Мөрөөдлийг бодит болгох “ногоон сууц” хотхон

Мөрөөдлийг бодит болгох “ногоон сууц” хотхон

НАМА төсөл буюу Барилгын салбарын хүлэмжийн хийн ялгарлыг бууруулах арга хэмжээний хүрээнд  Улаанбаатар хотын Сонгинохайрхан дүүргийн 1-р хорооны нутаг дэвсгэр буюу Баянголын ам Найрамдал зуслангийн урд талд пассив стандартын “Ногоон сууц” хотхоныг төлөвлөж байна.

Хүчин чадлын хувьд 65м2, 76м2, 87м2, 135м2 гэсэн дөрвөн төрлийн талбайн сонголттой нийт 80 айлын хотхон юм.

80 айлын хотхоны хүрээнд хэмнэлтийн үр дүнг тоогоор илэрхийлбэл дулааны эрчим хүчний хэрэглээ 101,136кВ/ц.жил буюу дундаж амины сууцаас 18 дахин бага, хүлэмжийн хийн ялгаруулалт 95% бага (684тн/жил) байна.

Ногоон барилгын тухай ерөнхий ойлголт

Эрчим хүчний хэмнэлтийг авчирч буй Пассив барилын стандартыг ярихын тулд ногоон барилгын ерөнхий ойлголтыг дурдах хэрэгтэй. Ногоон барилга гэдэг бол байгалийн нөөцийг хамгийн бага хэмжээгээр хэрэглэж улмаар бага хаягдал ялгаруулдаг байгууламж юм. Хүнээр бол бага агаар амьсгалж, бага хоол идэж, цөөхөн хувцас өмсөж ингэснээрээ бага агаар бохирдуулж, бага ялгадас ялгаруулж, бага зүйл худалдаж авч мөнгөнд хэмнэлттэй байна гэж ойлгож болох юм.

Барилга нь цэвэр агаар (оршин суугчдад цэвэр агаараар хангах), дулааны эрчим хүч (оршин суугчдын тавтай нөхцөл +18 градусаар хангах), цахилгаан эрчим хүч (гэрэл, ахуйн хэрэгслүүдийг ажиллуулах), ус (ундны болон ахуйн хэрэглээг хангах) гэсэн нөөцүүдийг хэрэглэж бохир ус (хэрэглээнээс гарсан), хог хаягдал (хэрэглээнээс гарсан болон барилгын нураах үеийн) зэрэг хаягдал гаргаж байдаг ба LEED, BREEAM, Passivehouse гэх мэт олон улсын ногоон барилгын стандартуудад дээрхи нөөцүүдийн зүй зохистой ашиглалт болон хог хаягдлын менежментийг тусгасан байдаг.


Том газар нутагтай боловч дэд бүтэц сул хөгжсөн, эрчим хүчний хувьд хараат байдаг манай оронд дулааны болон цахилгааны хэрэглээгээ бууруулах замаар эрчим хүчний ачааллаа тогтворжуулж улмаар сэргээгдэх эрчим хүчний чадлаа нэмэгдүүлэх замаар эдийн засгийн хөгжлийг дэмжигч суурь дэд бүтэц болох эрчим хүчний хувьд тусгаар болох боломжтой. Үүнийг бодит болоход том түлхэц болох шийдлүүдий нэг нь Пассив (Passivehouse) стандарт юм.

Пассив барилгын шалгуур үзүүлэлтүүд

Пассив (Passivehouse) стандарт бол барилгын дулаан болон цахилгаан эрчим хүчний хэмнэлтийг хамгийн өндөр үр ашигтайгаар төлөвлөх боломжийг олгодог аргачлал юм.


Пассив барилгын стандарт нь дараахь дөрвөн үзүүлэлтээр тодорхойлогддог.


  1. Халаалтын жилийн хэрэгцээ 15кВц/м2

Өөрөөр хэлбэл сардаа дулааны төлбөрт 200.0мян.төг төлдөг байсан бол 10.0мян.төг төлнө гэсэн үг бөгөөд дийлэнх дулаанаа нарнаас авдаг.

  1. 50Па даралтын үед цагт 0.6-аас ихгүй агаар солилцож байхуйц битүүмжлэлтэй байх

Энэ нь барилгын битүүмжлэл ердийн барилгатай харьцуулахад 4-5 дахин сайжирна гэсэн үг юм.

  1. Өрөөний дотор температур 250С –ээс дээш гарах хугацаа жилд 10%-аас ихгүй байх

Энэ нь зуны улиралд байшинд хэт халж тухгүй нөхцөл бүрдэхгүй гэж ойлгож болно.

  1. Халаалт, хэрэглээний халуун ус, цахилгааны хэрэглээний 60кВц/м2 –аас хэтрэхгүй байх

Эрчим хүчний хэмнэлттэй барилгын халаалтын хэрэгцээ нь 30кВц/м2 - 150кВц/м2 хооронд байдаг бөгөөд пассив барилга бол эрчим хүчний хэмнэлтийн хувьд маш бага гэдгийг харж болохоор байна.

Дээрхи хэмнэлтийг бий болгож буй үндсэн таван шийдэл байдаг. Эдгээр бүх тооцоо төлөвлөлтийг Пассивхаус институтээс гаргадаг PHPP программ дээр гүйцэтгэдэг. Үүнд:

Зураг #03

  1. Дулаан тусгаарлалт өндөртэй хаших хийц – 0.07 В/м2К

Эрдэс хөвөн дулаалга 65см

  1. Сайн чанарын цонх - 0.65 В/м2К

Аргон дүүргэлт бүхий дөрвөн давхар шилтэй, LowE түрхлэгтэй

Дулаан тусгаарлалт өндөртэй хөнгөн цагаан өнгөлгөөтэй модон хүрээ 106мм

  1. Агаар битүүмжлэл – n50 = 0.4

Битүүмжлэлийн хальс

Цонх, хаалганы битүүмжлэлийн тусгай наалт

  1. Дулааны гүүргүй төлөвлөлт -  ᵠ=0.001 В/мК
  2. Дулаан солилцууртай агааржуулалтын систем – 92%-н үр ашигтай байна.

Энэ дугаартаа бид мөрөөдлийг тань бодит болгох барилгын дулаан болон эрчим хүчний хэмнэлтийг үр ашигтайгаар төлөвлөж буй “Ногоон сууц” хотхоны ерөнхий төлөвлөгөө ба уг төслөөс 87 м2 талбайтай сууцны танилцуулгыг хүргэж байна.

“Ногоон сууц” 80 айлын хотхоны  ЕРӨНХИЙ ТӨЛӨВЛӨГӨӨ:

Хотхоны хүчин чадал:

Амины сууцны тоо - 80 айл

Халаалтын эрчим хүчний зарцуулалт 15кВц/(м2жил); нийт: 108,915кВц/жил

Хөргөлтийн эрчим хүчний зарцуулалт 0кВц/(м2жил); нийт: 0кВц/жил

Хүлэмжийн хийн ялгаруулалт 348.5тн/жил

Халаалтын эрчим хүчний хэмнэлт 95% (Монголын стандарттай харьцуулалт)

Төлөвлөлт:

1. "Ногоон хотхон"-ы төлөвлөлтийн 30,702.6м2 талбайн 30хувь буюу 10,892.0м2

барилгажилтын талбайтайгаар төлөвлөв.

2. Пассив барилгын стандартыг хангах үүднээс бүх амины сууцуудыг урд зүг харуулсан бөгөөд нарны тусгалыг хамгийн өндөр түвшинд авна.

3. Талбайн ерөнхий төлөвлөгөөг тохижилтод тавигдах шаардлагын дагуу орчинтойгоо уялдуулан ногоон байгууламж, зам талбайд гэрэлтүүлэг болон хяналтын камер байрлуулсан болно. Хотхоны хүчин чадалд харгалзах ил авто зогсоолтойгоор төлөвлөв.

4. Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлага баримт бичгийг баримтлан авто зам болон явган зам талбай, ногоон байгууламжтай уялдуулан нэгдсэн байдлаар төлөвлөсөн болно.

5. Гадаргуугийн ус зайлуулах арга хэмжээг орчны барилгуудтай уялдуулж талбайн

хэмжээнд иж бүрэн шийдсэн.



87 м2 талбайтай БАРИЛГЫН ҮЗҮҮЛЭЛТ:



-       Барилгын ашигтай талбай 87м2 (102.5м2)

-       PHPP халаалтын хэрэгцээ 15.4кВц/(м2жил)

-       PHPP халаалтын ачаалал 19В/м2

-       PHPP хөргөлтийн хэрэгцээ --

-       Хэт халалтын давтамж (>250С) 9%

-       Хэт чийгшилтийн давтамж (>12гр/кг) 0%

-       Битүүмжлэл (даралтын зөрүү n50 1/h) 0.4

-       Анхдагч эрчим хүч хэрэгцээ (PE) 125кВц/(м2жил)

ТӨЛӨВЛӨЛТ:

"Ногоон хотхон"-ы 87м2 амины сууц нь тэнхлэгээрээ 9,5м*7м хэмжээтэй ба эрчим хүчний хэмнэлттэй /пассив хаус/ байлгах зорилгоор архитектурын болон инженерийн шийдлүүдийг төлөвлөсөн.

1. Архитектурны форм /Хэлбэр/ - 87м2-тай сууцны хэлбэрийг эдийн засгийн хэмнэлттэй ба пассив сууцны үндсэн шаардлагуудыг хадгалсан орчин үеийн архитектурын шийдлээр төлөвлөв.

Үүнд: - Сууц бүрийн нарны ээвэрлэлт өндөр байхаар байрлуулав.

- Урагшаа харсан цонхыг өвлийн нар хамгийн ихээр ордог байхаар ихэсгэсэн

- Цонхны хаалт, сүүврэвчийг халаалтын улиралд нарны элчийг хамгийн ихээр авах,

зуны улиралд нарны эгц тусгалыг хаахуйцаар төлөвлөв.

2. Зохион байгуулалт:

 - 1-р давхарт зочны өрөө, гал тогоо, ариун цэврийн өрөө, гонх,

техникийн өрөө, террас

-       2-р давхарт 2ш унтлагын өрөө, ванны өрөө, амрах хэсэг зэргийг төлөвлөсөн ба бараг бүх өрөө нь өөрийн гэсэн давуу талуудтай байхаар төлөвлөв.

Үүнд:

-       Зочны өрөөг хамгийн тохиромжтой хэмжээгээр хамгийн их нарны гэрэл ордог байхаар төлөвлөсөн. /Дотор тавих тавилгыг 6-8 янзаар тавих боломжтой/

-       Гал тогоо нь болон хооллох хэсэг нь зүүн хэсэгт гадагшаа гарсан шилэн хаалгатай байхаар төлөвлөсөн. /Өглөөний нар тусах хэсэг ба террас руу шууд гарах боломжтой/

-       Зочны өрөөний дээд хэсэг нь давхар дундын хучилтгүй ба 2-р давхрын амрах хэсгээсээ шууд харагдахаар төлөвлөсөн. /Нарны гэрлийг тэгш хувиарлах ба үндсэн гол хэсэг болох зочны өрөөний хэсгийг саруулхан том харагдуулж, 2-р давхрыг 1-р давхартай илүү сайн ойртуулж холбож өгөх давуу талтай/

-       Унтлагын өрөөнүүд бүгд урагшаа харсан болон дотор VOID-руугаа харсан цонхтой байхаар төлөвлөв. /Дотор талруугаа харсан цонхыг агаар сэлгэлтийн зорилгоор давхар ашиглахад бүрэн тохиромжтой/

-       Ариун цэврийн өрөөнүүдийг хамгийн тухтай байхаар хэмжээтэй хийсэн. /Давхар бүрт нь ашиглахад хамгийн тохиромжтой хэрэгслүүдийг тавьсан/



ДААЦЫН БҮТЭЭЦ:

  1.  Архитектур төлөвлөлтийн даалгаврын дагуу цутгамал төмөр бетон шугаман суурьтай, ОСБ хавтан дүүргэлттэй хөнгөн ган бүтээц бүхий ханатай бөгөөд дээврийн шувуун нуруун татангыг хөнгөн ган бүтээцээр төлөвлөв.
  2. Хүйтнээр хэлбэржүүлсэн G550 ангийн, зэврэлтээс хамгаалж Z275 цайр түрхлэгтэй хөнгөн ган бүтээц сонгоно.

ХАШИХ БҮТЭЭЦ:

  1. Хана - 0.068В/м2К Дотор талаасаа 12мм гипсэн хавтан, агаарын үе (90мм зузаантай даацын Си профиль), 15мм ОСБ хавтан, 650мм эрдэс хөвөн зулхай дулаалга, 9мм зузаантай ОСБ хавтан, уур ус тусгаарлагч цаас, агаарын үе (50мм Си профиль), нугалмал төмөр фасад
  2. Шал - 0.085В/м2К Дотор талаасаа 5мм PVC шал, 200мм хөнгөн бетон, ус чийг тусгаарлагч хальс, 300мм XPS дулаалгын хавтан, ус чийг тусгаарлагч хальс
  3. Дээвэр - 0.069В/м2К Дотор талаасаа 12мм гипсэн хавтан, агаарын үе (90мм зузаантай даацын Си профиль), 15мм ОСБ хавтан, 650мм эрдэс хөвөн зулхай дулаалга, 9мм зузаантай ОСБ хавтан, уур ус тусгаарлагч цаас, агаарын үе (50мм Си профиль), дээврийн нугалмал төмөр

ЦОНХ, ГАДНА ХААЛГА: Uw=0.67В/м2К

  1. Шилэн багц - Дөрвөн давхар шилтэй, Kr 90% крептон дүүргэсэн, MULTI-TECH G хуванцар спейсэртэй, шилэн багц

- Дулаан дамжуулалт, Ug 0.49В/м2К

- Нарны цацраг нэвтрүүлэлт g=0.53

  1. Хүрээ, рам - Нягт EPS дулаалгын материалаар дулаалсан, 56мм зузаан мод, хөнгөн цагаан хосолмол рам

- Дулаан дамжуулалт, Uf 0.43В/м2К

  1. Цонх суулгахдаа хэсэглэлд үзүүлсний дагуу агаарын битүүмжлэл наалт болон дулаалгыг заавал хийх шаардлагатай.
  2. Гадна хаалганы өртөгийг бууруулах зорилгоор дээрхи үзүүлэлттэй цонхыг хаалганд ашиглана.
  3. Гадна хаалганы аюулгүй байдлыг хангах үүднээс гадна талд нь төмөр торон хаалга нэмж хийж өгөв.

ДУЛААНЫ ГҮҮР:

Дулаан алдагдал өндөртэй барилгын хаших бүтээцийн залгаасууд болох суурь, хана, шал, хучилт, дээврийн уулзваруудыг Ψ<0.001В/мК буюу дулааны гүүргүйгээр төлөвлөв.

ХААЛГА:

-       Дотор модон хаалгыг зурагт үзүүлсэн хэмжээний дагуу наамал хуулгатай MDF хаалга байхаар төлөвлөв.

-       Ариун цэврийн өрөөний хаалгыг агаар сэлгэлтийн урсгалыг хангах зорилгоор доод хэсэгтэй модон сараалжтай байхаар сонгосон болно.

АГААР СЭЛГЭЛТИЙН СИСТЕМ:

  1. Пассив барилгын стандарт болон дотор агаарын чанарыг хангах зорилгоор өндөр үр ашигтай дулаан солилцууртай агааржуулалтын системтэйгээр төлөвлөв. Системийн үзүүлэлт:

- Агаар сэлгэлтийн чадал 220м3/ц

- Дулаан солилцуурын утга 92%

- Цахилгааны чадал 0,24Вц/м3

- Өгөх агаарын температур 16,50С

- Агаарын алдагдал гадна 0,47%, дотор0,25%

- Дуу чимээний үзүүлэлт 25дБ - 30дБ

- Дотор агаарын чанар F7 ба G4

  1. Өвлийн улиралд төхөөрөмжийн мөсжилтөөс хамгаалж агаар оруулах хоолонд агаар халаагч нэмж суурилуулна.

ШАЛ:

  1. Бүх шалыг зурагт үзүүлсэн шалны тодорхойлолтын дагуу хийж угсарна.
  2. Дулаан хуримтлуулах зорилгоор дулаан масс болгож 1-р давхрын шалыг 200мм зузаантай хөнгөн бетоноор дүүргэж өгсөн.

ГАДНА ЗАСАЛ:

  1. Салхины сийгэлт болон дулаалга чийг авахаас хамгаалж TYVEK брэндийн уур ус тусгаарлагч цаасаар бүрж өгнө.
  2. Нүүр талын зураг тусгасны дагуу тохирох өнгө кодтой фасадны метал хавтан, модон рейк болон чулуун хавтангаар өнгөлнө.

ДОТОР ЗАСАЛ:

Гипсэн хавтангаар дүүргэж угаадаг эмульсээр өнгөлнө.



СЭТГЭГДЭЛ БИЧИХ

АНХААРУУЛГА:
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ