Цэцэрлэгийн барилгын зураг төслийг боловсруулах сайн жишээ "TAIKA KINDERGARDEN"
Байршил: Финланд, Сейняжоки /Seinäjoki, Finland/
Ашиглалтад орсон : 2018 он
Нийт талбай: 3,100 м²
Архитектор: OOPEAA фирм
Тайка цэцэрлэг нь тогтвортой, байгаль орчинд ээлтэй орон зайг бий болгохдоо хүүхдийн сурч боловсрох, хөгжих, бие бялдрын онцлогт тохируулан тусгай нарийн төлөвлөлтийг хийжээ. Уг цэцэрлэг нь хүүхдүүдэд яг л гэртээ байгаа мэт тав тухтай мэдрэмжийг өгөхийг зорьсон бөгөөд 1-7 насны 225 хүүхдийг өдөр өнжүүлэх, 200 хүүхдийг нэмэлт цагаар харж, 60 хүртэлх хүүхдийг 24 цагаар харах үйлчилгээ үзүүлдэг байна.
Уг барилгыг Остроботниан /Ostrobotnian/ - ны уламжлалт байшингийн загвараас санаа авсан бөгөөд од хэлбэртэй байхаар төлөвлөсөн байна. Ингэснээр байшингийн орон зай нь илүү хүртээмжтэйгээс гадна олон талын хэмнэлтийг бий болгосон байна.
Жишээлбэл, хэсэг бүр нь нас насны ангиллаар хуваагддаг бөгөөд гадна талбай нь ч тухайн хэсэгтээ харьяалагддаг байна. Ингэснээр хүүхдийн насны онцлогт тохирсон тоглоомын талбайг тус тусын орон зайд бий болгох боломж бүрджээ. Түүнчлэн насны ангиллаар хуваагдсан хэсэг бүрийн дотоод засал чимэглэлийг хүүхдүүдийн онцлог чадвар, хөгжилд тохируулан өөр өөрөөр шийдсэн аж.
Эдгээр хэсгүүдийн уулзвар буюу төв хэсгийг хоол идэх, шөнө хонож буй хүүхдүүдийн тоглох орон зай гэх мэт нэг дор цугларах нөхцөлийг бүрдүүлсэн байна. Мөн барилгын доод хэсэгт усан сан, зураг зурах хэсэг, модоор бүтээл хийх хэсэг, биеийн тамирын заалыг төлөвлөжээ. Олон талын хэмнэлт, ашигтай орон зайн төлөвлөт нь Нордикийн цэцэрлэгийн барилгын зураг төслийг боловсруулах хамгийн сайн жишээ болж байгаа юм.
Дэлгэрэнгүй зураг төсөлтэй танилцана уу.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.