Жилээс жилд өссөөр байгаа дэлхийн хүн амын хоол хүнсний хэрэгцээг хангахад одоо ашиглагдаж байгаа  газар тариалангийн бүс хүрэлцэхгүй байгаа билээ. Цаашид байдал улам бүр хэцүү болох нь дамжиггүй. Харин энэ асуудлыг нааштайгаар шийдвэрлэхэд дөхөм болох нэгэн архитектурын шинэлэг шийдлийг сонирхуулж байна.
      Энэ бол Испаний Барселона хотын “Forward Thinking Architecture” компаний бүтээсэн Ухаалаг хөвөгч фермер. Уламжлалт хөдөө аж ахуйн үйлдвэрлэлийг нэмэгдүүлэх зорилготой энэхүү бүтээл нь нарны эрчим хүчээр ажиллах бөгөөд хуучин усан санг ашиглах боломжтой.  Ухаалаг хөвөгч ферм  (SFF) нь нарны эрчим хүчийг ашиглах, ургамлыг усанд ургуулах, загас үржүүлэг гэсэн ажлуудыг нэгтгэсэн бүрэн автомат систем юм.
      Ухаалаг хөвөгч фермерийг  Азийн хөвөгч загасны аж ахуйгаас  санаа авч зохион бүтээжээ. Тус ферм нь гурван үндсэн түвшингээс бүрдэх ба тус бүр нь 200 метр өргөн, 350 метр урттай багц хавтангууд байх юм.  Эхний түвшин нь загас, далайн амьтны  үржүүлэг.  Дараагийнх хүнсний ногоо, ургамлыг тарьж ургуулах хөрс. Мэдээж дээвэр дээр нь нарны зайн хураагуур байрлана. Мөн борооны ус цуглуулагчийг ч шийдэж өгсөн. Мэргэжилтнүүдийн тооцоогоор нэг хавтангаас жил тутам 8.152 тонн хүнсний ногоо, 1.703 тонн загас  үйлдвэрлэх аж.