Дэлхий нийтээрээ ногоон барилгын үзлийг баримтлан ажиллаж байгаа энэ цаг үед Монголдоо эрчим хүчний хэмнэлт, автоматжуулалтыг хөгжүүлж,  эрчим хүч хэрэглэх процессын аюулгүй, найдвартай, үр ашиг бүхий тогтвортой үйл ажиллагааг хангахын төлөө ажиллаж байгаа "Шнайдер Электрик" компанийг бид энэ удаад онцоллоо. 

Энэхүү байгууллага нь дэлхийн зуу гаруй оронд, 150 мянга гаруй ажилтны  тусламжтайгаар 2019 оны дүнгээр 27 тэрбум еврогийн борлуулалтын орлоготой ажилласан компани юм. Энгийн нэгэн унтраалганаас эхлэн нарийн төвөгтэй ажиллагаатай иж бүрдэл системүүдийг автоматжуулах боломжоор хангаж, уялдаа холбоо бүхий техникийн дэвшил, инновацийг бүх төвшинд хүргэх технологиуд нь үйлдвэрийн уламжлалт хэв маяг, хот төлөвлөлтийг өөрчилсөөр байна.

Ногоон хөгжлөөрөө дэлхийд тэргүүлэгч "Шнайдер Электрик" компанийн Монгол дахь салбарын систем инженер, мэргэшсэн инженер Н. Бат-Оршихтой уулзаж, энэхүү дэвшилтэт технологиудын талаар ярилцлаа. 

“Ногоон барилга” гэж юу вэ? гэдгээс ярилцлагаа эхлье гэж бодож байна. Учир нь “Шнайдер Электрик” компани нь үүний эд эсийг нь үйлдвэрлэдэг гэж хэлж болохоор байгаа шүү дээ.

Аливаа барилга байгууламж архитектур, ландшафт, инжинерингийн системүүдээс бүрэлдэн төлөвлөлт хийгддэг. Тиймээс барилгын цахилгаан болон механик системүүдийн тухайд буюу барилгын автоматжуулсан системийн хувьд “Ногоон барилга” гэж юу вэ? гэдэг өнцгөөс яръя гэж бодож байна. 

Дэлхий нийтийн тогтвортой хөгжлийг хангах зорилгын хүрээнд барилга барих, ашиглах, буулгах бүх үе шатанд ногоон барилгын шалгуур үзүүлэлтийг авч үздэг болсон. Тухайлбал зураг-төсөл, угсралт, хүлээлгэн өгөх, ашиглалт, барилга ашиглалтаас гарах үед тухайн барилгад хэр хэмжээний байгалийн нөөц (барилгын материал), эрчим хүч, ус ашиглалт, хүлэмжийн хийн ялгарлын нөлөөлөл, хог хаягдлын зохицуулалтын асуудлууд буюу дахин боловсруулах төвшин, байгаль орчинд сөрөг нөлөө багатай, хүний эрүүл мэнд, аюулгүй ажиллагаанд нийцтэй байх шаардлагуудыг хангасан байх нь “Ногоон барилга” буюу “Тогтвортой барилга”- ын  үндсэн шалгуур үзүүлэлтүүд байдаг. Товчхондоо эрчим хүч болон нөөцийг оновчтой ашиглах удирдлагын систем нэвтрүүлсэн (Ухаалаг барилга), байгалийн нөөц баялагийг хэмнэсэн барилгын материал ашигласан, сэргээгдэх эрчим хүчний бие даасан шийдэл агуулсан зэрэг ногоон архитектур төлөвлөлттэй, тогтвортой ажиллагаатай байх гол онцлог шийдлүүд тусгагдсан байх ёстой юм. Энэ чиглэлээр дагнаж ажилладаг мэргэжлийн байгууллагууд ногоон барилгын батламж сертификатыг олгодог бөгөөд дэлхийд тэргүүлэх ногоон барилгын жагсаалтыг гаргасан байдаг. 

Шнайдер Электрикийн хувьд инновацийг бүх төвшинд хүргэх эрхэм зорилготой, байгаль орчны шаардлагуудад нийцсэн барилгын төлөвлөлтөд тухайн барилгын өнцөг булан бүрт суурилуулсан ухаалаг төхөөрөмжүүдээс эхлээд тэдгээрийг 3 төвшинд холбон ажиллах барилгын автоматжуулсан систем болох экостракшур (EcoStruxure) хэмээх IoT технологи дээр суурилсан иж бүрэн платформыг хөгжүүлж дэлхий даяар 1 сая гаруй барилгад суурилуулсан туршлагатай юм. 

Монголд “ногоон барилга” гэдэг ойлголт хэр хөгжиж байна уу? 

Манай нөхцөлд ногоон барилга, ухаалаг барилга, эрчим хүчний хэмнэлтийн талаар сүүлийн үед их яригддаг боллоо. Эрчим хүчний хэмнэлттэй, ногоон шийдэлтэй, ухаалаг хаусуудад зарим ААН, хувь хүмүүс хөрөнгө оруулж, хэрэгжүүлсэн ажлууд олон бий. Жишээлбэл, Сэргээгдэх эрчим хүчний геотермаль эх үүсвэртэй буюу газрын гүнийн дулаан ашиглаж халаалт, хэрэгцээний халуун усаа шийдсэн, гар утасны GSM сүлжээ ашиглан алсаас удирддаг цахилгаан халаалтын болон гэрэлтүүлгийн удирдлага, ухаалаг гэрийн системүүдийг зуслангийн сууц, хаусууддаа хийсэн үр ашигтай шийдлүүд олон байгаа. Хөдөө орон нутагт өргөн хэрэглэдэг, бага оврын нарны эх үүсвэртэй шийдлүүд тэр чигээрээ ногоон шийдэл мөн. Харин салбарын хэмжээнд хууль эрхзүйн орчинг сайжруулж, төрийн болон мэргэжлийн байгууллагуудаас бодлого, стратегиа зөв боловсруулах, илүү том зургаар харж, энэ чиглэлийн норм, дүрэм, стандартчилал, инноваци, арга туршлагыг нутагшуулан авах шаардлага бий.  

Ногоон барилга, ухаалаг барилгын хувьд барилгын салбарын хувийн хэвшлийн оролцоо, үндэсний хэмжээний том барилгын компаниудын хөрөнгө оруулалт илүү их чухал байдаг. Эдгээр компаниуд маань Монголын барилгын салбарын ирээдүйг урьдчилан харж, дэлхий нийтийн хөгжлийн чиг хандлагыг даган ногоон барилгын шийдэлд анхаарал хандуулан, эх орондоо нэвтрүүлж эхлэн түүчээлэх болно гэдэгт итгэлтэй байна.

“Эрчим хүчний хэмнэлт” дэлхийн гол чиг хандлагуудын нэг болоод байна. Харин Монголд хэмнэх сэтгэлгээ “тааруу” юм уу даа гэж харагддаг. Эрчим хүчийг яагаад хэмнэх ёстой юм бэ? 

Санал нэг байна. Орчин үеийн глобал мегатрендүүд болоод байгаа хотжилт, эрчим хүч хэрэглээний тасралтгүй өсөлт, цахилгаан машины хэрэглээ зэргээс үүдэн дэлхийн барилгуудын хэрэглээ нийт үйлдвэрлэн нийлүүлж буй эрчим хүчний 50 хувиас давж, цаашид ч өсөн нэмэгдэх хандлагатай байна. Нөгөө талаас дэлхийд манлайлагч улс гүрнүүд эрчим хүчний хэрэглээний энэхүү тасралтгүй өсөлтөөс улбаатай дэлхийн дулаарал, хүлэмжийн хийн ялгарал, цөлжилтийг бууруулах зорилгоор Парис хотод чуулан тунхаглал гаргасан. Энэ зорилгын хүрээнд сэргээгдэх эх үүсвэр, эрчим хүчний хэмнэлтийг дэмжих, байгаль орчны сөрөг нөлөөллүүдийг бууруулах ногоон хөгжлийн үзэл баримтлалыг улс орон бүр гарган, зорьж хэрэгжүүлэхээр үүрэг хүлээн ажиллаж байгаа билээ. 

Монголын эрчим хүчний салбарын хувьд “Эрчим хүч хэмнэлтийн хууль” боловсруулан батлуулж, 2018 оныг эрчим хүч хэмнэлтийн жил болгон зарлаж, үүрэг хүлээсэн хэрэглэгч зэрэг тодорхой бодлого баримтлан хөшүүргийн арга, механизмууд авч хэрэгжүүлж эхэлсэн байна. Үүнтэй холбоотой цахилгаан станцууд, түгээх,  дамжуулах сүлжээний байгууллагууд, эрчим хүч ихээр хэрэглэдэг үүрэг хүлээсэн хэрэглэгч буюу томоохон компаниуд эрчим хүч хэмнэлтийн чиглэлд дорвитой арга хэмжээнүүд авч, эрчим хүч хэмнэлтийн менежер, эрчим хүчний аудитор зэрэг мэргэжлийн орон тоо гаргаж, тоног төхөөрөмжүүдээ шинэчлэх, сайжруулах чиглэлд хөрөнгө оруулж эхлээд байна.

 Харин Монголд хэрэглэгч буюу барилга, орон сууц, ахуйн хэрэглээний төвшинд эрчим хүчний хэмнэлт гэх ойлголт явцуу хүрээнд байгаа нь дэлхийн түвшинтэй харьцуулахад эрчим хүчний тариф бага байгаатай холбоотой гэж салбарын мэргэжилтнүүд онцолдог. Зөвхөн LED гэрэл, ялтсан дулаан солилцуур, давтамж хувиргагч зэрэг тоноглолыг хязгаарлагдмал хүрээнд суурилуулсанаар зөв шийдэж байна гэж ойлгож болохгүй. Эдгээр захын тоног төхөөрөмжүүдийг нэгдсэн удирдлагатай программ хангамжаар удирдан, ухаалаг систем болгож интеграцид оруулснаар орчин үеийн дижитал технологийн 3 төвшинд шилжиж ажиллах боломжтой IoT платформ бүхий иж бүрэн шийдэл сая бүрдэж, хэмнэлтийг бодитоор гаргах чадамжтай болох юм.

ЭД ХЭРЭГСЛЭЭ ГАР УТАСНААСАА ХЯНАЖ УДИРДАХ БОЛОМЖТОЙ 

- IoT платформ гэж та ярьлаа. Энэ ямар технологи юм бэ? Барилгад ямар давуу тал, ач тусыг бий болгож байгаа вэ?  

- Орчин үед ухаалаг системүүд дижитал технологийн үсрэнгүй хөгжлийн хүчээр бүх түвшинд нэвтэрсээр байна. Энгийн ахуйн цахилгаан хэрэгслүүд IoT (Internet of Things)  холболттой ухаалаг системтэй болохоос эхлэн барилга, аж үйлдвэр, дэд бүтцийн бүх системүүд IT/OT (мэдээллийн технологи, ашиглалтын технологийн процесс) платформуудыг холбосон үл үзэгдэх интеграцчилалд нэгдэн аж үйлдвэрийн IV хувьсгалд хөтөлж байна. Өөрөөр хэлбэл хэрэглэгч гэр ахуйн хэрэгслээ ухаалаг утаснаас удирдахаас эхлэн үйлдвэрийн процессын автоматжуулалтыг хиймэл оюун ухааны тусламжтайгаар ажиллуулан, оператор нь таблетнаасаа хаанаас ч хянах боломжтой боллоо. IoT буюу интернэт, сүлжээнд холбогдох боломжтой тоног төхөөрөмж, эд хэрэгслээ хэрэглэгч аппликэйшн ашиглан гар утас, таблет, компьютерээсээ хянаж удирдах боломжтой. Мөн энэ бүх өгөдлүүдийг цуглуулсан мэдээллийн санд үндэслэн ухаалаг удирдлагын систем, аналитик программ хангамжуудад (ПХ) нэгтгэснээр хиймэл оюун ухаанаар зохицуулах боломжтой болсон. Дэлхий даяар 5 тэрбум машин-механизм, тоног төхөөрөмжүүд IoT холболтод бэлэн болсон гэж үзэж байна. Барилгад IoT технологи бүрэн хэрэгжих боломжтой бөгөөд одоо баригдсан байгаа барилгуудад ч ашиглагдаагүй байгаа боломж их байна. 

IoT технологи нь барилгын зардлыг багасгаж,  эрчим хүчний үр ашгийг 50 хувь нэмэгдүүлэх боломжийг бий болгож байна.Мөн цагийн менежментийг оновчтой болгох боломжийг нээж байна. Үүнээс гадна, барилгын амьдралын мөчлөгийн процессыг дижитал хэлбэрт оруулах нь хурдацтай дэлгэрч, үл хөдлөх хөрөнгө /ҮХХ/ эзэмшигчид нь дизайн, бүтэц, ашиглалтын шат дамжлагуудаас нэмэлт үр өгөөж, хэмнэлт хүртэх боломжийг олгож байгаагаараа давуу талтай юм. 

Гэхдээ ихэнх барилга байгууламжууд хэтэрхий олон алдаатай, ашиглаж сурахад хэтэрхий олон системтэй байдаг нь эцэстээ их хэмжээний хөрөнгө зарцуулсан, үйл ажиллагааны зардлууд нь өссөн дүнтэй үнэлэгддэг. Ер нь барилга байгууламжийн амьдралын мөчлөг дэх бүх ашиглалтын зардлын 75 хувийг засвар үйлчилгээ, үйл ажиллагаанд зарцуулдаг. 

“Ухаалаг барилга” гэдгийг олон улсад хэрхэн тодорхойлдог вэ? Монголд хэр хөгжиж байна вэ? 

Ухаалаг барилгын хувьд тухайн барилгад ажиллаж, амьдардаг хүн өөрийн тав тухаа тухайн өрөөнд тохируулан хангах боломжтой болж, олон нийтийн барилгад ажил хэрэгч хүмүүс хөдөлмөрийн хуваарь, С-төвшний удирдлагын функцуудыг BMS системтэй холбосон гар утас, таблетаар дамжуулан бодит цаг хугацаанд барилгын орон зайг бүрэн хянах боломжтой болж байгаа юм. Товчхондоо ногоон барилга, ухаалаг барилга, тогтвортой барилга гэдэг нь орчин үеийн барилгын үндсэн тодорхойлолтуудын нэг болсон олон талт ойлголтууд юм. Ухаалаг удирдлагын системтэй, ногоон шийдэлтэй, эрчим хүчний хэмнэлттэй, сэргээгдэх эрчим хүчний бие даасан эх үүсвэртэй барилга, үл хөдлөх хөрөнгө  (ҮХХ) орчин үеийн зах зээлд үнэлгээ өндөртэй, ашиглалтын зардал багатай, өртгөө нөхөх хугацаа богино зэргээрээ ҮХХ эзэмшигчиддээ давуу тал болж чаддаг. 

 Миний бодлоор Монголд хэрэгжүүлж буй ухаалаг сууц, ухаалаг оффис гэж нэрлэн сурталчилж байгаа системүүд нь хамгийн сүүлийн үеийн шийдэл гэж хэлэхэд хангалтгүй санагддаг. Орчин үеийн ухаалаг барилгын автоматжуулсан систем нь ХАС (Халаалт Агаар Салхивч), Гэрэлтүүлгийн удирдлага, Эрчим хүчний хяналт, Аюулгүй байдал-Нэвтрэх систем, Галын дохиоллын систем гэсэн үндсэн 5 дэд системээс бүрэлддэг. Эдгээр системүүдийг нэг платформ, сервер, дэлгэц дээр зангидаж, аналитик хийж чаддаг програм хангамжаар удирдсаныг iBMS (Intelligent Building Management System) буюу “Ухаалаг арилгын удирдлагын систем” гэж нэрлээд байгаа юм. Гэтэл Монголд эдгээр таван системийг таван тусдаа үйлдвэрлэгчийн өөр өөр протоколтой системд холбож, таван компьютер дээр, таван өөр дэлгэцээр, таван оператор хянадаг систем суулгаад үүнийгээ “Ухаалаг барилга” гэж нэрлэж байна. Энэ бол 20 гаруй жилийн өмнөх технологи. Гэтэл iBMS гэдэг ойлголт дэлхийн төвшинд IP суурьтай, аналитик функцтэй, апликэйшнтэй, хиймэл оюун ухаантай холбогдон ажиллах зөвлөх програмуудтай болон хөгжиж байна.

Автоматжуулалтын олон гайхалтай шийдлүүдийг танайхаас харж болохоор санагддаг. Жишээ нь “хүн мэдрэгч” “дуу хоолой, хөдөлгөөн мэдрэгч” гээд л. Ийм ухаалаг ямар ямар шийдлүүд Монголд ашиглаж байгаа вэ? 

“Human sensor” буюу “хүн мэдрэгч” төхөөрөмж нь гэрийн тэжээмэл амьтан болон бусад механик хөдөлгөөнийг бус тухайн өрөө, орчинд хүн байгаа эсэхийг л мэдэрч ажилладаг. Өөрөөр хэлбэл зөвхөн хүн байгаа үед л тухайн өрөөний агааржуулалт, гэрэлтүүлэг зохих төвшинд ажиллаж, эрчим хүчийг хэмнэх зарчимтай. Манай Монголын зах зээл дээр одоохондоо “хөдөлгөөн” болон “дуу чимээ мэдрэгч” төхөөрөмж ашиглагдаж байна. Ухаалаг барилгын EcoStruxere платформ, Wiser Ухаалаг гэрийн системүүдийн хувьд Amazon-ы хөгжүүлж байгаа Alexa хиймэл оюун ухаантай IoT төвшинд интеграци хийн ажиллах боломжтой тул хүний дуу хоолойг таньж комманд биелүүлэх зарчмаар ажилладаг.

Манай компани ухаалаг барилгын үндсэн стандарт болсон KNX стандартын ухаалаг системийг суурилуулах, тохируулах мэргэжлийн экспертүүдэд сертификат олгох сургалт хийдэг бөгөөд үүний судалгаа хөгжүүлэлт нь  ХБНГУ-д хийгддэг. Манайд “Хаан” цамхагийн гэрэлтүүлгийн автоматжуулалт зэрэг хэд хэдэн төсөлд KNX стандарт шийдлүүд суурилуулж, ашиглагдаж байна.

ECOSTRUXURE ПЛАТФОРМ ЗАРДЛЫГ 30 ХУВЬ БУУРУУЛДАГ 

Ухаалаг барилгын “EcoStruxure” хэмээх архитектор шийдлийн талаар тодруулмаар байна. Монголд ямар үр өгөөжтэй дэвшлийг авчирч байна вэ? 

Инновацийг бүх түвшинд хүргэх зорилготой “EcoStruxure” платформ нь ердийн зориулалттай мэдрэгчээс эхлээд инновацийг түвшин бүрт хүргэх манай үйлчилгээний шинэчлэл нь IoT технологийн дэвшилд тулгуурлан бизнесийн үнэлэмжийг нэмэгдүүлснээр эрчим хүчний болон үйл ажиллагааны үр ашгийг дээшлүүлдэг. Үйлчлүүлэгчдийн хувьд ихээхэн ач холбогдол өгдөг болоод байгаа хөдөлгөөнт холбоо, мэдрэх чадвар, үүлэн технологи, мэдээлэлд анализ хийх аюулгүй кибер технологиудыг бий болгосон нь хэрэглэгчийн IoT технологийн шийдэл зах зээлд өрсөлдөхөд нь тусалж байна. 

EcoStruxure платформ нь зах зээлийн 4 сегментэд чиглэсэн 5 төрлийн архитектур бүтэцтэй технологийн гол тулгуур юм. Энэ нь IoT-г нэвтрүүлэх боломжтой инновацийн шийдлийн гурван үе шат болох IT/OT-ийн зөрүүг холбох боломжийг олгосон дижитал технологийг нэвтрүүлэх үндэс суурь гэж болно. Таамаглал болон үүлэн тооцооллын технологид тулгуурлан ажилладаг энэхүү нээлттэй архитектор бүхий платформ маань зардлыг 30% хүртэл бууруулах үл үзэгдэх интеграцчилал нь олон системүүд болон тоног төхөөрөмжүүдийг холбох боломжтой. Хөрөнгө оруулалтын өртөгөө нөхөх шинжүүрт тулгуурлан оновчтой шийдвэр гаргахад зориулсан системүүд ашиглан өөртөө давуу талыг олж авах боломжтой. Объектын ашиглалтын нийт зардлыг сайжруулахын (бууруулах) тулд оновчтой өгөгдөлд суурилсан үр дүнтэй хариу үйлдэл хийх боломж ҮХХ эзэмшигчдэд бий болсон. Барилгын ашиглалтын турш үр ашиг бий болгох ба хүмүүсийн хөдөлмөрийн бүтээмжийг нэмэгдүүлж тав тухыг хангасан. Хөрөнгийн менежмент болон барилгын удирдлагын системүүдийн хооронд хялбар интеграц хийх ухаалаг барилгын IoT платформ маань гуравдугаар үедээ орж, хөгжин дэлхийд тэргүүлэх глобал шийдэл болж чадсан байна.

“Deloitte”-ын “The Edge” барилга нь дэлхийд эрчим хүчний хэмнэлт, ухаалаг барилга гэдгээрээ алдартай. “Schneider electric” компани эдгээр барилгууд дээр ажилласан гэдгийг уншсан. Энэ талын мэдээлэл сонирхолтой байна?   

Ухаалаг, ногоон технологитой барилгуудын жагсаалтыг тэргүүлсэн Нидерланд улсын Амстердам хот дахь “The Edge” барилга (Санхүүгийн гигант Deliotte группын оффис) нь дэлхийн хамгийн тогтвортой, ногоон шийдэлтэй, ухаалаг барилгаар шалгарсан. Хэрэглэгчийн хүлээлт нь эрчим хүчний хэмнэлттэй, тогтвортой үйл ажиллагаа, ажилтнуудын тав тух, эрүүл ахуй, бүтээмжийг нэмэгдүүлэх шаардлагуудыг хангах асуудал байсан. IoT технологийг мэргэжлийн эко-экспертүүд суурилуулалтыг нь хийж гүйцэтгэсэн. Хэрэглэгчид үүссэн давуу тал, үр ашиг нь барилгыг бүхэлд нь хамарсан эко-шийдлүүд нь нэг IP суурьтай платформ бүтэц бий болгосон, Ухаалаг гар утасны апп-аар ажилтан өрөөнийхөө хяналт  удирдлагаар тав тухаа хангах боломжтой болсон, мөн хялбар интерфэйс хандалтаар веб сервер ашиглан барилгын өгөгдөлд нэвтрэх боломжтой зэрэг онцлогууд болно. 

Үр дүнд нь барилгын эрчим хүч хэмнэлтийн судалгааны институтээс (BREEAM) хамгийн өндөр оноо авч 98.36%  хүрсэн нь нар тусах шилэн хийцүүд, гадаргуу нь нарны хавтангаас бүрдэх ба эрчим хүчнийхээ хэрэглээний 102 хувийг өөрийн сэргээгдэх эрчим хүчний эх үүсвэрээс хангаж, эрчим хүч хэмнэлтийг барилгын өнцөг бүрт суурилуулсан 28 мянга гаруй мэдрэгчүүдээс авсан мэдээлэлд анализ хийн удирддаг программ хангамжтай болсоны үр дүн юм. 40,000 м2 талбай бүхий оффис барилгын эрчим хүчний зарцуулалт < 0.3 кВт*цаг/м2 жил гэсэн үзүүлэлтээр шалгарсан. “Тогтвортой байдал нь BREEAM-ийн аргачлалаар үнэлэгдэхээс ч илүү үнэ  цэнэтэй. Энэ нь ажилтнуулын тав тух, бүтээмжийн үр ашгийн тухай ойлголт юм“ гэж “The Edge” компанийн үүсгэн байгуулагч ноён Сооён Ван Оостром хэлсэн байдаг.

Edge болон удаах байранд жагссан Их Британийн Лондон хот дахь “Тоттенхэм Хотспур” цэнгэлдэх хүрээлэн ч мөн адил Шнайдер Электрикийн EcoStruxure ухаалаг барилгын удирдлагын нэгдсэн системийг зөвлөх программын хамт суурилуулалсан нь энд шалгарах үндсэн шийдэл нь болсон юм. 

“Schneider electric” компани нь ногоон хөгжлөөрөө дэлхийд тэргүүлэгч компани гэгддэг.  Тэр ч утгаараа “ногоон гэрчилгээ”- тэй гэж сонссон юм байна. Ямар шаардлага хангасан байгууллагад олгодог, хэдэн бүтээгдэхүүн нь энэ гэрчилгээг авсан байгаа вэ? 

Манай үйлдвэрлэдэг нийт бүтээгдэхүүний 75 гаруй хувь нь “Green Premium Eco Label” буюу Ногоон паспорттой байдаг. Энэ ногоон шошго нь тухайн үйлдвэрлэгчийг ногоон технологиор үйлдвэрлэсэн брэнд бүтээгдэхүүнтэй, байгаль орчинд ээлтэй үйлдвэрлэгч гэсэн баталгаа болдог. Энэ тэмдэг нь Шнайдер Электрикийн бүтээгдэхүүний байгаль орчны нөлөөллийн талаар өргөн цар хүрээтэй, найдвартай мэдээллийг тодорхой, ил тод байх үүрэг хүлээснийг илтгэдэг. 

“Green Premium” тэмдэг нь танай байгууллагын байгаль орчны бодлогыг тодорхойлох бөгөөд түүнийг дэмжих боломж олгон бизнесийн үр ашгийг нь нэмэгдүүлэх таних тэмдэг болдог. Энэ нь хамгийн сүүлийн үеийн байгаль орчны тухай хууль тогтоомжийн хэрэгжилтийг баталгаажуулдаг. Шнайдер Электрикийн Green Premium эко тэмдгийн тусламжтайгаар таны шийдлийн нүүрсхүчлийн хийн /хүлэмжийн нөлөөлөл/ ялгаруулалтыг тооцох, бүтээгдэхүүний орц найрлага, химийн бодисын агууламжийн талаарх хууль, дүрэм журмын хэрэгжилтийг бүрэн хангасан эсэхэд итгэлтэй байх, таны эко- дизайнтай ногоон шийдлийг тань баталгаажуулахад шаардагдах бүх мэдээллийг илтгэх, бүтээгдэхүүн ашиглалтаас гарах үед дахин боловсруулагдах боломжтой байх шаардлагыг хангах зэрэг олон талын ач холбогдолтой юм. Орчин үед дэлхийд тэргүүлэгч банкууд, хөрөнгө оруулалтын сангуудаар дамжин олон улсын чанартай барилгын төсөл хөтөлбөрүүдэд санхүүжилт авахад ногоон технологи ашиглан үйлдвэрлэсэн материал , тоноглол ашиглах шаардлага тавигдаж байгаа. Энэ утгаараа Шнайдерийн ихэнх төслүүд олон улсын байгууллагуудаас санхүүжилт авахад хялбар дөхөм байдаг гэж болно. “Green Premium” тэмдэг бол тухайн байгууллагын байгаль орчны бодлогыг илэрхийлэн, ингэснээрээ Байгаль орчны яамнаас гаргасан хууль тогтоомжуудыг хэрэгжүүлэхэд чухал үр нөлөөтэй юм. Ийм тэмдэгтэй бүтээгдэхүүн нь нүүрсхүчлийн хийн ялгаруулалтыг багасгах, уг бүтээгдэхүүний найрлагад орсон бодисууд нь химийн аюулгүй байдлын чанарыг бүрэн хангасан байх, тухайн бүтээгдэхүүн ашиглалтаас гарах үед ахин боловсруулах боломжтой шийдлээр хийгдсэн байдаг. Мөн Шнайдерийн бүтээгдэхүүнүүдэд ашиглалтаас гарах үеийн зааварчилгаа байдаг. Энэ унтраалгад тодорхой хэмжээний грамм зэс байгаа түүнийг дахин ашиглаж болно, мөн унтраалганы гадна корпус гэхэд, дахин боловсруулагдахаар хийгдсэн байдаг гэдгийг тоон үзүүлэлт, зааварчилгаа бүхий бичиг баримтаар баталгаажуулж дагалдуулдаг тул уг бүтээгдэхүүн байгаль орчинд хаягдаж хог болдоггүй. Хязгаарлагдмал нөөц баялгийг хэрхэн үр ашигтай зарцуулах вэ гэдэг дээр манай компани анхаарлаа төвлөрүүлж, бүтээгдэхүүнүүдээ дахин боловсруулагдах шийдэлтэйгээр үйлдвэрлэж байна.

Ярилцлагынхаа төгсгөлд та бүхний алсын зорилгыг асуумаар байна. Монголын барилгын салбарт ямар хөрөнгө оруулалтыг хийж, ямар хөгжлийг авчирч чадах вэ? 

Шнайдер Электрик компани нь хамгийн сүүлийн үеийн технологийн дэвшил бүхий эрчим хүчний хэмнэлттэй барилгын цахилгаан хангамж, автоматжуулалтын  тоног төхөөрөмжүүдийг үйлдвэрлэн дэлхийн зах зээлд нийлүүлэхийн зэрэгцээ хэрэглэгчийн хүсэлт, шаардлагад нийцсэн үр ашигтай шийдлийг санал болгодог  олон улсын компани юм. Нам болон дунд хүчдэлийн хуваарилах сүлжээний хүчний  тоноглол, цахилгаан хангамж, барилгын автоматжуулсан систем болон үйлдвэрлэлийн хяналт-удирдлагын СКАДА систем, үйлдвэрийн автоматик, хяналт-хэмжүүрийн тоног төхөөрөмжүүд нь олон улсын стандартын    / IEC, EN, IECEE, RoHS & ISO / дагуу үйлдвэрлэгдэн, мөн олон улсад магадлан итгэмжлэгдсэн хөндлөнгийн мэргэжлийн лабораторуудад / CE, UL & CSA / туршигдан баталгаажсан байдаг билээ. Ногоон хөгжлөөр дэлхийд тэргүүлэгч компанийн хувьд, манай үйлдвэрлэж буй бүтээгдэхүүнүүд нь эрчим хүчний хэмнэлт, байгаль орчинд нөлөөлөх байдал, хортой болон аюултай хог хаягдлын зохицуулалт, хүний эрүүл мэнд, аюулгүй ажиллагааны шаардлагуудыг хангасан дээд зэргийн бүтээгдэхүүний батламжтай байдаг. 

Бид Монгол Улс дахь түнш компаниудын  боловсон хүчинг хөгжүүлж, гадаад эксперт урьж авчран дотоод сургалтаар хангах, хилийн чанад дахь инновацийн үзэсгэлэн, үйлдвэр, шинэ гарсан техник технологиудтай танилцуулах, түүнийг Монголд нутагшуулах чиглэлд сүүлийн 7 жил хөрөнгө оруулан ажиллаж байна. Эдгээр дэмжлэгүүд нь маргаашийн Монголыг дижитал эрин зуунд хөтлөх дэлхийн төвшний компани болон хөгжихөд нь үнэтэй хувь нэмэр оруулж байгаа бидний хөрөнгө оруулалт, дэмжлэг болж байгаа юм. Бид удаан хугацааны хамтарч ажиллах боломжийг олж харж, мөн харилцан ашигтай ажиллах зарчмыг чухалчилж үздэг компани юм. 

Сонирхолтой сэдвээр ярилцах болож олгосон танай сэтгүүлийн хамт олонд ажлын амжилт хүсье.

Шнайдер Электрикийн Монгол дахь Салбар: ЛС Плаза Төв, 9 давхарт 903 тоот, Богд Жавзандамба хутагтын гудамж, Хан-Уул дvvрэг-15 Улаанбаатар хот 17011 Монгол улс 

Холбоо барих: 7000-9961 

Цахим шуудан: info.mn@schneider-electric.com 

Цахим хуудас: https://www.schneider-electric.com/mn