Монголын Цонх Хаалга Үйлдвэрлэгчдийн Холбоо 5 жилийнхээ ойн хүрээнд гишүүн компаниудынхаа нөхөрлөл, эв нэгдлийг бэхжүүлэх, шударга, өрсөлдөөнтэй, сонирхолтой, спортын ур чадварыг харуулсан “5 жилийн ойн нэрэмжит цом”-той гар бөмбөгийн тэмцээнийг 2012.03.31-ны өдөр “Их засаг” их сургуулийн спорт зааланд амжилттай зохион байгууллаа.

Тэмцээний нээлтэнд Монголын Цонх Хаалга Үйлдвэрлэгчдийн Холбооны Тэргүүн Л.Гантөмөр:

Манай холбоо үүсэн байгуулагдсан түүх нь сагсан бөмбөгийн тэмцээнтэй холбоотой юм. Энэхүү холбоог МУ-ын цонх хаалганы үйлдвэрлэлийг тэргүүлэгч, 12 аж ахуйн нэгж байгууллага барилгын салбарыг чанартай, найдвартай, урт настайгаар бүтээн байгуулалцах үйлсэд сэтгэл зүрхээ дайчлан ажиллаж, үндэснийхээ үйлдвэрлэлийг дэмжиж, үйлдвэрлэлийг чанаржуулах, эх орныхоо зах зээлд өөрсдөө эзэн нь байя гэсэн уриатайгаар нэгдэн байгуулах суурийг нь тавьж, сагсан бөмбөгийн шилжин явах цомын тэмцээнээр эхлүүлсэн түүхтэй хэмээн ярьж байсан юм.

   

Гүйцэтгэх захирал Б.Отгонбаяр:

Манай холбоо 50 гаруй гишүүн байгууллагатай болж, өргөжин тэлж, үйл ажиллагааныхаа цар хүрээг өргөжүүлэн, зөв засаглалтай, чадвартай мэргэжлийн холбоо байх зорилттойгоор ажиллаж байна. Бид шилжэн явах цомтой сагсан бөмбөгийн тэмцээнийг жил бүр уламжлал болгон зохион байгуулдаг. Энэ жил холбоо байгуулагдсаны 5 жилийн ой тохиож байгаа. Тиймээс ойн нэрэмжит цомтой “Гар бөмбөгийн тэмцээн зохион байгуулж байгаагаараа онцлогтой гэдгийг тайлбарлаж байсан.

   Тэмцээнд “Металл Сервис” ХХК, “Топ Цонх, Шил” ХХК, “Цонх Констракшн” ХХК, “Заг Констракшн” ХХК, “Их Азар” ХХК, “Хаш Зэндмэнэ” ХХК, “Уярал Трейд” ХХК, “Гурван Буга” ХХК, “Гэгээн Талст” ХХК, “Макс Өргөө” ХХК, “НЕМОН” ХХК-иуд оролцсон.
   

Тэмцээнийг стандарт спорт зааланд хийж, мэргэжлийн шүүгчээр шүүлгүүлж, оролцогч байгууллага бүр цагаан өнгийн дэвсгэр дээр хөх өнгөөр бичсэн нэг хэмжээтэй пайз барьж байгаа зэрэг нь зохион байгуулалт сайтай байгааг харуулж байсан юм.

    Зоонд үлдсэн 3 багийн тамирчид нилээн чадвартай, өрсөлдөөнтэй, спортын ур чадварыг харуулсан тоглолтуудыг үзүүлсэн ба хөгжөөн дэмжигчид нилээн өрсөлдөөнтэй байсан.

Тэмцээн уралдаан юм хойно нэг нь түрүүлж, нэг нь хожигддог зарчимаараа 3-р байрт “Их Азар” ХХК орж хүрэл медаль, өргөмжлөл, мөнгөн шагналаар, 2-р байрт “Цонх Констракшн” ХХК шалгарч мөнгөн медаль, өргөмжлөл, мөнгөн шагналаар шагнуулсан юм. Харин “Цонх Констракшн” ХХК-ийн хамт олон “Шилдэг хөгжөөн” дэмжигч хамт олноор шалгарсан. Тэмцээний тамирчид нь шар өнгийн хувцсаар жигдэрч, хөгжөөн дэмжигчид нь цэнхэр өнгийн хувцсаар ижилсэж, байгууллагын нэртэй пайз, туг барьсан нь тухайн арга хэмжээг хүндэтгэн оролцож байгааг нь харуулж байлаа.

     Тэмцээний 1-р байр буюу Монголын Цонх Хаалга Үйлдвэрлэгчдийн Холбооны 5 жилийн ойн нэрэмжит цомын эзнээр “Гэгээн Талст” ХХК шалгарч, цом, алтан медаль, өргөмжлөл, мөнгөн шагналын эзэд болсон. Мөн тус тэмцээнд спортын ур чадварыг харуулсан тоглолтуудыг үзүүлж, шилдэг тоглогчоор “Гэгээн Талст” ХХК-ийн тамирчин Э.Батсайхан шалгарч өргөмжлөл, мөнгөн шагналаар шагнуулав.

  Тэмцээн уралдаанд оролцсон байгууллага хамт олноос “НЕМОН” ХХК-ийн хөгжөөн дэмжигчдийн бүрэлдэхүүн цөөн байсан ч өөрийн байгууллагын туг, пайзыг өргөж тамирчиддаа урам зориг өгөн дэмжиж байсныг дурдах нь зүйтэй болов уу. Мөн “Уярал Трейд” ХХК-ийн хөгжөөн дэмжигчдийн баг бүрэлдэхүүн “Цонх Констракшн” ХХК-ийн хамт олноос дутахааргүй баг тамирчидаа дэмжиж байсан шүү.

Шилдэг тоглогч “Гэгээн Талст” ХХК-ийн тамирчин Э.Батсайхан