2010-02-05 Уншсан : 436

Нийслэлийн Автозамын газраас тендерт ялсан “Эйч Кей Би интернэшнл Холдинг” ХХК-тай Монгол Улсыг хөгжүүлэх сангийн хөрөнгөөр Гурвалжингийн гүүрний их засварын ажлыг гүйцэтгүүлэхээр болж, ажилдаа ороод байна. Одоогоор гүүрийн засварт шаардлагатай материалуудаа татах, ажлын талбай бэлтгэх ажил хийгдэж байгаа бөгөөд гүүрийн дам нурууг буулгах, угсрах үед хөдөлгөөнийг бүрэн хаах шаардлагатай байгаа юм. НАЗГ-аас ирүүлсэн тооцоогоор бол гүүрийн их засварын ажлын хэвийн ажиллагааг хангах үүднээс тус гүүрээр дамжих тээврийн хэрэгслийн хөдөлгөөнийг тавдугаар сарын 1-нээс наймдугаар сарын 25 хүртэл хаах шаардлагатай ажээ.Мөн гүүрийн дам нуруунууд хотойж, деформацид орсноор даацын хязгаар алдагдаж, баталгаат даацыг хангаж чадахгүй учир дамжин өнгөрөх тээврийн хэрэгсэл болон зорчигчдын осол аюулгүй зорчих нөхцлийг бүрдүүлэх зорилгоор бүх жин нь 3,5 тонноос дээш жинтэй автотээврийн хэрэгслийн хөдөлгөөнийг хязгаарлах санал ирүүлээд байгаа юм. Замын цагдаагийн газрын судалгаагаар Гурвалжингийн гүүрээр нэвтрэх тээврийн хэрэгслийг жингээр хязгаарласан тохиолдолд  10-р хорооллын урд замаар явуулж, Нарны замтай нийлүүлэх хувилбар байгаа боловч төв замын хөдөлгөөний ачааллыг нэмэгдүүлэх учир, ТЭЦ-4-ийн урдуурх замыг ашиглах боломжтой  гэж үзэж байна. Засаг даргын зөвлөлийн хурлаар энэ асуудлыг хэлэлцээд мэргэжлийн байгууллагын дүгнэлт нь гарч, хөрөнгийн асуудал нь шийдэгдсэн энэхүү ажлыг шуурхай гүйцэтгэх үүднээс холбогдох байгууллагуудын саналыг нягтлаад, Засаг даргын захирамж гаргаж шийдвэрлэхээр боллоо.

Мөн Засаг даргын Зөвлөлийн хурлаар өндөр хөгжилтэй оронд магисрантур, докторантурт суралцуулах журам батлах, нийслэлийн Хөдөө аж ахуйн салбарын тэргүүний хүмүүсийг шалгаруулах, нийслэлийн өмчийн байрнуудын  түрээсийн төлбөрийн доод үнийг шинэчлэн тогтоох тухай зэрэг асуудлыг хэлэлцлээ гэж  Нийслэлийн Хэвлэл, мэдээллийн албанаас мэдээллээ.

2010-02-05

Хэвлэх