Байгууллагын онцлогоо интерьерээр илэрхийлж болно

Байгууллагын онцлогоо интерьерээр илэрхийлж болно
2019 оноос эхлэн финтекийн \санхүүгийн технологи\ салбарт нэгэн шинэ өнгө төрхийг нэмж,  хэрэглэгчдийн таашаалд хүрч чадсан "Нөмөр" аппликэйшний 120м.кв оффистой танилцсанаа хүргэж байна.

Ажлын байр гэдэг бүтээмжтэй ажиллах нөхцөлийн үндэс суурь болдог гэдгийг энэ байгууллагын ажилчдын уур амьсгал, оффисын тохижилтоос мэдэрлээ.

Оффисын төлөвлөлт, интерьер зургаа "Скинни Студи"-тэй хамтран гаргасан бөгөөд интерьерийн зургийг 2 сар, гүйцэтгэлийг 3 сарын хугацаанд хийсэн байна. Улмаар амьдралынхаа ихэнх хугацааг ажлын байрандаа өнгөрүүлж буй гол хүмүүс болох багийнхантайгаа зөвлөлдөж, ажилтан бүрийн санал, санаачилгыг авч оффисоо өөрсдөө нэмж тохижуулжээ. 

"Нөмөр" аппликэйшний лого номин ногоон болон шар өнгөөс бүтсэн байдаг учир шар өнгийг тохижилтынхоо гол өнгөөр сонгожээ. Байгууллагын интерьерээс тухайн байгууллагын өнгө төрх харагдаж байдаг тул логоны өнгөө интерьертэйгээ хослуулсан нь илүү төгс тохижилт болж чаджээ. Шар өнгийг тодотгохын тулд хар, цагаан өнгө болон модны хээтэй материалтай хослуулсан байна. 


Интерьерт шар, хар, цагаан өнгүүдийг хослуулахад зохицдогоос гадна шар өнгө хүний сэтгэл зүйд мэдээлэл өгөх, мэдээлэл хүргэх үүрэгтэй байдаг аж. Тиймдээ ч ”Нөмөр” аппликэйшн ажлын чиг үүрэгтээ тохируулан шар өнгийг лого болон интерьерийн гол өнгөөр сонгосон нь харагдаж байна.

Модны хээ хүнд тухтай, байгальтай ойр мэдрэмж төрүүлдэг онцлогтой гэнэ. Ихэнх цагаа оффист өнгөрүүлдэг ажилтнуудад тохижилтын материалаар дамжуулан байгальд ойр мэдрэмж төрүүлэх, ажлын бүтээмжийг нэмэгдүүлж, сэргэг мэдрэмжийг өгдөг давуу талтай байна. 

Интерьер нь Loft стилийн чиглэлд орох ба тус стиль орчныг ганц хоёр онцгой зүйлээр маш сайн тодотгож өгдөгт оршдог байна. Энэхүү стильд байгалийн элементүүдийг түлхүү оруулж өгсөн ба үүнийг модны хээ, таазны шийдэл зэргээс харж болох юм.


-Тус оффиссын таатай шийдлүүдээс сонирхуулахад


  • Яг л гэртээ амарч байгаа мэт байлгахаар тохижуулсан ая тухтай амралтын хэсэгтэй.

  • Өрөөний хана булан бүрийг босоо уулзалт хийх, тэмдэглэл хөтлөх боломжтойгоор шийдэж өгсөн.

  • Оффисын ширээнүүдийг өргөж босгоод зогсож ажлаа хийх боломжтой.

  • Хурлын өрөөнүүдэд маш сайн дуу тусгаарлагч хийж гадны дуу чимээнд ажилчдын анхаарал сарнихгүй байхаар шийдсэн.

  • Цайны цагийн дараа эсвэл ажлын дундуур 5, 10-хан минут ажлын алжаалаа тайлах, тоглох, кино үзэх зэргээр хамт олонтойгоо чөлөөт цагийг хөгжилтэй өнгөрүүлэх орчныг бүрдүүлсэн байна.


Оффис төлөвлөлт 

-Ажиллах хэсэг

-Үйлчилгээний хэсэг 

-Операторын хэсэг гэсэн үндсэн 3 том хэсгээс бүрэлдэнэ. 

Ажиллах хэсэг дотроо

-Уулзалтын хэсэг 

-Хурлын өрөө

-Гал тогоо гэсэн хэсгүүдтэй.


Угтах хэсэг буюу үүдний хэсэгт албан байгууллагын лого байрших нь үйлчлүүлэгч нар ямар байгууллага вэ гэдгийг шууд мэдэх боломжтой юм. Мөн ямар чиглэлд үйл ажиллагаа явуулдгаасаа шалтгаалаад үйл ажиллагааны чиглэлдээ тохируулан тохижуулвал зохимжтой.


Төлөвлөлтийн хувьд “Скинни Студи” нь захиалагчийн өгөгдлийн дагуу ямар ч дотор засалгүй байсан оффисыг интерьерийн зураг гаргахаас эхлээд гүйцэтгэлийг бүгдийг хийж, ажилчид зөвхөн хувийн зүйлс, компюьтертэйгээ ирэхэд л бүх зүйл бэлэн байхаар гүйцэтгэсэн онцлогтой.


Интерьерийн зургийг гаргасан компани гүйцэтгэлээ хийх нь яг зургийн дагуу гүйцэтгэх давуу талтай байдаг байна. 


“Скинни Студи”-ийн Архитектор, төслийн зохицуулагч Д. Номин-Эрдэнээс оффисын интерьерийн зарим зүйлийг тодруулснаа хүргэж байна.

Нийслэл хотын томоохон барилгуудын оффисууд маш гоё тохижилттой болж байгаа нь сүүлийн үед их анзаарагдаж байна. Энэ нь оффисын ажилтнуудын  ажлын бүтээмжид хэрхэн эерэгээр нөлөөлдөг талаар асуумаар байна?

Байгууллагууд оффисын интерьертээ анхаардаг болсон нь их эерэг хандлага. Зоригтой хурц шийдэл гаргадаг байгууллагууд улам нэмэгдэж байна. 

Төлөвлөлтийн хувьд ажилтнууд руу чиглэсэн интерьерийг түлхүү хийлгэдэг болсон. Өмнө нь талбайгаа тэр чигт нь ажиллах хэсэг маягаар тохижуулдаг байсан бол одоо удирдлагуудын хандлага өөрчлөгдөж оффис дүүрэн ажилтан гэхээс илүү цөөхөн ажилтнаа тухтай ажлын байранд, илүү чанартай бүтээмжтэй ажиллуулахыг хүсдэг болсон нь бас нэгэн шинэ нээлт гэж хэлж болно. Үүнийг дагаад интерьерийн шинэ шийдлүүд орж ирэх боломж улам нэмэгдэж байна. Энэ нь цаашлаад олон нийтийн барилгад оффиссын интерьерээрээ өрсөлдөх чиг хандлагыг үүсгэж байгаа юм. Үүнээс үүдээд интерьерийн шинэ, шинэлэг чиглэлийг нэвтрүүлэх нь интерьерийн компаниудад мөн хэрэгтэй.  

Оффисын интерьерийн чиг хандлага энэ онд ямар байна. Мөн манай улсад хэрхэн нэвтэрч байгаа бол? 

2020 онд дэлхийд максималист буюу минималистын эсрэг чиг хандлага давамгайлж байна. Максималист нь деталь, декор ихтэй, олон төрлийн материалыг хослуулсан чиглэл юм. Манай улсын хувьд энэ чиг хандлага шууд орж ирж чадахгүй байгаа ч бидний харж байгаагаар ирэх жилээс илүү их дэлгэрэх байх. Бидний зүгээс дэлхийд ямар чиг хандлага зонхилж байна түүнийг үйлчлүүлэгч нартаа санал болгодог ч жил болгоны интерьерийн чиг хандлагыг дагаж оффисоо өөрчил гэсэн үг биш юм. Аль болох ажилтнуудад хамгийн тохиромжтой интерьерийг сонгох нь чухал юм.  

Оффисын ажиллах орчинд баримтлах стандарт байдаг уу?

Ажиллах орчинд ширээний тавцаны өндрийн хэмжээ гэж байдаг. Бид эргономикийн стандартыг баримталж өөрсдөө хэмжээгээ гарган ажилладаг. Өөрөөр хэлбэл Монголд заасан стандарт байдаггүй учраас европ хүмүүст зориулсан эргономикийн стандартыг монголчуудын биеийн хэмжээнд тохируулан 780см стандартын өндөртэй ширээг 750 см болгож хэмжээг нь хасаж гаргадаг гэсэн үг. 

Стандарт хэмжээ хэдхэн см зөрөхөд л сандал, ширээний харьцаа алдагдаж ажилтанд тухгүй байдал үүсэж, ажлын бүтээмж багасна, дээрээс нь эрүүл мэндэд сөргөөр нөлөөлдөг дутагдалтай.

Мөн ажлын чиг үүргээрээ ширээний хуваарилалт өөр байдаг. Чөлөөтэй хоорондоо ярилцаж ажилладаг бол тойрог ширээ, өөд өөдөөсөө харсан ширээний байрлал тохиромжтой. Ганцаарчлан ажилладаг хүмүүст тусдаа өрөө эсвэл тусдаа ширээ байх нь зохимжтой гэж үздэг. Жишээ “Нөмөр”-ийн операторуудын ажиллах ширээ нь хоорондоо тусгаарлалттай, хана руу харсан байрлалтай байгаа. Энэ нь хажуу хүндээ саад болохгүй, утсаар ярьж байгаа харилцагч руугаа төвлөрөх боломжийг олгож байгаа юм. 


Ширээний дэлгэц мөн л ямар мэргэжлийн хүн тус ширээн дээр юу хийхээс хамаараад өөр байна. Зураг зурдаг хүнд 2 дэлгэц болж сунадаг ширээ гэх мэтчилэн ажил үүргийн хуваарилалтаас шалтгаална. Ширээ, сандал болон бусад тавилгуудын материал эрүүл мэндэд хор нөлөө үзүүлдэггүй байх нь нэн түрүүнд тавигдах шаардлага юм. Үүнийг бид захиалагч талд санал болгодог харин сонгох үгүй нь захиалагч талын асуудал юм. 

Бүтээмж өндөртэй, сэргэг ажиллахад гэрэлтүүлэг чухал үүрэг гүйцэтгэдэг болов уу?

Интерьерт ерөнхий, декор гэж 2 төрлийн гэрэлтүүлэг байдаг. Байгалийн гэрлээс илүү заалны гэрэл ажиллахад хүнд саад болдоггүй. Байгалийн гэрэл эрүүл мэнд, агаар сэлгэлт, нян бактери устгах талаасаа хэрэгтэй ч ажиллах орчинд хүний нүүрлүү, биерүү тусах нь тухгүй байдлыг үүсгэнэ. Тус гэрлийг оффист тусгахаар шийдэх бол тусах газрын м.кв-ыг тооцдог. Дээрээс нь оффисын ерөнхий гэрлээ хаана, хэрхэн тусгах вэ гэдгээ тооцоолох хэрэгтэй. Хэт нүүр рүү тусах, компьютерийн дэлгэц рүү тусах, хэт хурц, хэт бүдэг, сүүдэрлэж араас тусах зэргийг маш сайн анхаарах хэрэгтэй. Тэр болгонд гэрэл хаана, хаана байрлах вэ гэдгийг интерьерийн мэргэжилтэн л гаргаж өгдөг гэсэн үг юм. 

Энэхүү булангаараа интерьерийн салбарт шинэ өнгө төрхийг бий болгож буй оффисын интерьерийг  танилцуулж, ажилтнуудад хэрхэн эерэг нөлөө үзүүлдэг талаарх мэдээллийг хүргэлээ.

СЭТГЭГДЭЛ БИЧИХ

АНХААРУУЛГА:
Та системд нэвтэрч орсоноор сэтгэгдэл бичих болон үнэлгээ өгөх боломжтой болно.

Холбоотой мэдээ