2020 оны интерьерийн өнгөний чиг хандлага

Солонго Солонго
2020-02-07
2020 оны интерьерийн өнгөний чиг хандлага

Гэрийнхээ жижигхэн зүйлийг өөрчлөхөд л таатай, сайхан уур амьсгал ордог. Тиймээс та 2020 ондоо гэрээ шинэ өнгө төрхтэй, шинэлэг интерьертэй болгохыг хүсч байгаа бол энэ жилийн чиг хандлага болж байгаа шийдлүүдийг хүргэж байна. 

1. Хилэн материал 

2020 оны интерьерийн шийдэлд хилэн материалын чиг хандлага түлхүү орж ирж байна. Энэ нь тансаг байдал ба ая тухын төгс хослол юм. Ихэнх хүмүүс хилэн гэхээр хуучин хилэн, улаан өнгийн хувцасны тухай боддог. 2020 онд болон ирэх онуудад дотоод засал чимэглэлийн фирмүүд хилэн дизайны сонголтууд, ялангуяа буйдан болон зөөлөн тавилгыг хилэн материалаар хийх чиг хандлагатай байна. Мөн өнгөний сонголтууд урьд өмнө байгаагүй гэмээр өргөн цар хүрээтэй байна. Хилэн материалаар хийсэн тавилгад дуртай бол 2020 он таны хүслийг биелүүлэх болно.

2.Цэцэгсийн хээтэй орчин 

Цэцэгсийн хээтэй ор, буйдан, ширээ сандлын даавуун бүтээлэг, ханын наадаг цаас нь 2020 оны хүлээлт болсон интерьерийн чиг хандлагын нэг юм. Ханын цаас болон даавуун хэрэглэлүүд янз бүрийн хэмжээтэй, өнгө хэв маягийн өргөн сонголттой цэцгийн хээг урласан байх юм. Хэрвээ та тод өнгийг сонговол хүчирхэг байдлыг илэрхийлж байна гэсэн үг.  Гэрийн хана болон бусад зүйлүүдийг цэцэгсээр тохижуулах нь зун цагийг санагдуулах хамгийн сайхан шийдэл бөгөөд цэцэгсэд дуртай хүн бүхэнд таалагдана гэдэгт итгэлтэй байна. 

3. Тайвшруулах шидтэй ногоон өнгө 

Интерьерийн хувьд ногоон бол маш шинэлэг өнгө юм. Ногоон өнгөөр дамжуулан байгалийн өнгө аясыг гэрт оруулж таныг байгальтай ойртоход туслах юм. Энэ өнгө нь тайван байдлыг илэрхийлдэг тул таны гэрт тайван ая тухтай байдал авчрахад тус болно. Харин амьд ногоон ургамал өрөөнд өнгө үзэмжийг нэмж өгдөг. Хэрэв та өрөөгөө ногоон болгохыг хүсч байвал навчны хэв маягийг орны цагаан хэрэглэл, ханын цаасандаа  уран зураг хэлбэрээр оруулж болох юм. 

4.Дахин боловсруулсан модоор хийсэн тавилга 

Хүний гараар бүтээгдсэн болон байгалиас тогтож үлдсэн өвөрмөц хэлбэр дүрстэй бүтээгдэхүүнийг нэгтгэсэн шинэ чиг хандлага 2020 онд давамгайлж  байна. Дахин боловсруулсан модоор сандал, ширээ, шал хийх зэрэг нь байгалийн цэвэр органик, хүний биед сөрөг нөлөөгүй тавилга болох тул таны гэрийн гоо зүйд эерэгээр нөлөөлнө. Харин ариун цэврийн өрөөнд металл, чулуу зэрэг материалуудыг ашиглан эд хогшлыг бүтээж болох юм. 

5. Тав тух авчрах өнгөний шийдэл 

Дотоод засал чимэглэлд өнгө хамгийн чухал үүрэг гүйцэтгэдэг Тэгвэл 2020 онд ногоон, саарал, хүрэн бор, цэнхэр, улбар шар, улаан, бүдэг ягаан зэрэг завсрын ууссан өнгөнүүд зонхилох юм. Эдгээр өнгөнүүдээс бүдэг ягаан өнгийг илүү санал болгомоор байна. Учир нь ягаан өнгө нь эмэгтэй хүний ялгуун зөөлөн, дулаан байдлыг илэрхийлдэг тул таны гэрт тав тухтай байдлыг авчрах болно. Харин шаргал ягаан болон бусад цайвар ягаан өнгөнүүд унтлагын өрөөнд илүү тохиромжтой. 

6.  Метал өнгө онцгой интерьерийг бий болгоно 

2020 онд алтлаг, мөнгөлөг, зэс, хүрэл, тугалган цагаан гэх мэт металл маягийн өнгө трэнд болж байна. Гал тогооны хэсгийн ханыг тугалган цагаан өнгөөр сонговол тохиромжтой гэж мэргэжилтнүүд зөвлөж байна. Мөн металл өнгөнүүдийг зохимжтойгоор хольвол илүү тансаг, онцгой харагдах болно. Мөнгөлөг өнгийг боронзон өнгөтэй, төмөр шиг үнсэн саарал өнгийг алтлаг эсвэл боронзон өнгөтэй хослуулбал тохиромжтой. Гэхдээ нэг өрөөнд гурваас дээш метал өнгийг ашиглахаас зайлсхийх хэрэгтэй. Энэ нь өрөөг хэтэрхий давчуу, замбараагүй харагдуулах болно. 

7. Минималист халагдаж максимализм үе ирлээ 

Минималист нь хар, цагаан өнгө бүхий энгийнээс энгийн, тайван орчныг бүрдүүлдэг  хэв маяг бол максимализм нь үүнийг яг эсрэг үзэл баримтлалтай урсгал юм. Сүр жавхлант, тансаг, эрхэмсэг орчин, том, тод, хурц өнгөтэй, хээ хуар бүхий нарийн чимхлүүр чимэглэл, олон өнгийн абстракт зураг нь энэ урсгалын гол хэв шинжийг илэрхийлж байна. Завгүй амьдралын хэв маягтай болсон өнөө цагт хамгийн тохиромжтой гэж интерьер дизайнерууд үзэж байгаа юм.