Өнгөрснөөс ирсэн барилгын материал- “Шилэн-блок”

Архитектур, интерьерийн ертөнцөд 1980-аад оны “мөсөн хана” буюу “шилэн-блок” эргэн ирлээ. Шилэн тоосго, шилэн блок гэдэг нь шилээр хийсэн архитектурын элемент бөгөөд гадаад байдал нь өнгө, хэмжээ, бүтэц, хэлбэрээрээ ялгаатай. Эдгээр бүтээгдэхүүнүүдийн гол ялгаа нь блок дотроо хөндий байдаг бол шилэн тоосго нь хатуу жижиг шилний хэсгүүдээс бүтдэг ба энэ нь шилэн блоктой харьцуулбал хүнд жинтэй, бат бөх болгож, цохилт шахалтыг эсэргүүцэх чадварыг нь нэмэгдүүлдэг ажээ.





Шилэн блок нь гаднаас орж ирэх хурц гэрлийг барилгын доторх орон зайд бүдгэрүүлж нэвтрүүлдэг байна. Орчин үеийн шилэн тоосгыг 1900-аад оны эхэн үед призмийн гэрэлтүүлгийн зарчмуудаас үндэслэн боловсруулжээ. Уг материал нь мөн эрчим хүчний өндөр үр ашигтай ба одоогоор нарны эрчим хүчээр ажиллах чадамж бүхий шилэн блок нь хөгжүүлэлтийн шатандаа явж байгаа юм. Энэ нь эрчим хүчний нөөцийг хадгалах үр нөлөөтэй ба шилэн блокийн дулаан дамжуулалтыг 50% хүртэл бууруулах замаар байгалийн гэрлийг илүү нэвтрүүлэх боломжийг олгох юм. Ингэснээр бүхэлдээ шилэн блокоор хийсэн архитектурын фассадыг бий болгох боломжтой болно гэсэн үг.




Мөн шилэн блок ашиглах түлхүүр буюу 1980-аад оны өнгөрч, улирсан, мөсөн бүрхүүл мэт харагдахаас сэргийлэхийн тулд барилгын хүрээг матт өнгөлгөөгөөр хийх болон дулаан өнгөөр ​​хүрээлэх, зуурмаг ба хуваагч хоорондын зайг ээлжлэн хийх хэрэгтэй юм байна. Ерөнхийдөө шилэн блок нь тогтвортой ирээдүйн төлөө эрчим хүчийг хэмнэх, хүрээлэн буй орчныг хамгаалах гэх мэт үр нөлөө ихтэй  барилгын материал ажээ. 


Түүнчлэн тус барилгын материалыг энгийн боловч нарийн процессоор үйлдвэрлэдэг ажээ. Ингэхдээ цахиурын элс (silica sand), содын үнс (soda ash) шохойн чулууг хольж Фаренгейтийн 2300 градус хүртэл халсан саванд хайлуулдаг юм байна. Дээрх барилгын материал нь гадаад үзэмжний хувьд гоё сайхнаас гадна хатуу шинж чанартай байдаг. Өөрөөр хэлбэл бетоноос илүү хүчтэй бөгөөд автомашины ослын хүчийг тэсвэрлэх чадвартай аж. Мөн шилэн блок цонх нь шил зуурмагны холимогоос бүрддэг тул ус нэвтрүүлэхгүй чанартай. Хэрэв та үерт автах магадлалтай газар амьдардаг бол уг материалаар хийсэн цонх нь маш сайн сонголт болоод хөрөнгө оруулалт болох юм. 

Шилэн блокыг барилга, байгууламжийн ердийн цонхны оронд эсвэл угаалгын өрөөнд, гэрийн үүдний хэсэг эсвэл ариун цэврийн өрөөний хана болгон ашигладаг ажээ. Шилэн блок цонхны суурилуулалтын дундаж өртөг нэг цонх тутамд 400-100 ам.доллар байдаг. Бэлэн шилэн блокон цонх захиалахаар бол квадрат тутамд 18-25 ам.доллар төлөх юм.




Дэлхийн шилэн блокны зах зээлийн хэмжээ 2020-2026 оны хооронд 3.1%-ийн өсөлт үзүүлэхээр байна. Өнгөрсөн жил энэ зах зээл 227.2 сая долларын өртөгтэй байсан бол 2026 он гэхэд 273.1 сая долларт хүрэх төлөвтэй байгаа юм.


Мөн энэ жил уламжлалт фасадыг “орчин үеийн” болгож буй шилэн блокыг ашиглан бүтээн байгуулалт хийгдэх чиг хандлага дэлхийд ажиглагдаж байна. Тухайлбал Амстердам дахь CHANEL брэндийн шилмэл загварын бүтээгдэхүүний Crystal Fasade дэлгүүр нь түүхэн чухал ач холбогдолтой газруудын эртний уламжлалт архитектурын талаарх ойлголтыг сайжруулах зорилгоор байгуулагдсан юм. Энд гар хийцийн хатуу шилэн блокуудыг уламжлалт архитектурын хэв маягийг дуурайлган цутгамал хийцээр бүтээсэн ч орчин үеийн хэв загварыг мөн хадгалжээ.







СЭТГЭГДЭЛ БИЧИХ

АНХААРУУЛГА:
Та системд нэвтэрч орсоноор сэтгэгдэл бичих болон үнэлгээ өгөх боломжтой болно. Та нэвтрэх бол энд дарна уу.

Холбоотой мэдээ