Нью-Йоркийн “Бяцхан арал” айсуй

Нью-Йоркийн Хадсон голын хөвөөнд энэ хавар “Little Island” гэх цэцэрлэгт хүрээлэн нээлтээ хийхээр болжээ. Бяцхан арал гаднаас ирэх жуулчдын нүдийг хужирлах томоохон бүтээн байгуулалт гэдэг нь хэн хүнд ойлгомжтой. “Little Island”-ын хувьд тэрбумтан Барри Диллер болон түүний эхнэр Диана фон Фуртенсберг нарын эхлүүлсэн төсөл аж. Диллер тус арлын талаар “Байгаль болоод урлагт хайртай бүхий л насны Нью-Йоркчуудад зориулагдсан газар” хэмээн хэлжээ. Тус цэцэрлэг нь 250 сая ам.долларын өртгөөр бүтсэн ба хэлбэрийг нь голд хөвж буй навчнаас санаа авч хийжээ. Өндрийн хувьд уснаас дээш 63 фут /19,2м/ өндөр, моддоос 40 фут /12.1м/ өндөрт байрлана. 



Энд 35 төрөл зүйлийн модод, 65 төрөл зүйлийн бут сөөг, 270 төрлийн өвс, олон наст ургамал, усан үзмийн мод, булцууг нутагшуулах ба 70% нь уугуул төрөл зүйлийн ургамал байх юм. 


“Бяцхан арал”-ын зочид задгай зүлгэн дээр алхаж, цэцэрлэгт хүрээлэнг 360 градусаар харах боломжтой. “Цэцэрлэгийн өндөрлөг нь өөрчлөгдөх үед 40 фут/12.19м/ өндөртэй модод хүртэл бут сөөг, усан үзмийн ороонгоны өнгө болон тариалалтын хэв загвар ч мөн өөрчлөгдөнө” хэмээн цэцэрлэгийн дизайнер Нильсэн хэлжээ. 

Зочид, жуулчид Бяцхан арлын хамгийн өндөр цэгүүдээр явган хүний ​​замаар алхах эсвэл шатаар гарч болно. Энэ замд Нильсэн болон түүний багийхан олон төрөл зүйлийн урт наст өвс ургамал тариалсан бөгөөд эдгээр нь зөгийн үржүүлгэд тустай тоос хүртэгчид юм. Зарим ургамлыг цэцэрлэгт хүрээлэнгийн дугуй хэлбэрийг тойруулан, доторх орон зайг муруй шугамаар хуваах замаар зүлэгжүүлсэн байна. Энэ нь хүмүүсийг “ургамлаар хүрээлэгдсэн” мэт мэдрэмж төрүүлнэ хэмээн дизайнер  Нильсэн ярьжээ. 



Энд нарлаж болох гурван “ногоон талбай” бий. Тухайлбал зөвхөн цагаан цэцэгсээр хүрээлэгдсэн, хус мод, сарнай болон яргуйгаар бүрхсэн хаалга бүхий нууц цэцэрлэг гэх мэт. Нууц цэцэрлэгийн хажуу талд “The Glade” гэх 700 хүний суудалтай цэнгэлдэх хүрээлэн байх ба хөлөг онгоцны зогсоолын ойр орчимд олон төрлийн эвент, шоуг зохион байгуулах юм. Тус цэцэрлэгт хүрээлэн нь 2009 онд Нью-Йоркт нээлтээ хийсэн The High Line”-аас хойш хамгийн  инновацилаг болоод хүлээлт үүсгэж буй бүтээн байгуулалт хэмээн мэргэжилтнүүд үзэж байна. 





 

 

 

СЭТГЭГДЭЛ БИЧИХ

АНХААРУУЛГА:
Та системд нэвтэрч орсоноор сэтгэгдэл бичих болон үнэлгээ өгөх боломжтой болно. Та нэвтрэх бол энд дарна уу.

Холбоотой мэдээ