Улаанбаатар хотын хүн амын хэт төвлөрлөөс үүдсэн агаар, ус, хөрсний бохирдлыг бууруулах, тогтвортой хөгжлийн зорилтод нийцүүлэн эдийн засгийн тодорхой салбаруудыг хөгжүүлэх, хүн амыг эрүүл, аюулгүй орчинд ажиллаж, амьдрах таатай нөхцөлийг бүрдүүлэхийн тулд нийслэлийн дагуул хотыг байгуулж, хүн амын төвлөрлийг сааруулахын тулд хүн амыг эрүүл, аюулгүй орчинд ажиллаж, амьдрах нөхцөлөөр хангасан, агаарын тээвэр, аялал жуулчлал, шинжлэх ухааны цогцолбор төвүүд бүхий бизнесийн таатай орчинг бүрдүүлсэн Аэросити хотыг байгуулах “Хот байгуулалтын төслүүдийг уялдаатай төлөвлөх нь” сэдэвт хэлэлцүүлэг өнөөдөр \2020.08.11\ болов. Ерөнхий зохион байгуулалтыг Барилгын хөгжлийн төвийн Хүн амын нутагшилт бүс нутгийн судалгаа төлөвлөлтийн хэлтэс, Хот суурин дэд бүтцийн судалгаа төлөвлөлтийн хэлтэс хийлээ.

 Хэлэлцүүлэгт БХТ-ийн захирал Ц.Амарсанаа, Тэргүүн дэд захирал Б.Ганболд, Дэд захирал Б.Энхболд, БХБЯ-ны хот байгуулалт, газрын харилцааны бодлогын хэрэгжилтийн зохицуулах газар, ХАНСХЕТ-ийн туслан гүйцэтгэгчид, Нийслэлийн засаг даргын хэрэгжүүлэгч агентлаг “Хот байгуулалт хөгжлийн газар”, Хот байгуулалт судалгааны институт, Төв аймгийн Засаг даргын тамгын газар, Иргэний нисэхийн ерөнхий газар, ГЗБГЗЗГ-ын хот байгуулалтын хэлтэс зэрэг байгууллагуудын төлөөлөл оролцов.

 Олон Улсын шинэ нисэх онгоцны буудлыг түшиглэн босох Аэросити хот нийт 21993га газарт төлөвлөгдөж 34000 хүн амтай, 12 цэцэрлэг, долоон сургуультай байхаар төлөвлөсөн байна. Түүнчлэн агаарын зам, төмөр зам, авто тээвэр гэсэн тээврийн ложистикийн нэгдсэн зангилаа төв болох юм байна. Аэросити хотын гидрогеологийн судалгаагаар усны хайгуулыг дахин хийх, цахилгаан хангамжийн эх үүсвэрийг нэмэх шаардлагатайг дурдлаа.

 Зуунмод хотын хувьд ерөнхий төлөвлөгөө 2500га талбайд хийгдэхээр төлөвлөгдсөн. Баруун урд хэсэгтээ Сөүлийн их сургууль баригдаж, 1000 айлын орон сууц барихаар төлөвлөөд байгаа аж.  Цаашдаа нэмж 2000 айлын орон сууц баригдахаар батлагдсан гэнэ.

“Манзушир Өргөө” 1000 айлын орон сууцны 846 эхний ээлжид ашиглалтад оруулж, түүнд 100 хүүхдийн цэцэрлэг, 640 хүүхдийн багтаамжтай сургууль баригдахаар төлөвлөгдсөн байна. 100 хүүхдийн цэцэрлэг ашиглалтад орсон 640 хүүхдийн сургуулийн барилга угсралтын ажил дуусах шатандаа орж байгаа аж. Ухаалаг ногоон хотын зарчимд тулгуурлан 2015-2020 он хүртэл, 2020-2030 хүртэл хөгжүүлэхээр хийгджээ.

 Майдар хотын орох, гарах гарцыг долоо байхаар төлөвлөсөн. Энэ нь гэнэтийн аюул осол, байгалийн гамшигт үзэгдэл тохиолдоход оршин суугчид хотоос гарах боломжийг нээж өгсөн байна. Тогтвортой хөгжлийн бодлогоор, эко, ухаалаг хот хэмээн тодотгож байгаа Майдар хотод явган хүний зам 33%, нийтийн тээвэр 33% авто зам 33% байхаар төлөвлөөд байгаа юм. Хотын хүн амын өсөлт, нягтаршилттай холбоотойгоор дөрвөн үе шаттайгаар тэлэх боломжтой гэнэ.

 Майдар хотын төлөвлөлтөд олон улсад хүлээн зөвшөөрөгдсөн нэр хүндтэй RSAA компани архитектур төлөвлөлтийг боловсруулж, Trans solar компани зам тээврийг гэх мэтчилэн олон улсын компаниудыг оролцуулсан байна. Тиймдээ ч Майдар хот тогтвортой хөгжлийн бодлогоороо, эдийн засгийн өндөр өгөөж, байгальд ээлтэй эко гэсэн үзүүлэлтүүдээрээ олон улсад өндрөөр үнэлэгджээ.