Барилгын салбарын хамгийн олон оролцогч, үзэгчтэй “Barilga Expo” үзэсгэлэн 13 дахь жилдээ амжилттай болж өндөрлөлөө. Улс орон даяар өндөржүүлсэн бэлэн байдалд шилжиж, олон нийтийн үйл ажиллагаа явуулахыг хориглосон энэ цаг үед салбартаа анх удаагаа цахим хэлбэрээр “Barilga Expo-2020”  олон улсын үзэсгэлэнг зохион байгууллаа.

Энэхүү үзэсгэлэн нь орон зай, цаг хугацаанаас үл хамааран салбарын аж ахуй нэгж байгууллагуудын борлуулалтыг нэмэгдүүлэн, хэрэглэгчдэд аюул эрсдэлгүйгээр сонголт хийх боломжийг олгосоноороо барилгын салбарт цахим хувьсгалыг авчирч,  нэгэн шинэ дэвшлийн эхлэл боллоо. 

Цахим үзэсгэлэнд барилгын материал, шинэ орон сууц, амины орон сууцны чиглэлээр үйл ажиллагаа явуулдаг 100 орчим компаниуд оролцож, 5 өдрийн турш та бүхэнд үйл ажиллагаа, төсөл хөтөлбөр, бараа бүтээгдэхүүнээ танилцуулаад байна. Мөн эдгээр өдрүүдэд “Хот төлөвлөлт, байгуулалт” “Үл хөдлөх хөрөнгийн зах зээл” “Материал үйлдвэрлэгч ба ханган нийлүүлэгч” “Амины орон сууц” “Барилгын маркетинг” гэсэн сэдвүүдийн хүрээнд мэргэжилтнүүд, холбогдох албан тушаалтнуудын илтгэл, сургалт, хэлэлцүүлэг barilga.mn пэйжээр шууд дамжуулагдан хүрлээ. 

Энэ удаагийн цахим үзэсгэлэн явагдсан barilgaexpo.mn сайтын хандалт өдөртөө 35 000 - 50 000 хүрч, нийтдээ 200 000 - 350 000 орчим хэрэглэгч цахим талбайгаар зочилсон байна. Дашрамд дуулгахад цахим үзэсгэлэнгийн үйл ажиллагаагаа өнөөдрөөр дуусаж байгаа хэдий ч дараагийн үзэсгэлэн болтол компаниуд цахим талбайдаа байршсаар байх бөгөөд цаашид ч хэрэглэгчид үзэж сонирхож болох юм. 

Үзэсгэлэнг зохион байгуулах хорооны зүгээс жил бүр шилдэг оролцогчдыг 5 номинацийн дагуу шалгаруулдаг бөгөөд уламжлал ёсоор энэ жилийн шилдгүүд тодорлоо. 

Барилгын материалын үйлдвэрлэлээ тэргүүлэгч аж ахуйн нэгжийг алдаршуулдаг “шилдэг үйлдвэрлэгч” - ээр “Сайхан Төмөрт” ХХК шалгарлаа. 

“Сайхан Төмөрт” ХХК нь 2007 онд байгуулагдсан бөгөөд одоо байдлаар гадаад худалдаа, төмрийн худалдаа, төмөр хийц, ган бүтээцийн болон хавтангийн үйлдвэрлэл, барилга угсралтын чиглэлээр үйл ажиллагаа явуулж байгаа үндэсний шилдэг үйлдвэрлэгчдийн нэг юм. Тэд 2019 онд хөдөлмөрийн эрүүл мэнд, аюулгүй байдлын менежментийн тогтолцоо ISO 41005, олон улсын чанарын менежментийн тогтолцоо ISO 9001 стандартуудыг нэвтрүүлэн, олон улсын стандартыг хэрэгжүүлэн ажиллаж байгаа юм. 

Барилгын материалын импорт, худалдааны чиглэлээр үйл ажиллагаа явуулж байгаа шилдэг аж ахуйн нэгж байгууллагуудыг алдаршуулдаг “Шилдэг ханган нийлүүлэгч”  - ээр “Номин Мишээл” ХХК 

Номин Мишээл ХХК нь барилгын салбартаа хамгийн том дотор заслын материалыг импортлогч, ханган нийлүүлэгч, барилга, үйл хөдлөх хөрөнгийн салбарын төрийн болон хувийн хэвшлийн байгууллагуудын тулгуур багана болж, бүгдийг нэгэн дээвэр дор нэгтгэсэн бүтээн байгуулалт юм. Нийт 4350 метр квадрат бүхий талбай, хамгийн сүүлийн үеийн шинэ загварын шоурүүм, бүх төрлийн барилгын материалыг нэг дороос авах боломжийг бүрдүүлсэн Монголын хамгийн том БАРИЛГЫН ХАЙПЕРМАРКЕТ билээ. 

Тэд дэлхийд тэргүүлэгч брэнд үйлдвэрлэдэг, албан ёсны дистрибьютерын эрхтэй 140 орчим компанитай хамтран ажиллаж, гадаад болон дотоодын ханган нийлүүлэгчдээс 30 гаруй категорийн 20,000 орчим нэр төрлийн барааг татан авч хэрэглэгч, үйлчлүүлэгчиддээ хүргэж байна.

Барилгын салбарт, үйл ажиллагаандаа шинэ дэвшилтэт технологийг амжилттай нэвтрүүлэн ажиллаж байгаа үндэсний шилдэг ААНБ - ыг алдаршуулдаг “Шилдэг дэвшилтэт технологи нэвтрүүлэгч” - ээр “Анд Энерги” ХК

“Анд Энерги” ХК нь эрчим хүчний угсралт, суурилуулалт, автоматжуулалтын чиглэлээр анх үүсгэн байгуулагдсан бөгөөд 2014 онд Монгол анх удаа 150-300 гэрэл үйлдвэрлэх хүчин чадал бүхий дэвшилтэт технологийн LED гэрлийн үйлдвэрийг барьж, ашиглалтад оруулсан. Одоогоор үйлдвэрлэлийн, албан тасалгааны, аж ахуй нэгжийн, аялагч, малчдын, гудамжны, хонгилын тусгай зориулалтын зэрэг 30 гаруй нэр төрлийн LED гэрлийг Монгол хүний оюуны хүч хөдөлмөрийг шингээн, дэвшилтэт технологийг ашиглан эх орондоо үйлдвэрлэхийн зэрэгцээ цахилгааны угсралт, суурилуулалт үйлдвэрлэлийн автоматжуулалтын ажлыг хийж байна.

Барилга, Орон сууц, үл хөдлөх хөрөнгийн төслийг амжилттай хэрэгжүүлж ашиглалтад оруулсан шилдэг ААНБ - ыг шалгаруулдаг “Шилдэг төсөл хэрэгжүүлэгч” юм. Ингээд “Шилдэг төсөл хэрэгжүүлэгч” номинацийн эзнээр  “Баганат Өргөө” ХХК шалгарлаа 

Баганат Өргөө компани нь 1998 оноос барилга угсралт, материал үйлдвэрлэл, сантехник, цахилгааны угсралт, зураг төсөл, төсөв боловсруулах, гадаад дотоод худалдаа, импорт, экспорт, реэкспортын салбаруудад үйл ажиллагаа эрхлэн ажиллаж байна. АНУ-н бетоны холбооны гишүүн, МУ-н барилгачдын холбооны гишүүн байгууллага, Монголын инженерүүдийн холбооны гишүүн байгууллагаар ажилладаг нь салбарынхаа хөгжил, дэвшилд өөрсдийн хувь нэмрээ оруулж, нийгмийн идэвхтэй мэргэжлийн, шилдэг байгууллага гэдгийг илтгэж байна. 

Цахим үзэсгэлэнгийн хамгийн сүүлийн номинац болох “Шилдэг оролцогч” - оор  “Бульдорс Мон” ХХК.  Энэ удаад бид хамгийн шилдэг цахим талбайн тохижилт, зочилсон хүний тоо болон үзэсгэлэнд оролцож байгаа үйл ажиллагаагаа олон нийтэд хамгийн сайн сурталчлан түгээсэн компанийг энэхүү номинацийн ялагчаар тодруулсан юм. 

"Бульдорс Мон" ХХК нь олон улсын стандартад хангасан барилга, орон сууцны ган хаалга, өрөө хоорондын хаалга, тусгай зориулалтын хаалга, аваарын хаалга, орцны хаалга зэргийг хэрэглэгчддээ хүргэж байна. Энэхүү компани нь ОХУ-ын Казань хотын Ган хаалганы үйлдвэрийн албан ёсны борлуулагчаар сонгогдон өөрийн орны хэрэглэгчдэд нийлүүлж байгаа юм. Мөн 2005 оноос ОХУ-ын Модус-Н компанийн барилгын орцны хаалга нийлүүлж ирсэн туршлага дээр үндэслэн бусад бүхий л төрлийн хаалгыг үйлдвэрлэгчээс шууд хэрэглэгчийн гарт нийлүүлэх боломжийг бүрдүүлэн ажиллаж байгаа компани юм.

Дашрамд дуулгахад хэдийгээр “Barilga Expo -2020”  цахим үзэсгэлэн өнөөдөр өндөрлөж байгаа хэдий ч оролцогч компаниудын цахим талбай байршсаар байх болно. Тиймээс хэрэглэгчид та бүхэн barilgaexpo.mn сайтаар зочлон холбоо харилцаа тогтоох боломж хэвээр байгаа гэдгийг дуулгахад таатай байна. 

Ерөнхий зохион байгуулагч: Барилга МН

Хамтран зохион байгуулагч: БХБЯ, БХТ 

Ивээн тэтгэгч: “Юмэко” ХХК