Хэнтий аймгийн барилга угсралтын “Оч манлай”, Улаанбаатар хотын “Иннова” ХХК-иуд хамтран жилд 200 мянган тонн цемент үйлдвэрлэх хүчин чадалтай, 11 тэрбум төгрөгийн төсөвт өртгөөр босох портланд /стандартын/ цементийн үйлдвэрийн төсөл боловсруулан Хэнтий аймагт хэрэгжүүлэхээр аймгийн удирдлагууд болон салбарын Яаманд хандсан байна. Уг төслөөр орон нутгийн түүхий эдийн нөөцөд түшиглэн цемент үйлдвэрлэж, 150 гаруй хүнийг ажлын байраар ханган, тээврийн зардлыг бууруулж, барилгын материалын үнийг өсөлтийг хязгаарлах боломжтой болно гэж төсөл зохиогчид үзэж байна.
     Уг төслийг орон нутагт ажлын байр бий болгож, бетон зуурмаг, бетон эдлэлийн үйлдвэрийг барьцалдуулагч материалаар хангах ач холбогдолтойг харгалзан салбарын яам болон орон нутгаас бүрэн дэмжиж байгаа аж. Иймээс энэ төслийг Зам тээвэр барилга хот байгуулалтын яам, Хөгжлийн банк, Үндэсний хөгжил, шинэтгэлийн хорооны хамтарсан ажлын хэсгийн хурлаар хэлэлцэн дэмжсэн бөгөөд одоо Хөгжлийн банк хөрөнгө оруулалтын судалгааг хийхээр болжээ. Ингээд уг банкнаас төслийг дэмжвэл Хэнтий аймагт бүс нутгийн цементийн хэрэгцээг хангах томоохон үйлдвэр байгуулах боломж бүрдэх юм байна.
 

Эх сурвалж: Хэнтий аймгийн хэвлэл мэдээллийн алба