Тендер шалгаруулалтад оролцох тухай

Тендер шалгаруулалтад оролцох тухай

Барилгын салбарынханд тендер шалгаруулалтын талаарх мэдээллийг хаанаас авах, улсын хэмжээнд төрөөс зарлагддаг тендер шалгаруулалтууд хаана байршдаг, хэрхэн оролцох талаарх мэдээллийг хүргэж байна. 

Төрийн худалдан авах ажиллагааны газар нь төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай хууль болон түүнтэй нийцүүлэн гаргасан хууль тогтоомжийн актуудаар зохицуулагддаг байна. 

Цахим системийн  тухай

Монгол улсын засгийн газраас худалдан авах ажиллагааны үйл явцыг хурдан шуурхай, олон нийтэд хүртээлтэй, ил тoд, нээлттэй зохион байгуулах, түүнд тавих хяналтыг сайжруулах зорилгоор “Цахим худалдан авах ажиллагааны нэгдсэн систем”-ийг боловсруулсан байна. Уг систем нь худалдан авах ажиллагааны төлөвлөлт, тендер шалгаруулалт зохион байгуулах, үнэлгээ, гэрээ, нийлүүлэгчийн удирдлага, цахим шалгалтын нэгдсэн мэдээлэл солилцооны цахим тогтолцоог бий болгох зорилготой аж.

Төрийн болон орон нутгийн өмчийн хөрөнгөөр худалдан авч буй дээрх хуулиар зохицуулахгүй гэж зааснаас бусад бүх худалдан авалтын үйл ажиллагаа Төрийн худалдан авах ажиллагааны цахим систем /www.tender.gov.mn/-ээр зохион байгуулагдаж, холбогдох мэдээллүүд тус системд нэгтгэгддэг.


Тендерт оролцохыг сонирхогч этгээд нь;

  1. Хуулийн этгээд  

  2. Зөвлөх үйлчилгээний хувьд зөвлөх хувь хүн эсвэл хуулийн этгээд

  3. Олон нийтийн оролцоотой худалдан авах ажиллагааны хувьд иргэдийн бүлэг байх ба дараах байдлаар тендер шалгаруулалттай холбоотой мэдээллийг авч болно.

Төрийн худалдан авах ажиллагааны цахим системийн төлөвлөлт 

Тухайн жилд аль байгууллагаас хэдэн төгрөгийн төсөвтэй, ямар ажлын тендер шалгаруулалт хэзээ зарлагдахыг оны эхэнд худалдан авах ажиллагааны төлөвлөгөө батлагдах үед мэдэж, тендер шалгаруулалтад оролцох төлөвлөгөөгөө бэлтгэх боломжтой. Гэхдээ энэхүү мэдээлэл нь зөвхөн төлөвлөлт бөгөөд үүний гүйцэтгэл зөрж болохыг анхаарах хэрэгтэй. Тендерт оролцогч байгууллагууд хууль, эрх зүйн мэдлэг дутмаг байдгаас шалтгаалан хуульд заасан үүргээ мэдэхгүй, эрхээ эдэлж чадахгүй хохирох эрсдэлтэй байдаг тул хууль, эрх зүй цэс дээр байршсан хууль, журам, жишиг баримт бичгүүдтэй дэлгэрэнгүй танилцах шаардлагатай.

Тендер шалгаруулалтын урилга цэсээс; Зарлагдсан тендер шалгаруулалтын ерөнхий мэдээлэл, тендерийн баримт бичиг, техник, эдийн засгийн үндэслэл, тодруулгын хариу, гомдлын шийдвэрлэлт болон бусад шаардлагатай бүх мэдээллийг харах боломжтой.

Тендер шалгаруулалтын үр дүн цэсээс; Нээлтээ хийсэн тендер шалгаруулалтын оролцогч, тэдгээрийн ирүүлсэн үнийн санал, тендерийн баталгааны мэдээлэл болон хэн шалгарсан, хасагдсан зэрэг үр дүн,  явцын мэдээллийг мэдэх боломжтой. 

Оролцогчийн жагсаалт цэсээс; Аль байгууллага ямар тендер шалгаруулалтад хэрхэн оролцож байсан, оролцогчдын мэдээллийг компаниар нь ялган харах боломжтой. 

Тендер шалгаруулалтад оролцохдоо Тендер шалгаруулалтын урилга цэсээс сонирхсон тендерийн урилгаа хайж олон холбогдох бичиг баримтууд хэсгээс тендер шалгаруулалттай холбоотой бүх мэдээллийг үнэгүй татан авч танилцаад захиалагчийн тогтоосон шаардлагад нийцэж байгаа гэж үзвэл дараагийн алхмуудыг хийнэ. 

Өмнө нь тендерийн баримт бичгийг 100,000-аас 300,000 төгрөгөөр худалдан авдаг байсан нь өөрчлөгдөж 50,000 төгрөг төлдөг болсон байна. 

Та тендерийн материал илгээхийн тулд;

  1. Цахим системд бүртгүүлж, нэвтрэх эрхтэй болсон байх

  2. Үндэсний тоон гарын үсэг эзэмшигч болсон байх  \Цахим тендер шалгаруулалтын нууцлалыг Үндэсний тоон гарын үсгээр хангадаг байна\

  3. Тендерт оролцох хураамжийг цахим систем ашиглан банкны картын гүйлгээний системээр төлсөн байх

  4. Захиалагч байгууллагаас тендерийн баталгаа шаардсан бол харилцагч банканд хандан цахим тендерийн баталгаа гаргуулсан байх

  5. Тендерийн материалаа бэлтгээд PDF өргөтгөлтэй болгон хадгалсан байх зэрэг шаардлагуудыг хийснээр та тендерт хамрагдах бүрэн боломжтой юм шүү. 

Тендер шалгаруулалтын нээлт хийгдсэний дараа Оролцсон тендер шалгаруулалт цэсэд тухайн тендер шалгаруулалтын мэдээлэл харагдах бөгөөд тендерийн нээлтийн мэдээллийг үзэж болохоос гадна үр дүн гарсны дараа шалгарсан оролцогчийн нууц биш мэдээллийг оролцсон байгууллагууд нь үзэх боломжийг шинээр нээсэн байна.

СЭТГЭГДЭЛ БИЧИХ

АНХААРУУЛГА:
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ