Жуулчны гудамжны хойно байрлах Нийслэлтийн өмчийн III дугаар байр “Урт цагаан” үйлчилгээний төвийн барилгыг дахин төлөвлөх концепц, загвар зураг төсөл боловсруулах 30 сая төгрөгийн шагналын сантай уралдаан зарлагдлаа. 

Уралдаанд зураг төслийн мэргэжлийн байгуулага, хувь хүн, мэргэжлийн уран бүтээлчид, мэргэжлийн сургуулийн оюутан залуус, олон нийтийн болон төрийн бус байгууллагууд оролцох боломжтой юм. Концепц, загвар зураг төсөл боловсруулах хугацааг 2020 оны 04 дүгээр сарын 20 - оос 05 дугаар сарын 11 - ний өдрийг хүртэл зарлаж бөгөөд бүтээлийг сүүлийн өдрийн 10 - 16 цагийн хооронд “Хангарди” ордон “Хот байгуулалт, хөгжлийн газар” хүлээн авах юм байна. Нэг оролцогч хэдэн ч бүтээл ирүүлж болох юм. 

Ирүүлсэн бүтээлүүдийг Нийслэлийн хот байгуулалт, хөгжлийн газрын албан ёсны сайтад нийтлэн, олон нийтийн саналыг онлайнаар авч, уралдааны удирдамжид заасан шалгуур үзүүлэлтүүдийг үндэслэн уралдааны комисс шалгаруулах юм. 

Бүтээлүүдэд тавигдах гол шаардлага нь бүтээлийн санаа, шинэлэг байдал, үндэсний онцлог, түүх, соёлын хэв шинжийг агуулсан, байгаль орчинд ээлтэй, дэвшилтэт технологийн шийдэл бүхий олон төрлийн зориулалтаар ашиглах нөхцөлийг хангасан, иргэд олон нийтийн  худалдаа, ахуйн үйлчилгээ явуулах, албан контор болон үйлчилгээний зориулалттай ашиглах боломжтой байхаар төлөвлөх юм. 

Тэмцээний дэлгэрэнгүй мэдээллийг энд дарж уншина уу