Зоорийн давхартаа мини саун хийцгээе

Зоорийн давхартаа мини саун хийцгээе
Та амины орон сууцандаа эрүүл мэндийг тэтгэгч мини саун хийхээр сонирхож, төлөвлөж байна уу. Саун хийхэд цэлгэр том өрөө тасалгаа шаардлагагүй, сууцныхаа бага талбайтай зоорийн давхартаа ч хийж болно. Энэ нь зөвхөн угаалгын өрөө ч биш гэр бүлийн гишүүн бүрд зориулсан эрүүл аж төрөхөд хэрэгцээтэй тул сууцныхаа зоорийн давхарт өөрсдийн хүчээр яаж мини саун хийх талаарх зөвлөгөөг хүргэж байна.

Саун танд хэрэгтэй юу?

Сауны талаарх ойлголт муутай зарим хүмүүс түүний ач холбогдлын талаар төдийлэн мэддэггүй, шүршүүр ванн байхад хангалттай гэж үздэг. Иимд сауны зорилго, хүний эрүүл мэндэд ямар нөлөө үзүүлдэг талаар ойлгох нь зүйтэй юм .

Саун нь бие махбодийг эмгүйгээр эмчлэх чадвартай байдаг ба дараах давуу талуудтай.

Хуурай уурын өрөө нь хүний биед хуримтлагдсан хорт бодисоос салгадаг;

     Саун эмчилгээ нь булчингийн уян хатан чанарыг сэргээдэг;

 Саун нь мэдрэлийн системийн төлөв байдалд эерэг нөлөө үзүүлдэг бөгөөд стрессийг тайлж, тайвшрахад тусалдаг;

    Арьсанд сайнаар нөлөөлж, нүх сүвийг нээж, цэвэрлэж, арьсыг амьсгалах боломжийг олгодог;

    Саун нь биеийн цусны эргэлт, бодисын солилцооны үйл явцыг хэвийн болгодог;

Хуурай ууранд өртөх нь харшлын урвалын эрсдлийг бууруулдаг болох нь батлагдсан;

Сауны гол зарчим нь цахилгаан болон түлш шатаах зуухыг ашиглан халсан чулуун дээр ус хийснээр халуун, хуурай уур ялгарах бөгөөд энэ нь саунд байгаа хүний  хөлсөөр хорт бодис гадагшилж, бие махбодийг илүү үр дүнтэй цэвэрлэж, эмчилгээ болдог. Сауны өрөөнд усанд орох шаардлагагүй тул ус бага хэмжээтэй шаарддаг ба агаарын температур өндөр байдаг тул орох, гарах агаарын хөдөлгөөнийг хангасан дулаан солилцоотой байх хэргтэй.

Саунд халуун, хуурай уурыг ашигладаг

Амины орон сууцныхаа зоорийн давхарт саунаа байрлуулах нь тусдаа нэмэлт байшин шаардлагагүй, чөлөөт талбайг ашигладаг, дотор байрлалтай тул ялангуяа өвлийн улиралд гадагшаа гарах шаардлагагүй, ус дамжуулах хоолой, ариутгах татуургын шугам сүлжээнд мэдэгдэхүйц өөрчлөлт хийх хэрэггүй юм.

Сауны өрөөний хэмжээ

Зоорийн давхарт байрлах мини саунд булан болон бэлэн жижиг өрөөг ашиглаж болох ба  гэр бүлийн ам бүлийн тоо, зай талбайнаас хамаарч их зардал гаргахгүйгээр шийдэж болно: Мини сауны стандарт хэмжээ нь дараах байдалтай байна.


Мини сауны план зураг. Мини саун хийхэд 2х2 м хэмжээтэй талбай  байхад л хангалттай.

  Таазны өндөр нь 200-230 см байвал тохиромжтой, хэт өндөр тааз нь дулаан алдагдлыг ихэсгэх тул түлшний зарцуулалт, цахилгааны хэрэглээг нэмэгдүүлдэг.

  Өрөөний хэмжээг эрүүл мэндийн эмчилгээг нэгэн зэрэг хийлгэх хүмүүсийн тоо, тэдгээрийн тухтай суух байдлыг харгалзан тооцдог. Тэгэхээр нэг хүний хувьд 100 х 200 см хэмжээтэй өрөө, хоёроос гурван хүнд 180 х 220 см байхад хангалттай.

  Сауны доторх суух тавцангууд тодорхой түвшинд байрлах нь чухал ба өндөр болох тусам температур нь нэмэгдэж халуун байх болно. Шалнаас тааз хүртэл 200 см-ийн өндөртэй сауны хувьд доод эгнээний тавцан шалнаас 45х50, хоёр дахь нь 85х90 см өндөрт байвал тохиромжтой.

  Гурав дахь эгнээний тавцанг байрлуулах нь өрөөний таазны өндөр нь 250- 260 см байх үед боломжтой ба шалнаас 135х140 см өндөрт байрлана. Дээд талын тавцан ба таазны хоорондох зай хамгийн багадаа 120 см байх ёстой.

   Тавцангийн өргөн нь эзэмшигчийн сонголт, өрөөний хэмжээ зэргээс шалтгаалан 50-70 см-ийн хооронд хэлбэлздэг.

Сауны өрөөнд байрлах тавцангууд

Сауны өрөөнд агааржуулалт хийх

Сауны өрөөнд агаарын хөдөлгөөнийг оновчтой шийдэхийн тулд зөв агааржуулалтын системийг хийх нь чухал. Агааржуулалтын системийн элементүүдэд салаалсан хоолой, тохируулгатай хаалт бүхий цонх, шаардлагатай бол агаарыг албадан эргэлтэд оруулах сэнс зэрэг орно.

Сауныг хэвийн ажиллуулахын тулд агааржуулалтыг зөв хийх шаардлагатай

Зуух, тавцанг хаана байрлуулахаас хамаарч агааржуулалтын цонхыг суурилуулах схем хийгддэг ба зуухнаас халуун агаар гарч, түүний чиглэл, хурдатгалыг тохируулахын тулд зуухны хажууд агааржуулалтын цонх хийдгийг ердийн агааржуулалт гэнэ. Энэ төрлийн агааржуулалтын систем нь гадна ба өрөөний хоорондох температур, даралтын зөрүүн дээр суурилдаг ба оролт ба гаралтын цонхыг зөв байрлуулах замаар хийгддэг. Зуухны хажууд шалнаас 250 ÷ 350 мм-ийн өндөрт оролт, түүний эсрэг талын хананд таазнаас 150 ÷ 250 мм-д гаралтын цонхыг хийж өгнө:

Мөн албадмал агааржуулалтыг ашиглаж болох ба энэ системд зөв байрлуулсан агааржуулалтын цонхнуудаас гадна шаардлагатай хэмжээгээр агаар орох, гадагшлах урсгалыг зохицуулдаг сэнс хэрэгтэй болно.

 Сауны агааржуулалтын цонх                                  сэнс


Гэрийн сауны материал

Сауныг барих, тохижуулахад хэрэглэгдэх материал нь өрөөн доторх температурыг барихаас гадна уур, ус чийгэнд тэсвэртэй, дулаан, хүний эрүүл мэндэд харшилдаггүй, гоо зүйн шаардлагыг хангах модон материалыг ихэвчлэн хэрэглэнэ. Үүнд:

  Дотор талын өнгөлгөө, тавцан, зуухны хашлага хийхэд банз эсвэл ховилтой рейк мод. Банз, ховилтой рейк модонд уур ус чийгэнд тэсвэртэй болгохын тулд лак болон зориулалтын анисептик шингэн түрхэх хэрэгтэй. Эрүүл уур амьсгалыг бүрдүүлэхэд шинэс, нарс эсвэл хуш модыг сонгох нь дээр.

     Ханын өнгөлгөөг бэхлэх каркас үүсгэх модон брусс, түүнчлэн шалны дай мод.

     Агааржуулалтын нүхийг хийх савх мод

     Шалны банз, хөвөө

 Дулаалгын материал, чулуун хөвөн хамгийн тохиромжтой байдаг (энэ нь арьс, амьсгалын эрхтэнд аюулгүй байдаг).

     Уур ба ус үл нэвтрүүлэх материал

  Зуухны ойролцоо хана, шалны хучилт хийх керамик плита зэрэг болно.

Сауны өрөөг хийх аргачлал

Саунаа өрөөг хийхээс өмнө  байршлыг нь тогтоож, хэмжилт хийж, эскиз зураг хийх шаардлагатай ба түүнд сауны бүрэлдэхүүн хэсэг болох хана, шалны хэмжээ, хаалга, зуух, тавцан, агааржуулалтын цонхыг хаана байрлуулахыг тусгаж өгнө. Хэрэв зоорийн давхар хангалттай том бол сауны хувьд тохилог булан болон жижиг өрөөг ашиглаж болно. Сонгосон өрөө эсвэл буланг гадна хананы ойролцоо байрлуулах нь зүйтэй бөгөөд ингэснээр агааржуулалтын асуудлыг шийдэх нь илүү хялбар болно.

Сауныг буланд байрлуулах нь тохиромжтой байдаг

Хана:  

Сауны булангийн хоёр талын хана нь бэлэн байх тул босоо брусс хадна. Нөгөө хоёр талд нь хананы каркас модыг 60-70 см зайтай босгож бэхлэх ба  гэрэлтүүлэг хийх цахилгааны утсыг хийнэ. Хананы каркас босгохдоо хаалгаа хаана байрлуулах, тавцанг угсрах байрлалуудыг тодорхойлж хөндөл хадаж, гадна өнгөлгөөг хийнэ.

Дулаалгын материал болох чулуун хөвөнгөө хийнэ.

-      Уур тусгаарлах пленкаа бэхлэнэ.

- Лакдсан модон доторлогоог хэвтээ байдлаар хийвэл тохиромжтой.


Хэвтээ доторлогоог рейк модоор хийх


Сауны ханын каркас, бүтэц 

Шал:

-Шаланд бетон өнгөлгөө хийж, гадаргууг тэгшилнэ.

-Зориулалтын ус үл нэвтрүүлэх хуйлмал материалыг шалан дээрээ  дэвсэж, хана руу 150-200 мм цоройлгож наана.

-Хоорондоо 500х600 мм-ийн зайд шалны дай мод хадаж, дулаалгын материал дэвсээд шалны банз хадаж ус чийгэнд тэсвэртэй лакаар будаж, плинтусаа хадна. Эсвэл шалыг керамик плитагаар өнгөлж болно.

Шалыг дуусгаад таазны дулаалга, уур ус тусгаарлах үе, доторлогоог хийнэ. Дараа нь хаалга, агааржуулалтын цонхны решетка, усны хамгаалалттай гэрэлтүүлэг, унтраалга, розетка  зэргийг хийнэ.  .

Сауны тоног төхөөрөмж

Мини саунд халаагч зуух болох цахилгаан зуухыг ихэвчлэн ашигладаг. Мөн түлш шатаах төмөр ба тоосгон зуух суурилуулж болно, гэхдээ яндангийн гарц шаардлагатай болохоос гадна галын аюулгүй байдлыг хангах арга хэмжээг сайн  авсан байх шаардлагатай. Зуухны эргэн тойрны ханыг шатдаггүй материалаар өнгөлөх, шалнаас 15см-с багагүй өндөрт байрлуулж доод талд нь төмөр лист дэвсэж өгөх, нүүрэнд нь хашлага хийх гэх мэт арга хэмжээ авна. Чулууны хувьд халуунд тэсвэртэй, хагарч бутарч үйрдэггүйг сонгох хэрэгтэй.


Цахилгаан эсвэл түлш шатаах зуухны ойролцоох ханыг шатамхай бус материалаар доторлох хэрэгтэй


Саунд нэмэлт уламжлалт дагалдах хэрэгслүүд заавал байх хэрэгтэй. Үүнд: термометр, чийгшил үздэг багаж, цаг, массажны иж бүрдэл, венник, алчуур, хувин, шанага гэх мэт


Байгалийн гаралтай материалаар хийсэн сауны иж бүрдэл

Хэрэв та өөрөө мини саун хийх боломжгүй бол хүлээн зөвшөөрөгдсөн угсарч бэлэн болсон саун худалдаж авч болно.


Энэхүү мини сауныг жижиг талбайтай газар ч байрлуулж болно. 


Орчуулж бэлтгэсэн: С.Тунгалаг 

СЭТГЭГДЭЛ БИЧИХ

АНХААРУУЛГА:
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ