Өнөөдөр НИТХ-ын тэргүүлэгчдийн дарга Д.Баттулга барилгын салбарт үйл ажиллагаа явуулж байгаа аж ахуйн нэгжийн төлөөлөлийг хүлээн авч уулзлаа.

 

        Уулзалтын гол сэдэв нь салбарын өмнө тулгамдаад байгаа хөдөлмөр хамгаалал, аюулгүй ажиллагааны асуудалд дэвшил гаргах, гаргуулахгүй байхад юу хийх шаардлагатай, компаниудын өмнө тулгамдаж байгаа бэрхшээл, асуудлуудыг сонсох, харилцан санал солилцох зорилготой байсан юм. Цагдаагийн байгууллагаас хийсэн мэдээллээс харахад 2012 онд зөвхөн барилгын салбарт 161 гэмт хэрэг бүртгэгдсэнээс 26 буюу 70.2 % нь хүний амь нас хохирсон байна. Харин 2013 оны 2 сарын байдлаар 24 гэмт хэрэг бүртгэгдсэн нь өмнөх оны мөн үеийнхээс 9%-иар өсчээ. Барилгын ажил эхлээгүй байхад ийм тооцоо судалгаа гарч байгаа нь энэ салбарт хариуцлага, шаардлагыг өндөрсгөх хэрэгтэй байгааг харуулж байгаа юм.

 

      Уулзалтын үеэр НЕТГ болон НМХГ салбарын хэмжээнд авч хэрэгжүүлж байгаа ажил болон хийсэн хяналт шалгалтыхаа үр дүнг танилцуулсан юм. Нийслэлийн мэргэжлийн хяналтын газраас явуулсан шалгалтаар 170 орчим барилга байгууламж барилга эхлэх болон үргэлжлүүлэх зөвшөөрөл аваагүйн дээр хөдөлмөрийн аюулгүй байдлын менежментийг нэвтрүүлсэн байгууллага огт байгаагүй байна. НМХГ-аас нийтдээ 110 орчим сая төгрөгний торгуулийн арга хэмжээг авчээ.

 

       Барилгын салбарт гарч байгаа үйлдвэрлэлийн ослын дийлэнх хувийг өндрөөс унаж бэртэх, нас барах тохиолдол их байгаа нь хөдөлмөр хамгаалал, аюулгүй ажиллагааны асуудлыг дээд зэргээр мөрдөх шаардлага тулгарч байгааг харуулж байгаа юм. Мөн ажил олгогч эздийн 82% нь ХХАА-ны талаар ямар нэгэн мэдлэггүй, талбай дээр мэргэжлийн бус ажилчид байдаг нь осол эндэгдэл гарах нэг үндэс суурь болж байгаа юм.

 

      Санал солилцох уулзалтанд ирсэн компаниудын төлөөлөлөөс гарсан саналуудыг дурьдвал:

Барилгын салбарт осол эндэгдэл ихээр гарч байгаа шалтгаануудын нэг нь өргөх машин механизмын худалдаа ямар зохицуулалт, замбараагүй байдагтай холбоотой. Үүнийг тусгай зөвшөөрөлтэй болгох хэрэгтэй. Үүн дээр анхаарал хандуулахыг хотын удирдлагаас хүслээ. Барилгын компаниуд ажилчдаа мэргэшүүлэх тал дээр анхаарах, сургалтанд суулгах, ажилчид авахдаа мэргэжлийн ур чадвартай, дадлага туршлагатай хүмүүс авах хэрэгтэй байсан гэсэн санал их гарч байлаа.

 

       Барилгын төсөвт өртөгт хөдөлмөр хамгаалал, аюулгүй ажиллагааны зардлыг хангалттай хэмжээнд тусгах тал дээр инженер техникийн ажилчид шаардлага, хүсэлтээ тавих, эсвэл барилгын төсөвт өртгөөс гадна хөдөлмөр хамгаалалын зардлыг тусгах хэрэгтэйг ч сануулсан юм.

 

       Энэхүү уулзалтыг үр дүнтэй, ажил хэрэг болгох яригдсан асуудлуудын хэрэгжилтэнд хяналт тавих зорилгоор мэргэжлийн зөвлөл байгуулах хэрэгтэй гэж БЗМТ-ийн захирал Г.Батсүхийн саналыг хотын удирдлага дэмжин төрийн болон төрийн бус байгууллага салбарын компаниудын төлөөлөлөөс бүрдсэн мэргэжлийн зөвлөл байгуулахаар боллоо.

 

       Уулзалтын төгсгөлд НИТХ-ын тэргүүлэгчдийн дарга Д.Баттулга цагдаа болон мэргэжлийн хяналтаас тавьж байгаа шаардлагыг сайтар биелүүлэх, барилгын талбайгаа камержуулахыг компаниудын удирдлагаас хүслээ.

 

       Мөн тусгай зөвшөөрөл өгөхдөө хөдөлмөр хамгаалал, аюулгүй ажиллагааны зардал тусгагдсан эсэхийг шалгаж байж тухайн барилгад зөвшөөрөл олгож байхаар боллоо.