Архитектурын гутамшиг гэж нэрлэгдсэн ч лаазаар эрчим хүчний хэмнэлттэй байшин барьсан архитектор

Мөнхзаяа Мөнхзаяа
2020-03-17
Архитектурын гутамшиг гэж нэрлэгдсэн ч лаазаар эрчим хүчний хэмнэлттэй байшин барьсан архитектор


1972 онд залуу архитектор Майкл Рейнольдс хог хаягдал болон эрчим хүчний хэт хэрэглээнээс үүдэлтэй экологийн хямралын асуудлыг шийдвэрлэх төслөө хэрэгжүүлж эхэлсэн юм. Түүний гол санаа бол хог хаягдлыг дахин боловсруулалгүй шууд байшин барих түүхий эд болгон ашиглах байсан юм. Чухамдаа хогоор байшин барих санаа. Ингээд 70,000 орчим шар айраг, хийжүүлсэн ундааны лаазаар барьсан байшин барьж Thumb House хэмээн нэрлэсэн юм. Тухайн үед тус байшин нь тийм ч боловсронгуй бус байсан хэдий ч дулаан уур амьсгалтай орнуудад хэрэглээнд нэвтрүүлж болохоор байв. Гэвч олон нийт энэ байшинг экологийн хямралаас аварна гэж бодсонгүй. Учир нь тухайн үед хогийг байгаа чигээр нь ашиглах бус дахин боловсруулах ёстой гэж үзэж байсан юм. Мөн Майкл Рейнольдсийг архитектурын салбарын гутамшиг хэмээн нэрлэж, байшин барихад тусгай норм стандарт гэж бий хэмээн шүүмжилсэн.



Майкл Рейнольдс энэ бүхний эсрэг байж архитектурын салбар хуучирсан онолд тулгуурлаж, хэтэрхий баригдмал нөхцөлд хөгжиж байна гэж үзжээ. Ингээд тэр өөрийн байшингаа улам боловсронгуй болгохоор шийдсэн байна. Тэрээр төслөө Earthship Biotecture буюу био архитектур хэмээн нэрлэжээ. Аажмаар түүний байшингууд бохир ус зайлуулах, нараар халж цахилгаан хуримтлуулах, борооны усыг боловсруулах эко технологитой болсон юм. Энэ нь барилгын салбарынхан төдийгүй, экологийн тэнцвэрийн төлөө тэмцэгчдийн анхаарлыг татаж эхэлжээ. 



Тухайн үед Рейнольдс миний байшингууд бол эх дэлхийг экологийн хямралаас хамгаалах туршилтын шатны загварууд гэдгийн анхааруулж байсан. Гэвч зарим худалдан авагчид нь түүний байшингуудын чанарын талаар гомдол гаргаж эхэлжээ. Ингээд түүний тусгай зөвшөөрлийг Нью-Мексик мужийн Архитекторын зөвлөлөөс цуцалсан байна. 1990 оныг хүртэл Рейнольдс үйлчлүүлэгчидтэйгээ заргалдаж, эцэст нь өөрийн тусгай зөвшөөрлийг эргүүлэн авчээ. 



Одоо түүний Earthship Biotectur компанийн төв оффис Нью Мексик мужид байрладаг бөгөөд дэлхийн 40 гаруй оронд 1000 гаруй эрчим хүчний хэмнэлттэй байшинг барьж байгуулжээ. Эдгээрийн дотор тансаг зэрэглэлийн байшингаас эхлээд гамшгаас хамгаалах байр ч багтдаг.