Centry 21 Mongolia-ийн Гүйцэтгэх захирал Карлос Антониа Патино  

Бидний амьдралын хамгийн тодорхойгүй цаг үеийн эхлэл болсон 2020 оны 4-р сард миний бие "Голден Пропертиз" ХХК-ийн Бүсийн Гүйцэтгэх Захирлын албыг хаших завшаан тохиосон юм. Тус компани нь Монгол улсад "CENTURY 21 Mongolia" хэмээх нэрээр бизнес үйл ажиллагаа явуулдаг бөгөөд 2017 онд "Номин Холдинг" ХХК хурдацтайгаар өсөн тэлж буй үл хөдлөх хөрөнгийн зах зээлд үйл ажиллагаа явуулах боломжийг ашиглан АНУ-ын "Century 21 Real Estate" компанийн мастер франчайзерын хувиар энэхүү охин компанийг үүсгэн байгуулсан түүхтэй. Монгол оронд хоёр дахь удаагаа ирж буй миний хувьд баялаг өв соёл, амттай хоол ундаа, цэлмэг хөх тэнгэр, хараа булаам газар нутгийнх нь тухай хэзээний мэддэг болсон байв. 

Харин өмнө минь тулгарах бэрхшээлийн талаар арайхан төсөөлсөнгүй. Хэлийг нь мэддэггүй улс оронд "CENTURY 21 " гэх хүчирхэг брэндийг удирдан тэргүүлэх нь амаргүйн дээр үл хөдлөх хөрөнгийн салбар дөнгөж цэцэглэж буй "нялх" үед тохиодог саад бэрхшээлүүд мөн хөл хорио, бизнесийн хязгаарлалт, эдийн засаг сулран доройтохтой зэрэгцэн тохиолдох юм гэж санаагүй.

Үл хөдлөх хөрөнгийн салбарын "нялх" үе гэж юуг хэлэх вэ? 

Монгол орны үл хөдлөхийн салбар 1950-иад оноос 1970-аад оныг дуустал АНУ-д явуулж байсантай төсөөтэй үйл ажиллагаа явуулж байна. Жижиг албан газруудад гурваас таван борлуулалтын ажилтан ажилладаг хэв маягтай. Үл хөдлөхийн борлуулалтын зах зээл дийлэнх хувь нь үл хөдлөх хөрөнгийн зуучлалын байгууллагад хандахаасаа илүүтэй эзэмшигч нь өөрөө худалдан борлуулах (FSBO) зарчмаар ажиллаж, цөөхөн хэдэн борлуулалтын сүлжээ компаниуд үйл ажиллагаа эрхэлдэг. Үл хөдлөх хөрөнгө зуучлалын ихэнх байгууллагууд "Open listing" буюу нэг үл хөдлөх хөрөнгийг олон өөр зуучлалын байгууллагуудаар зэрэг зуучлуулахыг таатай хүлээж авдаггүй бол харин үйлчлүүлэгчид өөрийн үл хөдлөх хөрөнгөө борлуулахын тулд нэгээс дээш зуучлагчид хандах нь илүү үр дүнтэй гэж үздэг. "Multiple listing systems" (MLS) буюу үл хөдлөх хөрөнгийн зуучлагчид онцгой гэрээ бүхий жагсаалтаа харилцан хуваалцаж, мэдээлэл солилцох боломжийг бий болгодог систем Монголын зах зээлд хараахан нэвтрээгүй. Учир нь зуучлагчид хоорондоо хамтарч ажиллах, гэрээний мэдээллээ хуваалцахаас эмээдэг. 

Өөрсдийнх нь төлөөлж буй үл хөдлөх хөрөнгө бусад зуучлалын байгууллагуудад бүртгэлтэй байсаар байхад өөрт байгаа мэдээллээ илүү их ашиг авчирна хэмээн итгэж, харамлан хамгаалсаар байгаа юм. Эдгээр саад бэрхшээлүүдийг амжилттай даван туулах үүднээс манай баг хамт олон өндөр хөгжилтэй орнуудад "Century 21" брэнд хэрхэн амжилт олсон тухай аргачлалаас судалж, Монгол улсад хэрэгжүүлэхээр шийдсэн. 1971 онд АНУ-д, 1976 онд Канад улсад тус тус эхлэлээ тавьсан "Century 21" системийн амжилт нь бие даасан, жижиг үл хөдлөх зуучлалын компаниудад том сүлжээ операторуудтай өрсөлдөх боломжийг олгох тогтолцоонд суурилжээ. Сүлжээ компанийн эзэд үл хөдлөхийн хөрөнгийн холбоодоос гүнзгий хамааралтай байдаг бөгөөд хоорондоо санал бодлоо идэвхтэй солилцдог байв. Өөрсдөдөө хэт эрдсэн томоохон сүлжээ компаниудын эзэд франчайзингийн санаачлагыг үл ойшоож доог тохуу хийцгээж. Жижиг дунд бие даасан үйл ажиллагаа эрхэлдэг зуучлалын байгууллагыг хэн ч, хэзээ ч удирдан, зохицуулахгүй гэж үзэцгээжээ. 

1972 онд АНУ-ын үл хөдлөх хөрөнгийн салбарын суурь тавигдаж франчайзинг хийхэд бэлэн болоод байсан нь эдүгээ Монгол улсын нөхцөл байдалтай эгээ ижилхэн. Бизнесийн уур амьсгал хурдацтай хувьсаж, гэр бүлээрээ ажиллуулдаг жижиг хүнсний дэлгүүрүүдийн оронд супермаркетууд бий болж, жижиг түргэн хоолны газруудын байрыг "МакДональдс" эзэлсэн. Бизнесээ авч үлдэхийн тулд хувьсан өөрчлөгдөж буй хэв маягийг хүлээн зөвшөөрөх шаардлагатай болов. Өөрөөр хэлбэл, бизнесийн хэлбэр жижиг, бие даасан бизнесийн агуулгаас нэр бүхий, том байгууллагын ойлголт руу шилжиж буйг ойлгож эвлэрэх хэрэгтэй болжээ.

"Century 21"-ийн үүсгэн байгуулагчид бизнес төлөвлөгөөндөө суут санаа тусгаж чадсан бөгөөд, ялангуяа аливаа бизнесийн байгууллага хаана үйл ажиллагаа явуулж буй байршлаас үл хамааран зах зээл ялгаагүй, ижил тэгш байдаг гэдгийг ойлголтын нэвтрүүлж чадсан. Зохион байгуулалттай бизнесийн удирдлагын тогтолцоо, төвлөрсөн маркетингийн хамт бие даасан зуучлагчдыг өсөн дэвжихэд үнэтэй хувь нэмэр оруулсан франчайз юм. "Century 21 Real Estate" компанийн амжилтын түүхийг тодотгон өгүүлж буйн учир нь чухам энэ амжилт л энэхүү брэндийн өнгөрсөн 50 жилийн хугацаанд бүтээн байгуулсан бүхний үндэс суурь болсонд оршино. "Century 21" систем хараахан нэвтрээгүй улс орнууд ихэвчлэн үл хөдлөх хөрөнгийн салбарын хувьслын хувьд дэлхийн үл хөдлөх хөрөнгийн хөгжлөөс олон жилээр хоцорч байгаа хэмээн тодорхойлдог. 

"Century 21" -ийн систем яагаад амжилттай ажиллаж байгааг ойлгож чадвал энэ системийг нэвтрүүлснээр манай дотоодын зах зээл ч мөн адил амжилт олох боломжтой гэдгийг харах болно. "Century 21" брэндийн түүхээс үл хөдлөх хөрөнгө зуучлагчид франчайзингийн ойлголтыг ирээдүйн хэв маяг хэмээн хүлээн авч, улиг болж хоцрогдсон хуучны арга барил, үзэл суртлыг эвдэх өөрчлөлтийг хүлээн зөвшөөрч, "Century 21" хэмээх "Том гэр бүлийн"-д нэгдэх нь хэр хэмжээний чухал нөлөөтэй болох нь илхэн харагдана. 

"Century 21" үл хөдлөх хөрөнгийн брэнд нь хамгийн анхны, албан ёсны үл хөдлөх хөрөнгийн франчайзингийн систем байсан бөгөөд түүхэнд үл хөдлөх хөрөнгийн борлуулалтын хамгийн амжилттай ухагдахуун хэмээн тэмдэглэгджээ. Үүний нууц нь юу байсан бэ?

Энгийнээр хэлэхэд "CENTURY 21 Real Estate" компани бол алс хэтийн хараатай байгууллага билээ. Өөрийн манлайллаараа өөрчлөлтийг эрэлхийлж, хүсэл мөрөөдлийг нь биелүүлэхэд туслах, итгэл найдварыг нь үл хөсөрдүүлэх, хамтрагчдаа дэмждэг, эрх эзэмшигч түншүүд нь бахархалтайгаар хамтран ажилладаг тогтолцоог эрэлхийлж буй бие даасан бизнес эрхлэгчдэд энэхүү алсын хараагаа хүргэж чаддагт оршдог байна. Манай хамт олон тус брэндийн Монгол улсад явуулж буй үйл ажиллагаа болон "Century 21"-ийн өндөр хөгжилтэй орнуудад явуулж буй амжилттай үйл ажиллагааны хоорондын ялгааг олж харсан. Иймээс 2017 оноос 2020 онд ашиглаж байсан бизнесийн загварыг үндсээр нь дахин боловсруулж өөрчлөх шийдвэрт хүрсэн. 

Манай оффисуудын үндсэн чиг үүрэг бол хэвшсэн ойлголтыг өөрчилж, системчилсэн бизнесийн загварын дагуу, дэлхий даяар хүлээн зөвшөөрөгдсөн "Хүчирхэг Нэр" бүхий брэндийн дор бизнес эрхэлж өрсөлдөөний хамгийн том давуу талыг нэвтрүүлэх явдал юм. "Century 21 Mongolia" компанийг хүлээн авсан эхний жилээ систем бий болгох, шинэ аргачлалуудыг турших, франчайзинг эрхлэгчдийн хоорондын харилцаа холбоог бэхжүүлэх, сургалтын материалуудыг орчуулан Монголын хөрсөнд буулгаж илүү боловсронгуй болгож хөгжүүлэх, технологийн платформыг шинэчлэх, хамгийн гол нь брокер, хамтран ажиллаж буй түншүүд болон бүсийн удирдлагын хоорондын итгэлтгэлцлийг бий болгоход зарцуулсан юм. 

Энэ хугацаанд бид хамтын ажиллагааг хөгжүүлэхэд голчлон анхаарч, зуучлагчид өөр хоорондоо борлуулалтаа нэмэгдүүлэх боловсронгуй аргачлал, мэдлэг чадвараа солилцоход тулгуурласан зуучлагчдийн зөвлөлийг шинээр нэвтрүүлэв. Манай сургалтын хөтөлбөрүүдийг АНУ-ын "CENTURY 21 Real Estate" олон улсын сургалтуудад тогтмол хамрагддаг, мэргэжлийн өндөр ур чадвар бүхий бүсийн сургалтын менежер сайжруулан боловсруулж, мөн түүнчлэн мөнгө угаах гэмт хэргээс урьдчилан сэргийлэх болон бусад шаардлагатай борлуулалтын сургалтуудыг шинээр үл хөдлөх хөрөнгийн бизнест хөл тавьж буй агентууддаа хөтөлбөр болгон хүргэж дотооддоо батламж олгодог болсон. Түүнчлэн технологийн системдээ өөрчлөлт хийж, дэлхий дахинаа албан байгууллагуудын сонгон ашигладаг CRM буюу хэрэглэгчтэй харилцах менежментийн олон улсын системд шилжив. 

Энэ бүх ажлыг амжуулахын зэрэгцээ маш олон салбар нэгжүүд зах зээлийн уналтад өртөж буй энэ жилийн хугацаанд манай оффисууд болон бүсийн нийт систем борлуулалтаа 2 дахин нэмэгдүүлж чадсан юм.

Бид бүхэн дэлхий даяар үйл ажиллагаа явуулдаг нэгдүгээр зэрэглэлийн бизнесийн загварыг Монголд бүтээн байгуулах зорилготой байна. "Century 21" системийг нэвтрүүлснээр өмнө нь бизнесийнхээ гарт орчихсон байсан франзайзинг эрхлэгчид одоо өөрсдийн бизнесээ гартаа оруулан хянах боломжтой болно. Сонгинын гадна хальсыг хуулах адил хуучин үзэл баримтлал ард үлдэж, шинэлэг, илүү амжилттай бизнесийн ухагдахуун хэрэгжих боломжтой болно. Одоо ажиллаж буй зуучлагч, төлөөлөгч бүр илүү том боломжийг эрэлхийлэх, "Century 21" системийг орхин гарсан хүмүүс ч гудамжинд "C21" гэсэн логог олж харахдаа баяртай байх цаг үе, хамтын хүч, нөхөрлөлийн бэлгэдлийг хардаг байгаасай гэж би мөрөөддөг. 

Үйлчлүүлэгчдийнхээ мөрөөдлийг биелүүлэхэд туслахын тулд давсан саад бэрхшээл, сурж мэдсэн бүхэн, анд нөхдийн итгэл сэтгэл, мэргэжлээрээ хүлээн зөвшөөрөгдөх явдал "Century 21" гэх том гэр бүлийн гишүүн бүрийн дурсамжид хадгалагдан үлдээсэй гэж би хүсдэг.

"Century 21 Mongolia" компани дотооддоо өсөж хөгжихийг зорихын зэрэгцээ онцгой эрхтэй гэрээ байгуулдаг, үйлчлүүлэгчдэд илүү сайн үйлчилгээ үзүүлдэг, брэндүүд хоорондоо түншлэн итгэлцдэг, үл хөдлөх хөрөнгийн зах зээлийн ирээдүйн үнэ цэнийг хөхиүлэн дэмжсээр ирсэн. Бид борлуулалтын ажилтнууд ямагт хийсэн ажлынхаа хувь хөлсийг хүртдэг, үйлчлүүлэгчид үл хөдлөх хөрөнгөө аль ч үл хөдлөх хөрөнгийн зуучийн газраар заруулах боломжтой болж, шударга үнийн санал хүлээн авч хөрөнгөө зарж борлуулдаг, аль ч үл хөдлөх хөрөнгийн зуучлалын газар "MLS" буюу зуучлагчид мэдээллээ хуваалцдаг системээс худалдан авагчаа олж авдаг тийм л үл хөдлөх хөрөнгийн зах зээлийг бий болгох том зорилго өөд урагшилж байна. 

Үүний тулд үл хөдлөх хөрөнгийн салбар зөвхөн үл хөдлөх хөрөнгө зуучлалын тусгай зөвшөөрөл бүхий байгууллагуудыг гишүүнээр элсүүлж нэг үл хөдлөх хөрөнгийн холбооны дээвэр дор нэгдэх учиртай хэмээн үздэг. Монголын үл хөдлөх хөрөнгийн зах зээл өсөн тэлж байна, энэ өсөлтийг тогтвортой байлгахын тулд хэдий бид өөр өөр улс орнууд боловч хөгжсөн улсуудын жишээг ашиглан хувьсал хийх боломжтой гэдгийг хүлээн зөвшөөрөх нь чухал байх. Иймд холбооны гишүүд өндөр хөгжилтэй орнуудын үл хөдлөх хөрөнгийн зах зээлээс суралцан, тэдний шилдэг арга туршлагыг дотооддоо хэрэгжүүлэх зорилго өвөрлөн үл хөдлөх хөрөнгийн зах зээлийн өсөлт хөгжлийг тэргүүлэн хошуучлах үүргийг хүлээх нь зүйтэй болов уу.

Дотоодын үл хөдлөх хөрөнгийн зах зээлд тулгарч буй бүх бэрхшээлийг шийдвэрлэх урт зам өмнө зурайж ахуй манай хамт олон франзайчинг эзэмшигчид хийгээд үйлчлүүлэгчдэдээ үнэ цэнийг хүргэсээр байх үүднээс асуудал бэрхшээлийг алхам алхмаар шийдвэрлэхэд бэлхэн байна. "Century 21 Mongolia" компанийг удирдсан эхний 12 сар эрхгүй сэтгэл хөдлөм байлаа. 

Цаашид "Century 21"-ын хамт олонтойгоо асуудал бэрхшээлийг давж, хамтдаа суралцан, өсөн хөгжихийг догдлон хүлээнэм.

ВЭБ САЙТ: https://c21.barilga.mn/

УТАС: 7701-2121, 7701-2121