Хан-Уул дүүргийн IV хорооны нутагт байх Нүхтийн аманд өнөөдрийн 15 цагийн үед баригдаж буй барилга нурж ажилчид нь дарагдсан томоохон осол боллоо. Тус аманд иргэн О.Мэндсайханы барилга дээр ажиллаж байсан 5 хүн бетон дээвэрт дарагдсан бөгөөд иргэдийн мэдээллийн дагуу онцгойгийн аврагчид шуурхай ажиллаж 4 хүнийг эсэн мэнд гаргасан юм.
Харин 56 настай Д-ийн байршлыг тогтоож чадахгүй байснаас түүнийг барилга дороос эсэн мэнд гаргаж чадсангүй. Гэсэн ч аврагчид 4 цаг эрэн хайх ажиллагаа явуулсны дүнд цогцосыг дөнгөж сая гарган цагдаагийн байгууллагад хүлээлгэн өглөө.
ОБЕГ-ын хурандаа Д.Ганбатын мэдээлж байгаагаар дээрх авран, хайх ажиллагаанд ОБЕГ, нийслэл, Хан-Уул дүүргийн аврах ангийнхнаас гадна шуурхай бүлэг 105-ийн 60 гаруй аврагчид оролцсоноос гадна цагдаа, мэргэжлийн хяналтынхан ажилласан байна.
Эх сурвалж: SHUUD.MN