Нийслэлд өнөө жил тендерээс шалтгаалан ажил оройтох,хугацаандаа хийгдэхгүй байх зэрэг зөрчил гаргахгүй гэж хатуу шийдвэрлэсэн билээ.Тиймээс энэ ажлыг гардан зохион байгуулдаг мэргэжилтнүүдийг хамарсан сургалтыг оны эхэнд хийхдээ, тендерийн үр дүнг  зөвхөн нийслэлчүүдэд л хүртэх ёстой хэмээн хотын мээр хатуу анхааруулсан.  Нийслэлийн Засаг даргын өгсөн үүрэг даалгаварын дагуу тендерүүд хоёрдугаар сарын 01 гэхэд зарлагдаж ,дөрөвдүгээр сарын 01-ээс ажил эхлэх учиртай. Улаанбаатар хотод улсын болон орон нутгийн төсвөөр хийгдэх ажлуудын тендер  зарлагдлаа.

Эхний ээлжинд Орон сууцны хорооллын цэвэр, бохир усны шугамын ажлыг гүйцэтгэх, нийтийн зориулалттай 13 орон сууцны барилгын дээврийн их засвар, нийтийн зориулалттай орон сууцны барилгын лифтийн шинэчлэлт, орон сууцны барилгын зураг төсөв, Баянзүрх дүүргийн УС-15 халаалтын зуухнаас хангагдаж байгаа орон сууцны байруудын халаалт, ус хангамжийг сайжруулах ажлын тендерийг зарлалаа. Мөн Улаанбаатар хотын авто замын сүлжээг сайжруулахаар Эрхүүгийн гудамжны 0,7 км авто замын засвар, Саппорогийн аюулгүйн тойрог ба Гурвалжингийн гүүр хүртэлх 0,4 км авто замын засвар шинэчлэлтийн, нийтийн зориулалттай найман орон сууцны барилгын дээврийн их засварын гүйцэтгэлийн ажил ч сонгон шалгаруулалтанд орход бэлэн болжээ.Тендерт тухайн ажлыг гүйцэтгэх тусгай зөвшөөрөлтэй эрх бүхий дотоодын байгууллага,аж ахуйн нэгжүүд оролцох эрхтэй гэж Нийслэлийн хэвлэл мэдээллийн албанаас мэдээллээ.