Монгол инженерүүд цаг уурын нөхцөлд тохирхуйц цэвэрлэх байгууламжийн шийдэл гаргаж чадлаа

Монгол инженерүүд цаг уурын нөхцөлд тохирхуйц цэвэрлэх байгууламжийн шийдэл гаргаж чадлаа

Хэнтий аймгийн Чингис хаан хотын цэвэрлэх байгууламжийн барилга угсралтын ажил дуусаж, өнөөдөр албан ёсоор нээлтээ хийлээ.

БХБЯ-ны нийт есөн аймгийн төвд цэвэрлэх байгууламж барих ажлыг Азийн Хөгжлийн Банкны зээлийн санхүүжилттэй хэрэгжиж байгаа “Зүүн өмнөд говийн хот байгуулалт, хилийн ойролцоо суурин газруудын хөгжлийн нэмэлт санхүүжилтийн МОН-3388, МОН-3713 төсөл”-ийн хүрээнд хийгдэж байгаа юм.

Цэвэрлэх байгууламжийн нээлтийн үйл ажиллагаанд УИХ-ын гишүүн Б.Бат-Эрдэнэ, Барилга, хот байгуулалтын яамны Төрийн нарийн бичгийн дарга С.Магнайсүрэн, АХБ-ны Монгол дахь суурин төлөөлөгч Деклан Маагий, Зүүн өмнөд говийн хот байгуулалт, хилийн ойролцоо суурин газруудын хөгжлийн төслийн зохицуулагч Б.Оюун зэрэг бусад албаныхан оролцож ёслолын тууз хайчлан албан ёсоор нээлээ.

БХБЯ-ны Төрийн нарийн бичгийн дарга С.Магнайсүрэн нээлтийн үйл ажиллагаанд оролцож хэлсэн үгэндээ “Энэхүү төслийн эдийн засгийн үр ашиг, нийгмийн ач холбогдол нь аймгуудын төвийн хуучин, механик цэвэрлэх байгууламжаас гарч байсан бохир усыг цөөрөмд хаяж агаарт, хөрсөнд шингээж байсан бол шинээр баригдсан цэвэрлэх байгууламжаас гарах бохир ус нь Монгол улсын хүрээлэн байгаа орчин, усны чанар, хаягдал усны стандартыг хангаж, цэвэрлэсэн усыг ашиглан цэвэрлэгээ, ногоон байгууламжид ашиглах, лагийг боловсруулж, бордоо болгон ашиглах бүрэн боломжтой болж байна.

Аймгуудад анх удаа монгол инженерүүд монгол орны цаг уурын нөхцөлд тохирохуйц цэвэрлэх байгууламжийн шийдэл гарган, нэг маягийн зураг төсөл болгон батлуулж, тус төслөөр хэрэгжүүлж байгаа нь онцлог. Эдгээр цэвэрлэх байгууламжуудыг барьж, амжилттай ашиглалтанд оруулснаар бусад аймгуудын төвд цаашид цэвэрлэх байгууламж барих жишиг болох юм.

Барилга угсралтын ажлын гүйцэтгэгч “Комфорт импэкс” ХХК-д гэрээт ажлаа цаг хугацаанд нь чанартай сайн гүйцэтгэж, ашиглалтанд хүлээлгэн өгч байгаад талархал илэрхийлье” гэсэн юм.

Өнөөдрийн байдлаар Өвөрхангай, Архангай, Булган, Хөвсгөл, Өмнөговь аймгуудын төвийн цэвэрлэх байгууламжийн барилга угсралтын ажил бүрэн дуусч, туршилт, зүгшрүүлэлтийн ажил хийгдэж байна.

Түүнчлэн Дундговь, Дорноговь, Сүхбаатар аймгуудын төвийн цэвэрлэх байгууламжийн барилга угсралтын ажлуудыг энэ онд дуусгахаар ажиллаж байна.

Төслийн есөн аймгийн төвд хоногт 3000 м3-ын хүчин чадалтай биологи цэвэрлэгээний цэвэрлэх байгууламж ашиглалтад орж, байгаль орчин үзүүлэх сөрөг нөлөөлөл багасч, 250.000 оршин суугчийн тав тухтай амьдрах орчин бүрдэж байна. Мөн төсөлд хамрагдсан НААҮБ-уудын бүтцийн шинэчлэл, чадавхи бэхжүүлэх ажлуудыг хийжээ.Гүйцэтгэгч компани цэвэрлэх байгууламжийн тохируулга, зүгшрүүлэлтийн ажлыг нэг жилийн хугацаанд хийж гүйцэтгэхээр боллоо.


СЭТГЭГДЭЛ БИЧИХ

АНХААРУУЛГА:
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ