбарын талаар чухал мэдээлэл мөн өөрийнхөө бүтээгдэхүүн үйлчилгээний талаарх сэтгэгдлийг олж мэдэх боломжтой.

Нэг анхаарах зүйл нь асуултаар булах биш зүгээр л энгийн яриа өрнүүлж, үйлчлүүлэгчээс тэдний хэрэгцээг нь тандан яриул. Ингэснээр танай компанийн хэтийн төлөвт хэрэгтэй эргэлт хийхүйц чухал санааг ч олж авах боломжтой. 

Ууттай бэлэгтэй, бүтээгдэхүүний жижиг үзүүлэн бэлэглэсэн байсан ч тэдэнд дараа нь өөрийн бараа үйлчилгээний дэлгэрэнгүй мэдээллийг багтаасан танилцуулга, товхимол зэргийг онлайнаар болон бусад хэлбэрээр илгээхийг санал болгож зөвшөөрлийг нь авснаар бусдаас ялгарч, үзэсгэлэнгийн дараа тэдэнд мартагдахгүй, үзэсгэлэнд хүрэлцэн ирсэн олон үйлчлүүлэгч дунд төөрөхгүй байх боломжийг олгоно.

7. Цуглуулсан и-мэйлийн жагсаалтаа цэгцэлж, эрэмбэл

Танай үзэсгэлэнгийн талбайд мэдээлэл цуглуулах, бүртгэл хийж оролцогчдын жагсаалтыг хийх боломжтой эсэхийг нэг шалгаарай. Хэрэв үгүй бол талбай дээрээ хүмүүсийн нэр, утас, цахим шуудан, ямар төрлийн зүйл сонирхож байгаагаа үлдээх зорилготой асуулгын хуудас бэлтгэж тавиарай. 

Энэ нь бүх үйлчлүүлэгчид талбайгаар тухтай зочилж амжаагүй ч мэдээлэл авахыг хүссэн хүмүүст и-мэйлээр мэдээлэл илгээх боломжийг олгоно. Үүнийг хийх хамгийн сайн аргуудын нэг бол нэрийн хуудасныхаа оронд бал өгөх явдал юм.

8. Үзэсгэлэнгийн үеэр олон нийтийн сүлжээнд идэвхтэй байгаарай

Сошиал медиаг уламжлалт үзэсгэлэнгийн талбайтайгаа хослуулан ашигла. Энэ нь амжилттай маркетинг хийх гайхалтай арга юм. Үзэсгэлэн худалдаагаа сошиал медиатай нэгтгэснээр та ойрын болон холын хэрэглэгчдийг татах ба тэдний оролцоог нэмэгдүүлэх болно. Олон нийтийн мэдээллийн хэрэгсэл нь олон жирийн лангууг анхаарлын төвд авчирч, харилцагчдын хамрах хүрээг тэлэх шилдэг арга юм. 

Үзэсгэлэнгийн үеэр болон үзэсгэлэн болох хугацааг угтаж FB, Twitter болон бусад олон нийтийн сувгийг ашиглан өөрийн сурвалжлага, бичлэгийг компанийн нэр, бүтээгдэхүүний хаштаг ашиглан  цацаарай. Мөн блог, нийтлэл бичиж цацах нь танай талбайгаар зочилсон болон зочилж амжаагүй хүмүүст зориулан мэдээлэл хүргэх маш сайн эх сурвалж болно.

9. Үзэсгэлэнд зэрэгцэн оролцож буй өрсөлдөгчөө ажиглаарай 

Үзэсгэлэн худалдаанд олон төрлийн борлуулагчид өөр өөрийн зорилтот сувагт чиглэсэн төлөвлөгөө, үйл ажиллагаатайгаар бэлдэж оролцдог. Гэхдээ тантай ижил төрлийн зорилтот бүлэгт чиглэн оролцож буй борлуулагч, нийлүүлэгч байгаа нь тодорхой.  

Тиймээс ижил төрлийн үйл ажиллагаа, бүтээгдэхүүнтэй компанийн талбайд анхаарал хандуулж,  түүгээр зочлож буй үйлчлүүлэгч, боломжит худалдан авагчдыг ажиглахын зэрэгцээ тодорхой хэмжээнд судалгаа хийх ч боломж бий. Гэхдээ та дээрх мэдээллээс шууд өрсөлдөөн үүсгэнэ гэж ойлгож болохгүй ба хоорондоо мэдээллээ солилцох зэргээр маш сайн хамтын ажиллагаа үүсгэж болох санаа юм. 

10. Шилдэг үйлчлүүлэгчдээ үзэсгэлэнгийн талбайдаа уриарай 

Өмнөх худалдан авагчийг дахин худалдан авалтад ятгах нь шинэ худалдан авагчийг анх удаа худалдан авалт хийлгэхээс хамаагүй хялбар. Тиймээс та шилдэг үйлчлүүлэгчдээ зориулан бэлэг бэлдэх төсөв гаргаж, тусгайлан талбайдаа уриарай. 

Ингэснээр  баталгаатай борлуулалттай болохоос гадна танилын хүрээгээр дамжин ирэх найдвартай шинэ худалдан авагч, үйлчлүүлэгчидтэй ч болох боломжтой юм.