Өнгөрсөн он хэдийгээр дэлхий даяар цар тахлын нөхцөл байдалтай , эдийн засгийн амаргүй үе байсан хэдий ч  үл хөдлөх хөрөнгийн зах зээлд олон өөрчлөлт, шилжилт явагдаж ерөнхийдөө энэ зах зээл өнгөрсөн онтойгоо харьцуулахад ерөнхий байдлаар эдийн засагт өөрийн нөлөөллийг үзүүлж чадсан юм. Энэ салбар нь эдийн засгийн хөдөлгөгч салбарын хувьд тасралтгүй эргэх мөнгөн урсгалын ихэнх хэсгийг мөн бүрдүүлж байдаг. Тэгвэл энэ салбарын томоохон тоглогчийн нэг Ремакс компани өнгөрсөн оноосоо 54% өсөлттэйгөөр нийт 449 тэрбум төгрөгийн борлуулалттай ажиллажээ.

ДЭЛХИЙ ДАЯАР ҮЛ ХӨДЛӨХ ХӨРӨНГИЙН ЗАХ ЗЭЭЛ 2020 ОНД

Дэлхий даяар 16 улсын шинжээчдийн гаргасан мэдээллээс үзвэл үл хөдлөх хөрөнгийн үнэ Австралиас бусад зах зээлд орон бүрээсээ хамаарч 2-12% ийн өсөлтийг  үзүүлжээ. Энэ өсөлт 2022 онд илүү өндөр байх төлөвтэй байна.  

Үүнд хувиар: Филиппинд 3,2% , Англид 6,3%, Австралийн хотууд өөр өөр үр дүнгүүдийг харуулсан ба хүн ам ихээр суурьшсан Мельбурн болон Сидней хотуудад 2 с 3,5% ийн бууралттай байсан бол уул уурхайн өлгий хот гэгддэг Перт хотод 0,6% үнийн индекс өсөлттэй байжээ. Дубайд 12 сард л гэхэд 1,5 тэрбум орчим ам долларын үл хөдлөх хөрөнгийн арилжаа хийгдсэн байна. Хөл хорионоос үүдэн дэлхий даяар и коммерс худалдаа эрэлт ихэссэнээр худалдааны болон логистикийн түрээс, худалдааны борлуулалтад нөлөөлсөөр байгаа юм.

Малайзад цар тахлын  дэгдэлтээс үүдэн ҮХХ салбарыг хөгжүүлэгчид буюу барилгын компаниуд арилжааны зориулалттай барилга, оффисын ажилчдын эрүүл мэндэд төвлөрсөн “Well Being Building” хэмээх гэрчилгээжүүлэлтийн шинэ хөтөлбөрийг эхлүүлж үүнд өндөр анхаарал хандуулж байгаа ажээ.

Үйлчилгээний бизнесийн түрээслэгчид бэлэн мөнгөний гүйлгээнээс татгалзаж цахим гүйлгээг дэмжиж эхэлснээр энэ салбарт цахим шилжилт хэзээ хэзээнээс илүү идэвхжиж байна.

МОНГОЛЫН ҮЛ ХӨДЛӨХ ХӨРӨНГИЙН ЗАХ ЗЭЭЛ 2020 ОНД

Улсын бүртгэлийн Ерөнхий Газарт 2019 онд нийт 40,243 үл хөдлөх хөрөнгө худалдах худалдан авах гэрээний өөрчлөлт бүртгэгдсэн бол энэ тоо 2020 онд 41,591 болж 2,5% -иар өсжээ. Энэ нь жилдээ нийтдээ 41,591 үл хөдлөх хөрөнгө арилжаанд орсон ба сардаа дунджаар 3,500 орчим үл хөдлөх хөрөнгө зах зээлийн эргэлтэд ордог гэсэн статистик үзүүлэлт юм.  Дундаж байрны үнэ 65 сая төгрөгөөр бодвол ойролцоогоор 227 тэрбум төгрөгийн үл хөдлөх хөрөнгө сар бүр арилжаалагддаг байна.

Монгол улсын хэмжээнд нийт 897,427 өрх байгаагаас 779,868 нь сууцанд амьдардаг. Үүнээс 38,2% нь гэрт амьдардаг бол, 60,9% нь өөрийн барьсан хувийн сууц болон орон сууцанд амьдардаг. 0,9% нь бусад төрлийн сууцанд амьдарч байна.

Харин Улаанбаатар хотын нийт өрхийн 74,5% нь өөрийн барьсан хувийн сууц болон орон сууцанд амьдардаг бол 24,7% нь гэрт амьдардаг. Байшин сууцанд амьдрах өрхүүдийн тоо 2020 онд 8.6%-р өсчээ.

Нийт орон сууцны 98,5% нь хувь хүн буюу иргэний нэр дээр байдаг бол 1,5% нь аж ахуйн нэгж болон төрийн байгууллагуудын өмчлөлд байна.

Улсын хэмжээнд нийт өрхийн 8.4% нь буюу 74,8 мянган өрх өөрийн гэсэн сууцгүй байгаа ба түрээсийн болон худалдааны үл хөдлөх хөрөнгийг байнга хайж байдаг.