Барилгын политехник коллежийн чадамжийн төвийн нээлт өнөөдөр боллоо. Нээлтэд Хөдөлмөр, нийгмийн хамгааллын сайд А.Ариунзаяа, Барилга, хот байгуулалтын сайд Б.Мөнхбаатар, Монголын Ажил Олгогч Эздийн Нэгдсэн Холбооны гүйцэтгэх захирал Х.Ганбаатар болон бусад холбогдох албаныхан оролцлоо. 

Чадамжийн төв нь хэв хашмалын дадлагын газар, Арматурын дадлагын газар, Эрчим хүчний хэмнэлттэй барилгын бүтээц угсрах дадлагын газар, Өнгөлгөө, чимэглэлийн дадлагын газар, Шавардлагын дадлагын газар, Токарийн дадлагын газар, Хуурай хийцийн дадлагын газар, Гагнуурын дадлагын газар, Мужааны дадлагын газар, Сэргээгдэх эрчим хүчний лабораторитой.

Монголын бүтээн байгуулалтын салбарт Улаанбаатарын төв цэвэрлэх байгууламж, Сумын хөгжил, Хөшигийн хөндийн бүтээн байгуулалт, гээд олон төсөл хөтөлбөр хэрэгжиж байгаа энэ цаг үед мэргэжилтэй ажилтнуудыг олноор чадавхижуулан бэлтгэж байгаа нь сайшаалтай байна. Мөн Чадамжийн төвд Эрчим хүчний хэмнэлттэй барилгын бүтэц угсралтын мэргэжилтнүүдийг бэлтгэж байгаа нь маш чухал болохыг Барилга, хот байгуулалтын сайд Б. Мөнхбаатар үгэндээ онцоллоо.

Азийн хөгжлийн банкны санхүүжилтээр ХНХЯ-наас хэрэгжүүлсэн “Хөдөлмөр эрхлэх ур чадварыг дээшлүүлэх төсөл”-ийн хүрээнд Барилгын Политехник Коллежид 1733 м2 талбай бүхий хоёр давхар "Чадамжийн төв”-ийг барьж ашиглалтад орууллаа. Чадамжийн төв нь барилгын салбарын долоон мэргэжлийн 10 дадлагын газар, нэг лаборатори, нийт 12 том, 16 жижиг өрөөтэй.

Монгол Улсын урт хугацааны хөгжлийн бодлого “Алсын хараа – 2050”, “Засгийн газрын 2020-2024 оны үйл ажиллагааны хөтөлбөр”, “Монгол Улсыг 2021-2025 онд хөгжүүлэх таван жилийн үндсэн чиглэл”, “Мэргэжлийн болон техникийн боловсролыг хөгжүүлэх үндэсний хөтөлбөр” зэрэг бодлогын томоохон баримт бичгүүдэд туссан “Үндэсний болон орон нутгийн хөгжлийн зорилттой уялдуулан мэргэжлийн боловсрол, сургалтыг төрөлжүүлэн хөгжүүлж, хөдөлмөрийн зах зээлийн эрэлт хэрэгцээнд бүрэн нийцүүлэх” зорилтын хүрээнд эдийн засгийн тэргүүлэх салбарын мэргэжлүүдийн Чадамжийн төвийг байгуулаад байна. Үүний нэг нь Азийн хөгжлийн банкны “Хөдөлмөр эрхлэх ур чадварыг дээшлүүлэх” төслийн санхүүжилтээр Барилгын Политехник коллежийн дэргэд байгуулагдаж буй “Барилга”-ын мэргэжлийн Чадамжийн төв юм.

Чадамжийн төв нь ашиглалтад орсноор Монгол Улсын эдийн засаг, хөгжлийн тэргүүлэх чиглэлүүдийн нэг болох барилгын салбарын мэргэшлийн өндөр ур чадвар бүхий мэргэжилтэй ажилтанг орчин үеийн дэвшилтэт техник технологи, тоног төхөөрөмж дээр бэлтгэж, хөдөлмөрийн зах зээл рүү нийлүүлэхээс гадна уг мэргэжлийн багш, ажилтанг бэлтгэх, мэргэшүүлэх, давтан сургах, аж ахуйн нэгж, байгууллагын захиалгат сургалт, ур чадварын тэмцээн, ажил мэргэжлийн уралдаан зэргийг зохион байгуулах, иргэний амьдрал практикаас олж авсан өмнөх мэдлэг, ур чадварыг үнэлэх, баталгаажуулах, гэрчилгээжүүлэх зэрэг боломж бүрдэх юм.