Интерьерийг зөв шийдэх нь хүний сэтгэл, ухамсарт эерэгээр нөлөөлдөг

Интерьерийг зөв шийдэх нь хүний сэтгэл, ухамсарт эерэгээр нөлөөлдөг
Интерьер хэмээх орон зайн урлагийг Монгол улсдаа олон улсын төвшинд хөгжүүлэхийг эрмэлзэн ажилладаг хөдөлмөрч бүсгүйтэй интерьерийн салбарын талаарх сонирхолтой яриа өрнүүлснээ хүргэж байна. ШУТИС-ийн Барилга, архитектурын сургуулийг архитектор мэргэжлээр, СУИС-ийн Дүрслэх урлагийн сургуулийг Монументаль уран зураач мэргэжлүүдээр төгссөн, мэргэшсэн архитектор, “Феникс Интерьер” ХХК-ийн үүсгэн байгуулагч Э.Номундарийг "Барилгачны алдар" булангын зочноор урин оролцууллаа.




 


Өдрийн мэнд хүргэе. Таны хувьд интерьерийн чиглэлээр хэдэн жил ажиллаж байгаа вэ? Энэ хугацаанд Э.Номундарь гэдэг хувь хүнийг мэргэжил нь хэрхэн өөрчлөв? 

Интерьерийн чиглэлээр 8 гаруй жил ажиллаж байна. Мэргэжил минь надад цагтутамд суралцаж, өөрийгөө байнга хөгжүүлж байхыг ойлгуулсан. Олон хүнтэй харьцаж, юмыг олон талаас бодож, илүү хариуцлагатай хүн болгосон гэж боддог. Ээж минь архитектор мэргэжилтэй, ээжтэйгээ адил багаасаа зураг зурах дуртай байсан нь архитектор, зураач мэргэжил сонгоход нөлөөлсөн гэж бодож байна.


“Феникс Интерьер” ХХК-ийн захирлаар нь ажилладаг гэсэн. Яагаад компани байгуулах болов? 

“Феникс Интерьер” ХХК-ийг 2015 онд байгуулаад одоо интерьерийн зураг төсөл боловсруулах чиглэлээр үйл ажиллагаа явуулж байна. Компани байгуулах болсон шалтгаан нь нэгдүгээрт өөрийгөө сорьж бие даах, хоёрдугаарт Ром хотын барилгууд шиг, алдарт архитектор Заха Хадидийн бүтээл шиг тэр чигтээ урлагийн бүтээл болсон барилга цаашдаа зохион бүтээх мөрөөдөлтэйгээр үүсгэн байгуулж байлаа. Тиймээс интерьерээс эхэлж, бага багаар хөгжин дэвшиж, барилгын дотор орон зайг сайн төлөвлөж, сайн дизайн гаргаж сурсныхаа дараа барилгын зураг төсөл боловсруулах нь зөв гэж бодсонтой холбоотой. Компаниараа дамжуулж захиалагчдынхаа хүсэл, сонирхолд нийцсэн интерьерийн зураг төслийг гэрээт хугацаанд чанартай боловсруулахыг зорин ажиллаж байна. Анх компани байгуулахад бизнес сэтгэхүйгээс эхлээд маркетинг, менежментийн мэдлэггүй, баг хамт олныг удирдах, тайлан, санхүүгийн баримт бичиг боловсруулах зэрэг  бүгдийг нь шинээр сурах шаардлагатай болсон. Шинээр сурч мэдэх зүйл их байсан учраас гол ажилдаа төвлөрөхөд хэцүү байлаа. Одоо бол алдаанаасаа суралцаад дахиж давтахгүйн тулд хичээж, хамт олонтойгоо туршлагажиж байна.





Монголын интерьер дизайны хөгжлийг олон улсын төвшинд хүрэхэд хувь нэмрээ оруулахыг хүсдэг


Манай улсад интерьер дизайны салбар ямар төвшинд хөгжиж байна гэж боддог вэ?  

Дэлхийн чиг хандлага хаана явж байна тэр бүхнийг Монголын зах зээлд нэвтрүүлэхээр мэргэжлийн олон компани, хувь хүмүүс зорьж байна. Залуучууд pinterest, instagram, behance, archdaily гэх мэт сайтуудаас өдөр бүр өөрт хэрэгтэй мэдээллээ авч байна. Шинээр олон интерьерийн компани төрөн гарч, интерьер дизайныг олон нийтэд таниулах вэб сайт, ном, сэтгүүл, телевизийн нэвтрүүлгүүд гарч байгаа нь манай улсад энэ салбар хөгжиж байгааг харуулж байгаа болов уу? Түүнчлэн мэргэжлийн шинэ чиг хандлагаас суралцах, цаг үеэсээ хоцрохгүй байхын тулд олон улсад зохион байгуулагддаг интерьер дизайнтай холбоотой хурал, уулзалт, семинар, үзэсгэлэн зэрэг арга хэмжээнүүдэд интерьерийн компаниуд, хувь хүмүүс оролцож байна. Жил бүр зохион байгуулдаг Guangzhou, Design Shanghai, Salone Del Mobile, Homi Outdoor, Furniture China  гэх мэт үзэсгэлэнгүүдийг үзэж, шинэ тоног төхөөрөмж, технологи, барилгын материалын хөгжлийг судлан, интерьер дизайн,тавилгын чиг хандлагыг сонирхон нэвтрүүлэх, үйлдвэрлэх, худалдаалах зэрэг олон ажил хийгдэж байна. Барилгын салбартай ойр байдаг хүмүүс л интерьер дизайныг мэргэжлийн компанид даатган хийлгэх нь ямар чухал болохыг ойлгосон байдаг, харин бусад нь интерьерийг зөвхөн гэр орныг чимэглэх төдий зүйл гэж ойлгодог. 


Интерьер дизайн нь барилгад яагаад хэрэгтэй вэ?

Интерьер гэдэг нь “дотоод” гэсэн утгатай франц үг гэдгийг хүн бүр мэдэх байх. Интерьер дизайны гол зорилго нь аливаа зүйлсийн орон зайг гоо зүйн хувьд төгс төгөлдөр болгож, дээд зэргийн тав тухтай, тааламжтай орчинг бий болгоход чиглэгддэг учир бидний амьдралын хэв маягийг бүрэн тодорхойлж байдаг. Зохиолч Томас Мертон “Бидний амьдралын аялал бол интерьер дизайн юм” гэж хэлсэн байдаг. Хүн амьдралынхаа ихэнх цаг хугацааг барилга дотор өнгөрөөдөг. Тиймээс нэгэн хэвийн ижил төстэй орчинд байх нь мэдээж уйтгартай. Хүн болгоны дотоод ертөнц, гоо сайхныг мэдрэх мэдрэмж өөр байдаг учраас амьдрах орчноо өөрсдийн онцлогт тохируулан сонирхолтой болгосноор орчноосоо баяр баясал, эерэг мэдрэмж авчтав тух,  аз жаргалыг мэдэрдэг шүү дээ. Бидний эргэн тойронд байгаа эд зүйлс, материал, өнгө, харьцаа, зохиомж, зохицол зэрэг нь зөв шийдэгдсэнээр бидний бие, эрүүл мэнд, сэтгэл санаа, ухамсарт нөлөөлж,цаашид гаргах шийдвэр, үйлдлүүдэд шууд нөлөөлж байдаг. 


Интерьер дизайн нь дотроо олон урсгал, чиглэлтэй байдаг. Үүнийг манайхан тэр бүр ялгаж чаддагүй юм шиг санагддаг. Урсгалуудын талаар танилцуулна уу?

Интерьер дизайны олон төрлийг ерөнхийд нь түүхэн, угсаатны, орчин үеийн гэсэн үндсэн гурван урсгал, чиглэлд хуваадаг. Сүүлийн үед дэлхий глобалчлагдсантай холбоотой олон урсгалыг хооронд нь хольж хийдэг болсоноор ХАОС буюу эмх замбараагүй, эмх цэгцгүй гэсэн санааг илэрхийлсэн урсгал бий болсон. Монголд модерн классик, контемпорари болон минимализм усргал түлхүү хөгжиж байгаа. Дэлхий дахинд (Sustainable design) тогтвортой, байгальд ээлтэй (Eco friendly design) буюу хог хаягдал багатай, байгаль орчинд хоргүй,  дахин боловсруулсан материал ашиглах, хүнд хэрэгтэй, цөөхөн, чанартай байх гэх мэт өргөн хүрээтэйгээр дизайныг гаргадаг болсон. 


Ямар төрлийн интерьерийн шийдэл хийж байгаагаас нь тэр хүний дотоод сэтгэлийг мэдэх боломжтой 


  

Бага тэнгэрийн аманд байрлах 600м2 бүхий тансаг зэрэглэлийн амины сууцны интерьерийн зураг төсөл 2020 он


Монгол хүний зан чанар гэх юм уу, дотоод сэтгэл зүйд тохирох интерьерийн хэв маяг аль нь вэ? 

Манай улсад социализмын үед эдийн засаг, техникийн боломжоосоо хамаараад дотоод засал чимэглэлийн сонголт хомс, хэдхэн төрлийн материалаар шийддэг байсан. Харин одоо зах зээлийн, харилцаанд шилжсэнээр барууны болон дэлхийн өндөр хөгжилтэй улс орнуудын интерьерийн элементүүд орж ирсэн. Тэгэхээр маш их боломжууд гарч ирж байна. Монголчууд зөвхөн ном, сэтгүүлээс гоё сайхныг мэдрэх биш гадаадын олон орноор аялж барилга архитектурыг сонирхвол дотор орон зай нь ямар л бол ямар байж болно гэдгийг ойлгох байх гэж боддог. Манайд интерьерийг голдуу цагаан хана, тааз, модон шалаар л төсөөлдөг. Сонин содон хэлбэртэй, тод хурц өнгөтэй орчныг бүрдүүлэхээс эмээдэг. Илүү баялаг сэтгэхүйгээр төсөөлж, урлагийн бүтээлийг зөвхөн ханын зураг гэж үзэлгүйгээр Монументаль урлагийг барилгын гадна, дотор тусгаж, туршилт хийхээс айхгүй байгаасай гэж хүсдэг.


Энэ оны интерьер дизайны чиг хандлага ямар байгаа вэ?

Дизайны ихэнх чиг хандлага дэлхийн загварын нийслэл болох Миланаас гаргасан загварын чиг хандлагад тулгуурладаг. Милан, Парис, Нью Йорк, Москва зэрэг хотуудад интерьер их хөгжсөн байдаг. Гадны орнуудад хотжилт нь олон жилийн түүхтэйгээс гадна иргэдийн боловсрол, хотын  болон урлагийн соёл, аж үйлдвэрлэл илүү их хөгжсөнтэй холбоотойгоор интерьер хурдан хувьсан өөрчлөгддөг байх гэж ойлгодог.

Энэ онд ерөнхийдөө 70, 80-аад оны диско клубын дизайн, тансаг зэрэглэлийг хослуулж байна. Өнгөний хувьд зөөлөн ногоон буюу олив маягийн ногоон өнгө, саарал шаргал, зөөлөн улбар шар өнгө болон хүрэн улаан буюу тогтвортой, ихэмсэг, тайван өнгүүдийг ашиглаж байна. 2020 онд байгальд xор учруулаxгүйгээр тансаг xэв маягийг амьдарч буй орчиндоо бий болгож, xог xаягдлыг даxин боловсруулан, түүнийгээ интерьер дизайны материал болгон xувиргаx, мөн орчин үеийн тавилгын элементэд ашиглаж, байгалийн тэнцвэртэй байдлыг хадгалах үүднээс теxнологид тулгуурлан шинэ материалууд гаргаж байгаа нь зөв санагдаж байгаа. 


Интерьерийг төлөвлөхөд хамгийн чухал зүйл нь юу вэ?

Интерьерийн зураг төсөл нь хүний ахуйн хэрэгцээ, эрүүл мэнд, аюулгүй байдлыг хангасан байх ёстой. Ялангуяа галын аюулгүй байдлыг анхаарч, холбогдох норм, дүрэм, стандартыг сайн баримталж төлөвлөх хэрэгтэй. Энгийн жижигхэн деталиуд дээр анхааралгүй хандаж алдаа гаргадаг. Жишээ нь тавилга тавихаар зохицохгүй, цахилгаан хэрэгсэл залгах гэхээр розетка нь холдох, эсвэл тавилга нь таглах гэх мэт. Бас нэгэн чухал зүйл бол гэрэлтүүлэг. Ханандаа обой сонгох, ханаа будах бол байгалийн гэрэл буюу өдрийн  нарны  гэрэлд сонгож байх хэрэгтэй. Эд юмс нь материал болон хийцээсээ хамааран гэрэлд янз бүр харагддаг. Манайхны нэг дутагдал нь судалгаагүй шууд гадны загваруудыг хуулбарлан дуурайсан байдаг. Мөн хөгжлийн бэрхшээлтэй хүн, ялангуяа харааны, сонсголын бэрхшээлтэй, тэргэнцэртэй хүмүүст зориулсан төлөвлөлтийн норм, дүрэм, стандартыг сайн мөрдөж, интерьерийн шийдэлдээ заавал тусгах хэрэгтэй. 


Барилгын зураг төсөл боловсруулахдаа интерьерийн зургийг тусад нь хийх ёстой юу?

Уг нь интерьерийн зураг төслийг тусад нь боловсруулж, шаардлагатай зардлыг нь тооцвол хүний хэрэгцээнд таарсан төсөл болно. Гэхдээ ихэнхдээ интерьерийн зураг төсөл хийлгүй технологийн байгуулалтын схем  зураг дээр тойм төлөвлөлт л хийдэг. Барилга хаалгатай, цонхтой, розеткатай, гэрэлтэй гэж л төлөвлөхөөс тэдгээрийг хүний хэрэгцээнд тааруулан яаж зохион байгуулахыг нарийн төлөвлөөгүй байдаг. Олон давхар орон сууц болон амины сууцны хувьд өөр өөр байдаг. Орон сууцны хувьд шинэ байранд орчихоод дахин засал хийх боломжгүй хүмүүст олон байдаг. Тэдэнд зориулаад анхнаасаа зөв интерьерийн шийдэл хийх хэрэгтэй гэсэн санаа юм. Хүн болгонд таалагдсан интерьер гэж мэдээж байхгүй учраас таалагдахгүй бол хувь хүмүүс дахиад өөртөө таалагдах шийдлийг боломжтой бол хийж болно.



Үндэсний номын сангийн интерьерийн зураг төсөл 2019


Таны хувьд интерьерийн төсөл дээр ажиллахдаа ямар арга барилаар ажилладаг вэ?

Миний хувьд зураач учраас захиалагчдаа интерьер болон экстерьерт ханын чимэглэлийн их олон төрөл байдгийг ойлгуулахыг хичээдэг. Монументаль урлаг гэдэг нь уран барилгын гадна болон доторх нүсэр том уран зураг ханын чимэглэл, уран баримал гээд бүхий л төрлийг хамруулсан бүтээлийг хэлдэг. Жишээ нь Монголд “Зайсан толгой” байна. Захиалагч талтай нээлттэй ярилцлага хийж, судалгаагаа эхлүүлээд эхний эскизээ танилцуулан ярилцаж, өөрчлөлт, шинэ санаа оруулан зургийн даалгавраа захиалагчаараа батлуулж, төслийн хэмжээнээс хамааран хугацаагаа тохирох зарчмаар ажил явагддаг.


Манай интерьер дизайнерууд сүүлийн үеийн технологийн ололтыг хэр ашиглаж байна вэ? 

Сайн ашиглаж байгаа. Жишээ нь тавилгууд хананаасаа гарч ирдэг, эвхэгддэг, олон зориулалтаар ашиглаж болдог байх гэх мэт орон зайг үр дүнтэй зөв ашигласан сонирхолтой шийдэлтэй тавилгууд ихээр гарч байна. Ухаалаг систем хөгжиж, алсаас удирдлагаар хянах, тохируулах, удирдах боломжтой болсон. Мөн чулуу, плита шиг харагддаг эко будаг, замаска, эмульс, сайн чанарын E1, E0 зэрэглэлийн хавтан, тавилгын төрөл бүрийн тоноглол гэх мэт сүүлийн үеийн технологийг интерьер дизайнерууд ашиглаж байна. Зах зээлийн эрэлт нэмэгдэж, цахим орчноос мэдээлэл авах бүрэн боломжтой болсон нь давуу тал шүү. 


Интерьер дизайнер хүн хуулах биш, шинээр сэтгэж, бүтээх нь гол зарчим гэж боддог


Гадны интерьер гэхээсээ илүү Монголын түүхэн ахуйн соёлын интерьер шийдлийг манайхан илүү сонирхдог шүү дээ.

Хийгдээгүй зүйл олон байгаа учраас Монголын хувьд надад их боломж харагддаг. Хөгжүүлэх, шинээр сэтгэж хийх боломж их байна. Гадаадын интерьерийг хуулахаасаа илүү суралцах нь зөв. Архитектор, интерьер дизайнер хүн хуулах биш, шинээр сэтгэж, бүтээх нь гол зарчим гэж боддог. Техник, технологи хөгжиж, хүн бүр ухаалаг утас барихыг хүсэж байгаатай адил орчин үеийн тавилгатай, өвөрмөц интерьертэй сууцтай болохыг зорьдог болсон. Би хувьдаа Монголын түүхэн ахуйн соёлын интерьер шийдлийг ашиглан илүү өөрийн дотоод мэдрэмждээ тулгуурласан шинэ дизайн гаргахыг илүү гэж үздэг. Манай залуу интерьер дизайнерууд сүүлийн үед шинэ зүйлс туршиж, хийж бүтээхийг эрмэлзэж, монгол брэнд гаргаж байгаа нь их таалагдаж байгаа. Манай компани МPM center-д байрлах Мандала лоунжийг Монгол гэрийн тооно, унийг орчин үеийн хэв загварт оруулан хийж, гүйцэтгэж байсан.




 Монгол гэрийн тооно, унийг орчин үеийн хэв загварт оруулсан интерьерийн зураг төсөл 2018 он 


Таны ажиллаж байсан төслүүдээс хамгийн их сэтгэл ханамж өгч байсан төслөөсөө дурдана уу?

Дэлхийн банкны санхүүжилтээр Хөдөлмөр, нийгмийн хамгааллын яамны санаачлагаар орон нутгийн Хөдөлмөр, халамж үйлчилгээний газар /ХХҮГ/- уудын шинэчлэх засварын ажлын төсөл өнгөрсөн жилээс хийж эхлээд одоо ч үргэлжилж байна. Монгол орныхоо аймгуудаар явж,  орон нутгийн хөгжилд хувь нэмэр оруулж байгаа минь надад хамгийн их сэтгэл ханамж өгсөн ажлуудын нэг гэж хэлж болно. Аймгуудын “ХХҮГ”-уудыг шинэчлэн интерьерийн шийдэл гаргаж, дотор засал хийх, тохижуулах, хөгжлийн бэрхшээлтэй \ХБИ\ буюу харааны, сонсголын бэрхшээлтэй, тэргэнцэртэй хүмүүст зориулан төлөвлөлтийн норм, дүрэм, стандартын дагуу ариун цэврийн өрөөг шинээр гаргах, тоноглол тавих, орох, гарах, зорчих хэсгүүдийг шинэчлэн засах ажлууд хийгдэж байгаа нь сайхан хэрэг шүү. 


Интерьерийн чиглэлээр үйл ажиллагаа явуулдаг компаниудын өрсөлдөөн ямар байгаа вэ?

Гадны орнуудад интерьерийн компаниуд орон сууц, олон нийт гэх мэтчилэн хуваагдан түүндээ мэргэшсэн байдаг бол Монголд төрөл бүрийн чиглэлээр ажиллаж байна. Учир нь Монголд интерьерийн үйлчилгээ авах боломжтой хувь хүн, аж ахуйн нэгж, байгууллага цөөхөн байдагтай холбоотой. Захиалагч тал интерьерийн зураг төсөл, дотор засал, тавилгын үйлдвэрлэл, төсөв, тооцоо гаргах үйлчилгээ зэргийг нэг дор хийдэг компанид хандах сонирхолтой байдаг. Манайд Аззурра, Рендер, Саясанаа зэрэг интерьерийн чадварлаг компаниуд цөөнгүй болсон. Өрсөлдөгчид гэж харахаасаа илүү хамтарч Монголын интерьер дизайны салбарыг хөгжүүлэх хүслээр туршлага судлан суралцаж, хийсэн төслүүдийг нь сонирхон борлуулдаг материал, бүтээгдэхүүний мэдээлэл авч төсөлдөө тусган ажилладаг. Томоохон компаниуд үндэснийхээ мэргэжлийн байгууллагаар интерьер дизайнаа хийлгэснээр компаниуд өргөжин тэлэх, өсч хөгжих боломжийг олгож, том компаниудыг дагаж жижиг, дунд үйлдвэрлэл хөгжинө гэж хардаг.


Мэргэжлийн компаниар дамжуулан интерьерийн шийдлээ хийлгэх нь ямар давуу талтай вэ?

Мэргэжлийн интерьер дизайнерт хандана гэдэг ажлынхандаа, гэр бүл, өөртөө, эрүүл мэнддээ хийж буй хамгийн зөв хөрөнгө оруулалт байдаг. Интерьер дизайнер хүн олон нийтийн барилгын интерьерийн зургийг боловсруулахдаа тухайн байгууллага үйлчлүүлэгчдийн нүдэнд ямар харагдах, үйлчлүүлэхэд хэр тухтай байх вэ? гэх мэт олон талын асуудлыг шийдэж, маркетинг, брэндинг хийхэд нь тусалдаг. Тэр байгууллагын дүр төрхийг илэрхийлэх орон зайг бүрдүүлэх, онцлог шинжийг тодруулсан санааг тусгасан байхаар төлөвлөж өгдөг. Төсөвтөө тааруулж, оновчтой шийдэл гаргуулах нь  мөнгө, цаг хугацаагаа хэмнэх боломжтой юм. Ямар ч зөвлөгөөгүйгээр өөрсдөө хийгээд дараа нь санаанд таарахгүй байх, нурааж буулгах, үнэтэй тавилга нь төсөөлснөөс өөр байх гэх мэт асуудлууд гарч ирдэг тул эхлээд зөвлөгөө авах нь хамгийн чухал. Мэргэжлийг нь эзэмшсэн хүн л  мэргэжлийн зөвлөгөө өгнө шүү дээ. 

Хувь хүмүүсийн өөрсдийн эдэлж, хэрэглэдэг зүйлс, хоббигоороо цуглуулсан цуглуулга нь хүртэл интерьерийг илүү сонирхолтой болгодог.




149 м2 амины орон сууцны интерьерийн зураг төсөл 2020 он 


Интерьер дизайны шийдлийг хувь хүмүүс өөрсдөө хийхэд юун дээр алддаг вэ?

Амьдралын хэв маягаа сайн тооцоолоогүй байдгаас үүдэн төлөвлөлт болон өнгө, тавилганы сонголт дээрээ алдсан байдаг. Интерьер нь олон хүчин зүйлсээс хамаардаг, тэр болгоныг хувь хүмүүс олж хардаггүй. Аль болох хямд материалаар шийдэх гэдэг. Олон жил эдэлж хэрэглэх чанартай материал ашиглаж, сайн гүйцэтгэл хийдэг компани болон хувь хүмүүсээр хийлгэх хэрэгтэй. Харамч хүн хоёр дахин төлдөг гэж үг хүртэл байдаг шүү дээ. Тиймээс анхнаасаа сайн чанарын, загварын хувьд хэдийд ч моодноос гардаггүй тавилга материал сонгох хэрэгтэй. Жишээ нь алдартай уран бүтээлчийн бүтээсэн тавилга, гар хийцийн эртний эдлэл зэрэг нь цаг хугацаа өнгөрөх тусам улам үнэ цэнэтэй болдог. Ялангуяа, шал, цонх, хаалга, ариун цэврийн өрөөний тоноглол зэргийг байнга авч солиод байхгүй учраас чанартайг нь сонгох нь зөв. Энэ нь эргээд хог хаягдал багатай, байгальд ээлтэй байна. 

     

Манайхны нэг дутагдал нь гадны загваруудыг шууд хуулбарлан дуурайсан байдаг


Тэгвэл оффис, албан байгууллагуудын хувьд? 

Оффисд ажилтнуудынхаа эргономик хэрэгцээг маш сайн бодож, ажлын байрны хэрэгцээ, шаардлага, ая тухтай ажиллах нөхцөлийг хангах талаас нь тохижуулж, ажиллах, урам зориг авахуйц сайн дизайны шийдэл гаргаж чадаагүй байдаг. Өндөр бүтээмжтэй, сэтгэл ханамжтай ажиллахад ажлын байрны дотоод зохион байгуулалт, уур амьсгал, өнгө төрх чухал нөлөө үзүүлдэг. Орчин үед ажлын бүтээмжийг цалин, урамшууллаар хөшүүрэгдэх уламжлалт арга барилаас илүүтэйгээр ажлын байрны тав тухтай орчныг бүрдүүлж өгөх нь ажилтнуудыг урт хугацааны туршид бүтээлчээр ажиллахад нөлөөлдөг болжээ. Ажилтнуудынхаа тав тухтай ажиллах, сэргэх хэсэг, байршлаа сольж ажиллах, амрах зэрэг олон хэрэгцээг бүрдүүлсэн шийдлээр оффисоо зохион байгуулах нь тэдний бүтээмжийг 20 хувиар нэмэгдүүлдэг болохыг судлаачид тогтоосон байдаг. Байгалийн гэрлийг түлхүү ашиглах, байгалийн өнгө аяс оруулж, оффисын орчинг илүү амьд болгох нь стрессийг бууруулж, бүтээмжийг нэмэгдүүлдэг. Эрч хүчтэй өнгө ашиглах нь сэтгэл зүй, тархины үйл ажиллагаанд эерэгээр нөлөөлдөг гэх зэрэг олон аргууд байдаг.


Та үндсэн ажлаасаа гадна өөрийгөө хэрхэн хөгжүүлдэг, чөлөөт цагаараа сонирхдог зүйл байдаг уу? Хувийн карьертаа хэрхэн анхаардаг вэ? 

Давхар зураач мэргэжилтэй учраас дотоодод зохион байгуулдаг зургийн үзэсгэлэнгүүд болон  Олон улсын эмэгтэй зураачдын үзэсгэлэнд оролцож байсан. Мөн 2012 онд бие даасан уран бүтээлийн үзэсгэлэн гаргасан. Зургаараа дахин үзэсгэлэн гаргахаар төлөвлөж байна. Гэхдээ дан зураг гэхээсээ илүү интерьертэй холбосон байдлаар гаргая гэсэн бодолтой байгаа. Үүнээс гадна чөлөөт цагаараа спортоор хичээллэж, хувцас загварын ертөнцийг сонирхдог.


Компанийхаа хийж, гүйцэтгэсэн ажил болон цаашдын төлөвлөгөөний талаар? 

Манай компани өнгөрсөн жил 120 мянгатад байрлах гүүрэн гарц, Үндэсний төв номын сан, Япон ресторан, сургууль, шүдний эмнэлэг, зочид буудал мөн амины сууц, хотхоны интерьерийн зураг төсөл зэрэг олон ажил гүйцэтгэсэн. Он гарснаас хойш  Багшийн дээд сургуулийн өмнөх замын нүхэн гарц, 4 хаусын интерьерийн зураг төслийг боловсруулсан. Цаашдаа захиалагчийн санал бодол, цаг хугацааг хүндлэх, архитектор хүний ёс зүйтэй байх, мэдээж мөн шинийг эрэлхийлж санаачлах, баг, хамт олноороо хамтдаа хөгжих зарчмыг баримталж, Монголынхоо интерьер дизайны хөгжлийг олон улсын төвшинд хүрэхэд хувь нэмрээ оруулахыг хүсдэг. Мөн интерьерт хөгжлийн бэрхшээлтэй иргэдэд зориулсан саадгүй орох, зорчих эрхийг чухалчилж, энгийн иргэдтэй хамтдаа амьдарч, ажиллахад нь таатай нөхцөлийг бүрдүүлсэн байх ёстой байдаг. Энэ талын судалгааг нарийн хийж, төсөлдөө түлхүү тусгахаар төлөвлөн ажиллаж байна. 


Сонирхолтой яриа өрнүүлсэн танд баярлалаа. Амжилт хүсье!

 



Монголын интерьерийн салбарын өнөөгийн байдал, хөгжил дэвшил, тулгамдаж буй асуудлуудын талаар дэлгэрэнгүй тайлбарлан интерьер нь байгууллагын брэндинг, маркетингийн нэгэн хэлбэр, хувь хүмүүсийн тав тухтай амьдралын эхлэл гэдгийг уншигчдад ойлгуулсан үр өгөөжтэй ярилцлага боллоо. Монголын түүх, ахуйн соёлын интерьерийг дэлхийд таниулахыг зорилгоо болгосон “Феникс Интерьер” ХХК-ийн чадварлаг  хамт олонд зорилгоруугаа тэмүүлэх алхам бүрд нь амжилтыг хүсэе. 


Холбоотой мэдээ