Оффисын интерьер ажилтны бүтээмж, хандлагад нөлөөлдөг

Оффисын интерьер ажилтны бүтээмж, хандлагад нөлөөлдөг

Бид интерьер буландаа гадны оронд хийгдсэн интерьерийн мэдээлэл оруулахаас илүү Монголын интерьер дизайнеруудын ур чадварыг харуулсан тэдний хийсэн интерьерийн шийдлүүдийг онцлон цувралаар хүргэхийг зорьж байгаа билээ.

А.Батмөнх "Тэргүүн дизайн" ХХК-ийн захирал 

Өмнөх дугаарт 149м2 орон сууцанд хийж гүйцэтгэсэн интерьерийн шийдлийг танилцуулсан бол энэ удаагийн дугаартаа “Тэргүүн дизайн” ХХК-ий “M-Oil group”-ийн 450 м2 талбайтай оффист хийж гүйцэтгэсэн “Urban Modern Design” хэв шинжийг агуулсан интерьерийн шийдлийг онцлон хүргэж байна.

“Urban Modern Design” нь орчин үеийн хотын дизайны шинэ хэвмаяг гэж ойлгож болно. Энэхүү интерьерийн хэв маяг нь хөнгөн, агаартай орон зайг төлөвлөн түүндээ тохирсон зөөлөн өнгө, тавилга, чимэглэлийг түлхүү ашигладаг. Энэ урсгалд уламжлалт, минималист, тансаг гоёмсог хэв маяг бүгд ихбага хэмжээгээр багтаж байдгаараа туйлын онцлогтой юм. Жишээлбэл, геометрийн өвөрмөц хэлбэр бүхий эд зүйлс дээр уламжлалт хэв маягийн чимэглэлээр чимэглэхэд илүү эрч хүч оруулж өгдөг.  

Орчин үеийн оффисын дотоод засал чимэглэлийн чиг хандлага ньажилчдын бүтээмж, бүтээлч байдал, хамтын ажиллагаа, эрүүл мэндийг дээшлүүлэхэд чиглэгддэг. Шилдэг ажилчдыг татах, хадгалах өрсөлдөөн улам бүр нэмэгдэхийн хэрээр ажлын байрны чанар нь аливаа компани, байгууллагын чухал хүчин зүйлболдог. Цалин эсвэл санхүүгийн таатай нөхцөл нь чухал хүчин зүйл боловч энэ нь цорын ганц хүчин зүйл бас биш юм. Өнөөгийн ажиллах хүчний гол шаардлага нь уян хатан байдал, хамтын ажиллагаа, стрессийг бууруулах, бүтээлч сэтгэлгээг шаарддаг.

Ажилчид өдөр бүр найм болон түүнээс ч ихэнх цагаа ажил дээрээ өнгөрөөдөг тул бие махбодын ая тух, сэтгэл санааны стрессийг бууруулах зэргээр хүрээлэн буй орчныг тохижуулах нь тэдний хувьд хүчирхэг нөлөө үзүүлдэг хүчин зүйл болж өгдөг. Ганцаараа төвлөрөх, багаар ажиллах, ажлын ямар ч хэлбэрт тухайн ажлын орчин нь бэлэн байж байдаг, зай талбайг зөв ашигласан, тохь тухтай ажлын байр нь хүмүүсийн бие бялдар болон оюун санааны хувьд эерэг нөлөө үзүүлж, ажилчдын бүтээмжид шууд нөлөөлдөг нь судалгаагаар нотлогдсон байдаг.

Дээрх дэлхийн хэмжээний судалгаанд тулгуурлан, захиалагчийн хүсэл шаардлага, хүний нөөцөд үндэслэсэн загвар, дизайны шийдлийг зураг төсөлд буулган түүнийгээ бодитоор хэрэгжүүлж чадсан томоохон оффисын интерьер дизайны төслөө танилцуулж байна. 

ХУРЛЫН ӨРӨӨ  \40 м2\

Байгууллагын хурлын өрөө нь гадаад дотоодын олон зочид, төлөөлөгчид цугладаг бас нэгэн онцгой хэсэг учир ирсэн зочдод үнэ цэнэтэй, тав тухтай байдлыг бүрдүүлж өгөх нь маш чухал юм. Энэ өрөөнд үүдний хэсгээс эхлээд хоймор хүртэл тухайн байгууллагыг илтгэх гэрэлт металл логог Бразил байгалийн чулуунд ухаж суулгаснаар илүү уран гоёмсог, тансаг харагдуулж байгаа юм.


Талбайн төв хэсэгт мөн байгалийн чулуун тавцан бүхий 10 хүний зориулалттай дугуй хурлын ширээг төлөвлөн түүнийгээ дагасан тойрог хэлбэртэй, гэрэлтүүлэг, уналттай тааз хийсэн нь илүү агаартай цэлгэр харагдуулахад чухал нөлөө үзүүлж байгаа. Хананд нь арьсан, модон, металл болон шил зэрэг материал сонгосон нь өрөөг илүү тансаг, гоёмсог харагдах байдлаар шийдэж өгсөн.

АЖЛЫН ХЭСЭГ\350 м2 \


Байгууллагын тогтвортой оршин тогтнох, ажилчдын амжилттай ажиллах гол хүчин зүйлүүдийн нэг бол ажлын бүтээмж.  Бүтээмж өндөртэй ажиллахын тулд ажилчдыг илүү чөлөөтэй, тав тухтай, эмх цэгцтэй орчноор хангах нь чухал байдаг. Тиймээс энэхүү хэсэгт бид амьд ханын ургамал оруулж өгсөн.


Байгалийн ургамлын үнэр нь хүний тархи толгойг сэргэг байлгахаас гадна хүчилтөрөгчийг ихээр дамжуулж байдаг тул ажилчдад эерэгээр нөлөөлөх давуу талтай юм. Мөн модон эдлэл нь эрүүл мэндэд хор хөнөөлгүй эко байдаг учраас ажлын ширээний тавцанг модоор шийдэж өгсөн.


Ажиллах орчны хамгийн чухал хэсэг нь чимээгүй, нам гүм, тайван орчин байдаг. Ажилчдын алхах, ярилцах чимээ нь заалыг цуурайтуулж анхаарал сулруулах, төвлөрөх байдалд сөргөөр нөлөөлдөг тул дуу чимээг шингээх зорилгоор хивс дэвсэж өгсөн.  Хивсний хээг мөн ургамлын ногоон өнгөтэй хосолсныг сонгосон нь илүү өнгөлөг харагдуулж байгаа билээ.

ЦАЙЛАХХЭСЭГ  \20 м2\


Цайны өрөөг оффис дотор тусад нь шийдсэнээр ажилчдад эдийн засгийн хувьд хэмнэлттэйгээс гадна тав тухтай, хүссэн үедээ цайлах боломж бүрдүүлэх юм. Бид гал тогооны тавилгыг цулгуй цайвар өнгөөр сонгон түүнийгээ тодотгосон Марокко хээ бүхий плитагаар чимэглэж өгсөн. Цайвар өнгө нь талбайг цэлгэр харагдуулахаас гадна цэвэр цэмцэгэр, тав тухтай орчинг бүрдүүлж өгдөг.

ҮҮДНИЙ ХЭСЭГ \40м2\


Аль ч байгууллага руу ороход үйлчлүүлэгчдэд тав тухтай эерэг сэтгэгдэл төрүүлдэг хэсэг бол хүлээн авах буюу үүдний хэсэг байдаг. Тус оффисын үүдний хэсэгт байгалийн чулуун хананд байгууллагын нэр болон логог байрлуулж өгсөн. Энэхүү сүр хүчтэй асаж харагдах байдал нь үйлчлүүлэгч нарт хэр хариуцлагатай, бүтээлч, итгэл даахуйц байгууллага болохыг илтгэн харуулах хэсэг юм. Байгалийн чулуу, металл хийцийн хажуугаар цэвэр модон хийцлэл оруулж өгснөөрөө улам байгальд ойртуулахыг хичээсэн билээ.


Мөн энэ хэсэгт ресепшн буюу хүлээн авагч хүн зогсоогүй байгааг та анзаарсан уу? Тэгвэл бид энэ хэсэгт шинэ технологи ашигласан байгаа. Та уулзах хүнийхээ нэрийг ухаалаг дэлгэц дээр даран дуудах боломжтой гэсэн үг. Энэ нь байгууллагын соёлын нэг томоохон хэсэг болж чадсан юм.

Дашрамд дуулгахад 2020 оны оффисын интерьер дизайны чиг хандлагад Хойд Америк дахь олон мянган томоохон ажил олгогч нартай хамтран ажилладаг “Амбиус” компанийн дизайны зөвлөхүүд 2020 оны оффис дизайны макро ба микро чиг хандлагуудыг тодорхойлон гаргажээ. 2020 он болон түүнээс цааших онуудад ажлын байр төлөвлөлтөд эдгээр чиг хандлага нь ирээдүйд шууд чухал нөлөө үзүүлэхээр байна.

Макро чиг хандлага Динамик уян хатан байдал


Макро чиг хандлага Мод бол амьд байгаль

 Микро чиг хандлага  Гэртээ мэт ажлын байр

Микро чиг хандлага  Жигд өнгийн илэрхийлэл

СЭТГЭГДЭЛ БИЧИХ

АНХААРУУЛГА:
Та системд нэвтэрч орсоноор сэтгэгдэл бичих болон үнэлгээ өгөх боломжтой болно.

Холбоотой мэдээ