Барилгын салбарын 2021 оны онцлох үйл явдлууд

Барилгын салбарын 2021 оны онцлох үйл явдлууд

Барилгын үйл ажиллагааны тусгай зөвшөөрөл цахимжлаа

Барилгын салбарын үйл ажиллагаа үе шаттайгаар цахимжиж 2021 оны 1 дүгээр сараас Газар зохион байгуулалт, газрын кадастрын үйл ажиллагаа эрхлэх мэргэжлийн байгууллагын эрх олгох болон Геодези, зураг зүйн үйлдвэрлэл үйлчилгээ эрхлэх тусгай зөвшөөрөл олгох үйл ажиллагаа цахим хэлбэрт шилжээд байсан бол өнгөрсөн 7 дугаар сарын 1-ний өдрөөс эхлэн барилгын үйл ажиллагааны тусгай зөвшөөрөл олгох үйл ажиллагаа мөн бүрэн цахим хэлбэрээр явагдаж эхлэлээ. 

Энэ хүрээнд барилгын салбарын инженер техникийн ажилтны болон тусгай зөвшөөрөлтэй аж ахуйн нэгж, байгууллагын мэдээллийн цахим системийн програм хангамжийг хөгжүүлж, барилгын үйл ажиллагааны тусгай зөвшөөрөлтэй холбоотой дараах үйлчилгээнүүдийг цахим хэлбэрт шилжүүлээд байна. 

Үүнд, Барилга байгууламжийн зураг төсөл боловсруулах тусгай зөвшөөрөл; Барилга угсралтын ажил гүйцэтгэх тусгай зөвшөөрөл; Өргөх байгууламж түүний эд ангийн үйлдвэрлэл, угсралт, засвар үйлчилгээ эрхлэх тусгай зөвшөөрөл. Энэхүү систем нь төрийн мэдээлэл солилцох (ХУР) систем, Танилт нэвтрэлтийн нэгдсэн (ДАН) системүүдтэй холбогдсоноор тухайн иргэн, хуулийн этгээдээс ямар нэг лавлагаа, тодорхойлолт шаардахгүйгээр үйлчилгээ үзүүлэх боломжийг бүрдүүлж өгснөөрөө онцлог юм. 

Ийнхүү тусгай зөвшөөрөл олгох үйл ажиллагаа цахимжсанаар барилгын үйл ажиллагааны тусгай зөвшөөрөлтэй холбоотой хүсэлт гаргах, хянах шийдвэрлэх үйл ажиллагаа нь цаасан материал бүрдүүлэлт ихтэй, ирүүлсэн мэдээллийн үнэн зөв байдлыг нягтлах, тодруулах, лавлагаа авах гэх мэт хүний оролцоо ихтэй, цаг хугацаа шаардсан үйл ажиллагаатайгаас гадна мэдээллийн үнэн зөв, баталгаат байдал хангалтгүй, бусад мэдээллийн сангийн цахим системүүдтэй холбогдох боломжгүй зэрэг асуудлуудыг бүрэн шийдэж өгсөн. 

Барилгын салбарын 95 жилийн ой тохиож Шилдэг ААН-үүд шалгарлаа

Шинэ үеийн барилгын салбар үүсэж хөгжсөний 95 жилийн ой энэ өдрүүдэд тохиож, түүхийг бичилцэж яваа бүтээн байгуулалтын салбарынхан жил бүрийн есдүгээр сарын эхний долоо хоногийн сүүлийн өдрүүдийг “Барилгачдын баяр” - ын өдөр болгон тэмдэглэн ирсэн.

“Барилгачдын баяр”-аар салбарын шилдэг аж ахуйн нэгжүүдийг тодруулж, "Барилагчдын талбай"-д бүтэн жилийн хугацаанд тугийг нь мандуулж, алдаршуулдаг уламжлалтай. Энэ жил цар тахлын улмаас цахим байдлаар 2021 оны шилдэг 12 аж ахуйн нэгжийг шалгаруулж, талбайд туг мандуулах ёслолын арга хэмжээг халдвар хамгааллын дэглэмийг баримталж, аж ахуйн нэгжүүдийн төлөөллийг оролцуулан шагналыг гардуулсан юм.

Барилга угсралтын чиглэлээр "Химон конштракшн" ХХК, "Томобюлдинг”ХХК, "Макс өргөө" ХХК, Инженерийн шугам сүлжээний чиглэлээр "Билгүүн-од" ХХК, Барилгын материал үйлдвэрлэлийн чиглэлээр "Мон цемент билдинг материалс" ХХК, "Байгууламж Од" ХХК, “МСМ групп” ХХК, Зураг төслийн чиглэлээр “Барилга байгууламж” ХХК, “Урбан девелопмент консалтинг групп” ХХК “Хайдродизайн прожект”ХХК, “Эрдэнэт үйлдвэр” “Ганбиж” ХХК тус тус шалгарав.

Архитектурын салбар үүсэж хөгжсөний 65 жилийн ой боллоо


1956 оны 10 дугаар сарын 23-ны өдрийн БНМАУ-ын Сайд нарын зөвлөлийн 545 дугаар тогтоолын ХҮ дугаар зүйлд “Монголын Урчуудын Эвлэлийн дэргэд барилга ба барилгын урлагчийн бүлгийг байгуулсугай” гэж заасныг үндэслэн ууган архитектор Б.Чимэд, Б.Дамбийням, А.Хишигт нарын санаачилгаар “Монголын Урчуудын Эвлэл”-ийн дэргэд архитектор, инженер, зургийн техникч, урчуудын 31 гишүүнтэй бүлэг байгуулагдаж, даргаар нь ууган архитектор Б.Чимэдийг сонгосноор “Монголын Архитекторуудын Эвлэл” үйл ажиллагаагаа эхэлсэн. Харин энэ жил МАЭ-ийн 65 жилийн ой тохиож,  "Хүндэтгэлийн чуулган" арга хэмжээнд /2021.10.25/ Барилга, хот байгуулалтын Дэд сайд Э.Золбоо, Соёлын Дэд сайд М. Батбаяр, БХБЯ-ны Хот байгуулалт, газрын харилцааны бодлогын хэрэгжилтийг зохицуулах газрын дарга Ц.Баярбат, Нийслэлийн Ерөнхий архитектор З.Тулга болон бусад албаныхан оролцлоо. 

Монголын Барилгын Инженерүүдийн Холбооны 25 жилийн ой тохиов

Энэ жил Монголын Барилгын Инженерүүдийн Холбоо /МБИХ/- ны 25 жилийн ой тохиож байгаа бөгөөд энэ хүрээнд 11 дүгээр Их хурлыг 11 дүгээр сарын 06 - ны өдөр зохион байгуулж, ерөнхийлөгч, хяналтын зөвлөл, удирдах зөвлөлийн гишүүдийг шинэчлэн сонгоод байна. 

2021~2024 онуудад ажиллах МБИХ - ны ерөнхийлөгчөөр А. Ариунболд, Хяналтын зөвлөлийн даргаар Э. Батчимэг нар сонгогдлоо. Харин Удирдах зөвлөл нь 21 гишүүний бүрэлдэхүүнтэй байдаг бөгөөд холбооны дүрмийн дагуу 21 гишүүний 11 нь улиран ажиллаж, 10 хүнийг Их хурлаар сонгоод байна. 

Нийтийн аж ахуйн салбарын 30 жилийн ой тохиолоо

 


Орон сууц, нийтийн аж ахуйн салбарын түүхт 90 жилийн ой энэ жил тохиож танхим болон цахим хэлбэрийг хослуулан, 200 гаруй хүний бүрэлдэхүүнтэй /2021.10.08/ тэмдэглэн өнгөрүүллээ. Орон сууц, нийтийн аж ахуйн салбарт залуу насныхаа хүч хөдөлмөр, авьяас чадвараа гаргаж олон жил үр бүтээлтэй ажилласан зарим ахмадуудыг Төрийн дээд одон медалиар шагналаа. 

 

Хөдөлмөрийн гавьяаны улаан тугийн одонгоор Хөвсгөл, Дундговь аймгийн НАА-н байгууллагын дарга асан салбартаа 37 жил ажилласан Зэвэгийн Бэгзжав, Баянхонгор аймагт 33 жил ажилласан Ванчигсүрэнгийн Наранцэцэг нар шагнагдсан бол Алтангадас одонгоор Төв чандмань ДЭХГ-ын гүйцэтгэх захиралЦэрэндоржийн Батсүх, Ганбик ХХК гүйцэтгэх захирал 31 жил ажилласан Сүхээгийн Гантөмөр нар, Хөдөлмөрийн хүндэт медалиар Хэний Ус ХХК-ийн засварчинаар 20 жил ажилласан Бадраагийн Бат-Эрдэнэ,  Смарт план ХХК гүйцэтгэх захирал Балжиннямын Жавзандулам, Нийтийн аж ахуйн тэргүүний ажилтан цол тэмдэгээр Ус сувийн удирдах газрын машинист Батхүүгийн Пүрэвдэлгэр, БХБЯ-ны талархалаар Монголын нийтийн аж ахуйн үйлчилгээний холбоо ТББ-н Б.Пүрэвжав тус тус шагнагдсан байна. 

 

2021 оны Шилдэг барилгууд шалгарлаа

"Хот Байгуулалт Хөгжлийн Танхим"-аас жил бүр "Шилдэг барилга"-ыг шалгаруулдаг бөгөөд энэ жилийн хувьд Монгол Улсад барилгын салбар үүсч хөгжсөний 95 жилийн ой, “Барилгачдын өдөр”-ийг тохиолдуулан 17 дахь жилдээ ШИЛДЭГ БАРИЛГА -д ӨРГӨМЖЛӨХ ЁСЛОЛЫН ҮЙЛ АЖИЛЛАГААГ 2021 оны есдүгээр сарын 03-нд зохион байгуулсан юм.


Шилдэг барилгаар Токио таун, Парк вью хотхон, Парк од молл, Хүннү тауэр, Фүүд сити хайфермаркет төв, Рояал Тауэр, Сонгино хайрхан дүүргийн жишиг нэгдсэн эмнэлэг, Хууль зүй дотоод хэргийн яам, Нийслэлийн ерөнхий боловсролын 130-р сургууль, MILLNIUM PLAZA, Ривер вилла хотхон, Кайду молл, Мишээл войкинг стрийт, Сити террас зэрэг барилгууд шалгарлаа. 


Барилга МН-ийн онцлох үйл явдлууд


“BARILGA EXPO 2021” үзэсгэлэнгийн үеэр нийт 58 тэрбумын борлуулалт хийгджээ

 

Жил бүрийн Барилгачдын баярыг угтан зохион байгуулагддаг салбарын томоохон арга хэмжээ болох “BARILGA EXPO 2021” үзэсгэлэн 14 дэх жилдээ 2021 оны 9 дүгээр сарын 9-өөс 12-ны өдрүүдэд “Мишээл экспо төв”- ийн үзэсгэлэнгийн тахимд холбогдох төрийн байгууллагын зөвшөөрлөөр цар тахлын үеийн өндөр хамгаалалт, ариутгалтайгаар амжилттай зохион байгуулагдсан. 


 

Үзэсгэлэнд барилгын материал, шинэ орон сууц, амины орон сууцны чиглэлээр үйл ажиллагаа явуулдаг 120 орчим компаниуд оролцож, 4 өдрийн турш үйл ажиллагаа, төсөл хөтөлбөр, бүтээгдэхүүнээ танилцуулсан бөгөөд үзэсгэлэнд оролцогч компаниудаас авсан судалгаагаар үзэсгэлэнгийн өдрүүдэд нийт 58 тэрбум төгрөгийн борлуулалт хийгдсэн байна. 

 

Уламжлал ёсоор үзэсгэлэнгийн сүүлийн өдөр буюу 9 дүгээр сарын 12-ны өдөр шагнал гардуулах ёслолын үйл ажиллагаа болж шилдгүүдийг 8 номинацын дагуу шалгарууллаа. 

 

Шилдгийн шилдэг гранприар “Эрхэт Монгол” группийн “Grand Marshal Luxury Villas”, Шилдэг төсөл хэрэгжүүлэгчээр “Тэсо Пропертис” ХХК, Шилдэг үйлдвэрлэгчээр    “Монцемент Билдинг Материалс” ХХК,   Шилдэг ханган нийлүүлэгчээр Сайхан төмөрт ХХК,  Дэвшилтэт технологи нэвтрүүлэгчээр  “Тесо пропертис” ХХК-ийн хэрэгжүүлж буй ACTIVE GARDEN RESIDENCE мөн "Универсум групп" ХХК, Шилдэг шинэ орон сууцаар "Монкон констракшн" ХХК - ийн хэрэгжүүлж буй "360 Mandala" residential tower, Шилдэг нийгмийн хариуцлагатай компаниар   Барилгын салбарт томоохон төслүүдийг амжилттай хэрэгжүүлж буй "Эрхэт Монгол групп” ХХК нар тус тус шалгарсан юм. 

 

Шинэ орон сууцны судалгааг хийж гүйцэтгэв


Улаанбаатар хотод баригдаж байгаа шинэ орон сууцны судалгаа, тооллогыг Барилгын хөгжлийн төв болон Барилга МН хамтран 2021 оны 8 дугаар сарын 11 - 15-ны өдрүүдэд тус байгууллагын судалгааны ажилтнууд дүүрэг тус бүрээр явж, төслүүдийн талаарх мэдээллийг биечлэн авах зохион байгуулсан билээ. Шинэ орон сууцны төсөл хэрэгжүүлэгчид уг судалгаанд хамрагдсанаар төслийн талаарх мэдээллээ зорилтот хэрэглэгчдэд хүргэж борлуулалтаа өсгөх, төрийн байгууллагаас албан ёсоор зарлаж байгаа орон сууцнуудын жагсаалтад бичигдэх гэх мэт олон талын ач холбогдолтой юм.


Уг судалгаагаар

  1. Улаанбаатар хотод шинээр хэрэгжиж байгаа нийт төслүүдийн албан ёсны тоо, үнэ ханш, байршлуудын талаарх нэгдсэн дата мэдээллийн санг шинэчилж, олон нийтэд хүргэх, 
  2. Цаашид ипотекийн зээлээр борлуулагдах орон сууцны нийлүүлэлт, борлуулалтын үнэ, төслүүдийн хэрэгжилтийн явцын судалгааг гаргаж, прогноз хийх, 
  3. Уг прогноз дээр тулгуурлан орон сууцны эрэлт нийлүүлэлтийн тэнцвэрийг барих бодлогыг хэрэгжүүлэх зорилт тавьсан болно. 

Нийт шинэ орон сууцны захиалга авч буй 240 төсөл судалгаанд хамрагдсан. Амины орон сууцны захиалга авч буй 112 төслийг судалгаанд хамруулсан. 240 төслийн ашиглалтад орсон 13,560 айл, 2021- 2023 онд ашиглалтад орох захиалга авч буй 32,357 айлын орон сууц байгаагаас борлуулагдаагүй орон сууц 27,153 айлын орон сууц байгааг судалгаагаар гаргасан юм.

 

“BARILGA BILLIARD 2021” снүүкер биллиардын тэмцээн зохион байгуулагдлаа

Барилгын салбарт үйл ажиллагаа явуулж байгаа компани, аж ахуй нэгж байгууллагуудын удирдлагуудын дунд зохион байгуулагддаг “BARILGA BILLIARD 2021” снүүкер биллиардын тэмцээн 11 дэх жилдээ  “Elit snooker club”-д  11 дүгээр сарын 5-ны өдөр амжилттай болж, аваргууд тодорлоо. 

Энэхүү тэмцээнд эх орны бүтээн байгуулалтын салбарт хүчин зүтгэж буй компаниудын удирдах ажилтнууд оролцдогоороо онцлог бөгөөд энэ жил 24 тамирчин оролцож, өрсөлдлөө. Тэмцээний тэргүүн байранд “Ар гурван хэц” ХХК Б.Алтангэрэл, хоёрдугаар байранд “Remax Absolute” П.Буянтөгс, гутгаар байранд “Марч Эй Си Энд Хэйтинг” ХХК Т.Отгонбаяр  нар шалгарсан юм. 

Тэргүүн байранд “Ар гурван хэц” ХХК Б.Алтангэрэл, Хоёрдугаар байранд “Remax Absolute” П.Буянтөгс, Гутгаар байранд “Марч Эй Си Энд Хэйтинг” ХХК Т.Отгонбаяр тодорсон юм.  

Тэмцээний Ерөнхий зохион байгуулагчаар Барилга МН, Ивээн тэтгэгчээр   “TRG констракшн” ХХК, “Elit snooker club” ажиллаа.



СЭТГЭГДЭЛ БИЧИХ

АНХААРУУЛГА:
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ