Шинэ нисэх онгоцны буудлыг "Чингис хаан" гэж нэрлэжээ

Шинэ нисэх онгоцны буудлыг "Чингис хаан" гэж нэрлэжээ

Хөшигийн хөндийд баригдсан шинэ нисэх буудлын нэрийг тогтоох асуудлыг Засгийн газрын хуралдаанаар ярилцаж "Чингис хаан" гэж нэрлэхээр болсон байна. Улаанбаатар хотод олон улсын нисэх онгоцны шинэ буудал барих төслийг 2013 оноос Япон улсын Засгийн газрын хөнгөлөлттэй зээлээр эхлүүлж байсан.

Шинэ нисэх буудал нийт 32 объектоос бүрдэх бөгөөд хамгийн том нь 53 мянган метр кв хэмжээтэй терминал юм. Нислэгийн цамхгийг 9 баллын  газар хөдлөлтөд тэсвэртэй байхаар барьжээ. 800 метр кубын багтаамжтай цэвэр усны байгууламж, 42 мегаваттын хүчин чадалтай дулааны станц, 825 машины зогсоол, 200 машины дулаан зогсоол зэргийг бариад байна. Мөн нисэх буудлын зурвасыг бетоноор барьсан бөгөөд манай улсын хамгийн том бетонон байгууламжид тооцогдож байна. Нисэх буудал онцгой объект тул бүх барилга нэмэлт генератортайгаас гадна 1.5 км урт хонгилыг газар доогуур барьжээ. Цахилгаан холбоо, цэвэр бохир усны гэсэн хоёр салаатай хонгил нь манай улсын анхны газар доорх байгууламж аж. 

Онгоцны буудлын хувьд олон улсын нислэгийн тав, орон нутгийн нислэгийн нэг хоолойтой, агаарын 21 хөлгийн зогсоолтой.  Барилгын хувьд шилэн хийц түлхүү оруулсан шинэлэг шийдэл, зорчигчдод ойлгомжтой тэмдэг тэмдэглэгээ, нэвтрүүлэх чадвар бүхий олон гарцтай аж.  
 

 

 

Холбоотой мэдээ